NAPOLI - ATALANTA (27/08/17) 3 A 1 ‘A VEDETTE ACCUSSÍ

NAPOLI - ATALANTA (27/08/17) 3 A 1

‘A VEDETTE ACCUSSÍ

Cuntento d’’o risultato d’ajeressera? E i’ mo che ve pozzo dicere guagliú? Sí e nno, sí e nno, pecché pe vvencere se vincette, ma no comme s’êsse avut’’a vencere e cciovè cchiú llargo e soprattutto mantenenno ‘a porta acrata (inviolata) e ‘mmece  ttutto chesto nun succedette, anze pe ccinquanta minute e  cchiú ‘o Napule nun riuscette maje a ffà ‘o Napule cuncedenno â scuatra ‘e chella faccia ‘e cestunia arrevutata sotto e ‘ncoppa ‘e Gasperini ‘e fà chello ca vuleva e ssovrattutto ‘e passà ‘nvantaggio ô 15’ ‘ncopp’ô siconno tiro ‘e squina (corner) cu ‘na cabbesera (colpo di testa) ‘e Cristante ca mettette ‘a palla addó Reina nun ce putette arrivà i ‘o purtiere cuano sta ancòra chiammanno ‘e muorte ê cumpagne suoje ca paretteno ‘e ggatte appese ô llardo quanno cercajeno ‘e cuntrastà ‘o mediano atalantese, senza però  riuscí manco a zzumpà p’’a mmità ‘e chello ca facette ll’avverzario;

Menu male però ca po a ll’arrancua (nella ripresa) ‘o Napule accumminciaje a gghiucà e arrivaje ll’addaffa (rete) ‘e Zielinski ca  ribbaltaje  ‘a serata.Da chillu mumento  ‘o  Napule nun se spacenziaje  i ô 93’ se purtaje â casa ‘e tre ppunte d’’a nichemata, chille ca sott’ô lampione ponno fà ‘a differenza! Sperammo sulo ‘e nun vedé ancòra mubbare (partite) cumme a cchelle d’ajere cu scuatre ca scenneno ô san Paolo parchiggianno ‘o pulmanne ‘nnante â porta e ppo nce metteno ‘ndifficultà  jucanno curto e ssenza spazzio ‘nfra ‘e llinie. Sarri s’à dda ‘mmentà coccosa pecché nun vulimmo suffrí e mmetterce paura e s’à dda fà capace ca ‘ncopp’ê tire ‘e squina (corner) nun se po’ mmarcà a ccamma (zona), ma s’à dda marcà stritto e a ommo [curte cu ccurte, luonghe cui lluonghe] si no facimmo sempe palla corta e gghiamm’ ‘int’ê cchiavette!Turnammo  a nnuje: doppo d’’o tempuraneo russimmo (pareggio) ‘e Zielinski (56’) cu ‘nu granne tiro dô lemmeto  d’’a muntaca (area di rigore) atalantese  arrivaje doppo cinche minute ‘o vantaggio ‘e Ciruzzo ca mettette a ffrutto, cu ‘na palla ‘mnmiez’ê ccosce d’’o purtiere Berisha, ‘nu bbassurero (suggerimento) ‘e Lorenzigno e finalmente a ll’87’ Rog ‘a poco trasuto se facette truvà ô posto justo, ô mumento justo pe nchiurere ‘a pratteca ‘ncopp’ô tre a uno.E cchesto,tutto summato, è ‘nu bbuonu signale, pecché vencere pure suffrenno, serve a gghí luntano! Passammo ê ppaggelle:   

REINA 6,5  Nun tenette nisciuna sfarma (colpa) ‘ncopp’ a ll’addaffa (rete) pigliata e ffacette ‘o ssuĵo cu ‘nu paro ‘e bboni marfudde  (respinte) durante ô primmo ajone (tempo). Pare ca se nne va e nnun saccio proprio a cchi facimmo jucà ‘mporta, visto ca ‘nfra quatto juorne nzerra ‘o mercato!

MAGGIO 5,5  Poca rrobba ‘ncopp’â curzia e ffove isso ‘o principale respunzabbile ‘e ll’addaffa (rete) ‘e  Cristante .

 ALBIOL [‘o Masto] 6  Cuntrullaje senza troppi prubbleme chi capitaje dê pparte soje.

