NAPOLI – NIZZA (previo ciampionsa 16.08.17) 2 A 0 ‘A VEDETTE ACCUSSÍ

NAPOLI – NIZZA (previo ciampionsa 16.08.17) 2 A 0

‘A VEDETTE ACCUSSÍ

No, no, no guagliú accussí nun va! E nnun me dicite ca songo ‘ncuntentabbile, ma nun pozzo essere cuntento d’’o doje a zzero d’ajeressera ô san Paolo giacché ‘o Napule êsse avut’’a nchiudere ‘a pratteca d’’o previo (preliminare) ‘e Ciampionsa contr’ô Nizza ggià ajeressera ‘ncasa sutterranno ‘e francise sott’ a tre o quatte pallune ‘mmece d’’e duje ca lle cunzignaje quanno ll’arbitro pulacco siscaje ‘o prazzo (fine) e ttutto chesto no  pecché  ô Napule lle fósseno mancate ll’accasione, ma pecché sciupaje tutte ‘e tre o quatto avute [ddoje e mmeze avute da  Peppe ‘a ‘nguenta i ‘o riesto da Lorenzigno, senza cuntà chella capitata a s. Arcadio, ll’unica ca pozzo perdunà dàtose ca ‘o guaglione maje e ppo maje se fósse aspettato ca Peppe ‘a ‘nguenta ‘mmece ‘e fravecà ‘a palla ‘mporta ll’êsse misa ‘mmiezo pigliannole ‘ncontropère.] Sinamparco (comunque) ‘o Napule nun sbagliaje ‘o primmo appuntamento ‘mpurtante d’’a tempurata (stagione). E cchesto conta. Pe mmo partimmo dô doje a zzero; ‘o riesto ll’âmm’’a fà ‘nfra quinnece juorne ‘nterra ‘e Franza. E i’ nce crero! Jammo a vvedé ‘e ppaggelle:

REINA 6  Praticamente êtte ‘a fà sulo atto ‘e presenza.

 HYSAJ[Meza cucchiara] 6,5  Pure avenno a cche fà cu n’accunto scamuso comme Saint-Maximín(ne), ‘o meza cucchiara s’’a vedette ‘e bbella appressuranno (spingendo)   a ddritta durante tutto ‘o primmo ajone (tempo) senza fà fessarie e ppure a ll’arrancua (nella ripresa) se facette apprezzà.

 ALBIOL[‘O masto] 6  Jucaje ‘na bbella mubbara (partita) cu ‘nu sulo sfregazzo (sbavatura) a pprazzo (fine) ‘e primmo ajone (tempo) quanno se scurdaje d’ascí ‘ncuollo a  sSaint-Maximín(ne)ca, ‘ncopp’a ll’uno a zzero  arrivaje ncuntrastato ô lemmeto d’’a muntaca (area di rigore) sfresanno  (sfiorando) ‘nu russimmo (pareggio) ca nun se fósseno mmeretate! Peccato! So’ ccose ca nun ànn’’a succerere.

 KOULIBALY 6,5   Tutto summato ‘o cchiú attiento d’’a trasera (retroguardia)  cuana (azzurra).

 GHOULAM 6  ‘A chiena i ‘a vacante: ‘nu paro ‘e bbelli cchiusure durante ô primmo ajone, ma pure ‘nu paro ‘e durmute ‘nfra cuje chella periculosa quanno Koziello se ‘nzertaje (inserí) prucurannose  n’accasione. Stesso trascurzo fatto p’’o Masto: ‘sti ccose nun se fanno!

ALLAN[‘O ‘ncrifato] 7 Cumannaje ‘a pressione (pressing) ‘nmmiez’ô campo, arrubbanno ‘na cifra ‘e  pallune e azzannanno ê feliette a cchi capitaje. Ô nijaje  (finale) ‘e sibbacco (match) furnette a lLrenzigno ‘na granna jusaida (assist),ma ‘o frattese [tanto pe nnun cagnà] ‘a sciupaje!   [Dall’86’ ROG[‘A bbelva] 6 Pochi minute, ma facette ‘o ssuojo]

JORGINHO 7,5  Manuvraje a mmestiere ll’armidanno (centrocampo) e ffove friddo,attiento e  ppriciso quanno s’appresentaje a ll’unece metre. Cumprimente.

HAMSIK[Marekiaro] 5,5 Me dispiace, ma ‘o capitano ajeressera me piacette poco: ‘mmiez’ô campo se jette annascunnenno, nun cercaje ‘a porta e nun se ‘nzertaje (inserí).Sperammo ca ggià sapato ca vene cagnasse museca! [Dô 59’  ZIELINSKI 6,5 Trasette bbuono e ssúbbeto ‘int’ô juoco e ddètte ‘na bbona mana .]

CALLJON[Peppe ‘a ‘nguenta]5,5 Faicaje assaje e ffurnette pallune ê cumpagne, ma nun pozzo perdunarle cchelli ddoje accasione e mmeza sciupate malamente; sotto porta nun s’à dda sbaglià!.

 MERTENS[Ciruzzo] 7,5  Fove isso ca cu ‘na granna azziona sbluccaje ‘a mubbara (partita) e ffove sempe isso ca se jette a pprucurà ‘o ricore d’’o doje a zzero. Se dette da fà pe ttutt’’o tiempo ca stette ‘ncampo e mme fósse piaciuto vederlo ‘nzieme a s. Arcadio, ma ô 75’ Sarri, chi sa’ pecché..., levaje a isso e nno a lLorenzigno ca steva aizanno porvera![Dô 75’ MILIK[s.Arcadio] 5,5 Me dispiace ‘e metterle miezu zifo (voto) mancante, ma pure si ‘o perdunaje, comme v’aggio ditto, resta ‘o fatto ca nun riuscette a pprufittà d’’a palla misa ‘mmiezo ‘a Peppe ‘a ‘nguenta, facennose piglià ‘ncontropère.]

INSIGNE[Lorenzigno] 5  ‘E cchiú nun s’ammereta, visto ca ‘e bbuono facette sulo ll’ jusaida (assist) pe ll’addaffa (rete) ‘e Ciruzzo, ma p’’o riesto d’’o sibbacco (match) durmette cu ‘a zizza ‘mmocca e sbagliaje cchiú ‘e ‘na bbona accasione. E cche saciccio! Nun capisco proprio pecché Sarri ô 75’ nun levaje a isso, ma a cCiruzzo!

All.  SARRI 6  E mmanco miezu zifo (voto) ‘e cchiú, pecché si ‘a  priparazziona ‘e ‘na vota  (vecchio stile) funziunaje i ‘o Napule tenette ‘o campo senza prubbleme ‘e cosce e vvincette ‘a mubbara (partita), nun lle pozzo perdunà ‘e tené ‘o ppresutto ‘ncopp’a ll’uocchie e nnun vedé ch’êsse avut