 KOULIBALY 6,5 Tutto summato ‘na mubbara (partita) senza particulare difficultà cunnita ‘e ‘nu paro ‘e spallate a pPetagna pe ffarelo capí ch’aria tirava.

 GHOULAM 6,5  Fove isso ca se dette da fà ‘ncopp’â curzia ‘e mancina pure durante ô primmo ajone (tempo) quanno tutt’’o riesto d’’a scuatra faticaje a gghiucà.

 ZIELINSKI 7,5   Tutto summato ‘o meglio d’’o mazzo; nun sulo adderezzaje ‘a varca facenno avutà ‘a frittata, ma se facette ‘o campo ‘nnante e arreto jucanno pe dduje. [Dô 74’ ROG[‘A Belva]  7  Trasette cchiú ‘ndemuniato ‘e chi ascette e aggiu ditto tutto: azzannaje chi capitasse, ricuperaje pallune,costruette juoco e ghiette pure a ssignà. E scusate si è ppoco.]

JORGINHO 6,5  Pure essenno priciso e urdinato durante ô primmo ajone (tempo) nun riuscette a ffurní  pallune adatte ê cumpagne lla ‘nnante; menu male ca a ll’arrancua (ripresa) cagnaje marcia e sse facette apprezzà. [Dô 66’ DIAWARA 6  Trasette a gghiuoche fatte e ggestiunaje (gestí) a mmestiere chello ch’êtte ‘a fà.]

 HAMSIK [Marekiaro] 5   C’è ppoco ‘a fà: nunn’ è ancòra isso e ppure ajeressera nun me piacette; cu ttutto ca s’affannaje a ddà ‘na mana â trasera (difesa) se sentette ca ‘nnante ce mancajeno ‘e ccose ca po’ e ssape fà isso! [Dô 59’ ALLAN 7 Trasette e ppurtaje súbbeto cegna(grinta) corza  e  ‘mmenzione (inventiva); fove isso ca cu ‘nu pallone matàlo  (perfetto) accumminciaje ll’azziona  d’’o vantaggio ‘e  Ciruzzo.]

CALLEJON 6,5  Francamente pe vvederelo jucà êttemo aspettà bbuone cinquantacinche minute, ma quanno se decidette a ffà chello ca sape fà [comme ‘int’a ll’azziona d’’o tre a uno] ‘o Napule cagnaje passo e ffove tutto n’ata museca.

 MERTENS [Ciruzzo] 6,5   Tutto summato serata bbona d’’o bberga ca sufferette paricchio ‘nu poco pecché se ‘ncazzaje, ‘nu poco pecché se ‘nnammuraje d’’a palla. Po però,  finalmente venette fora e sse facette truvà pronto ô 61’ quanno servette pe mmettere dinto ‘a palla d’’o doje a uno!

INSIGNE[Lorenzigno] 6,5   Pe paricchiu tiempo se facette ‘mbriglià da ll’atalantise; truvaje però ‘o muvimento justo ô mumento justo i adderezzaje ‘a serata soja e cchella d’’o Napule quanno se ‘mmentaje ll’jusaida (assist) d’’o doje a uno.

All.  SARRI 5  Me dispiace, ma  nun lle pozzo mettere ‘e cchiú!Pussibbile ca nun riesce a ddà ancòra ô Napule ‘nu juoco alternativo ‘ncorzo d’opera? Pussibbile ca nun à capito ancòra comme se marca ‘ncopp’ê tire ‘e squina (corner)? Pussibbile ca nun se fa capace ca, pure si se chiamma Marekiaro,si nun sta ‘nforma nun ll’à dda fà jucà?   ‘A furtuna soja fove ca,  a ppietto ‘e ll’anno passato, ajeressera nisciuno perdette ‘a pacienza, tutte ce credetteno e riuscetteno a ppurtarese â casa tre ppunte ‘mpurtante.   

Arb. DI BELLO 4,5  ‘Stu bbancario pugliese ce porta bbuono, ma nun me piacette dimustranno pure ajeressera  d’essere scemo, ‘e nun vení ‘a Brindisi, ma da Turino e ppricisamente dô Cottolengo   e nnun m’addimannate ato!

E ccu cchesto ve saluto  e si ‘o vvo’ ‘o Cielo ce sentimmo llunnerí ca vene, doppo d’’a nacchèlla (trasferta) contr’ê mmurtadelle ‘e bBulogna. Staveti bbe’!

Raffaele Bracale Brak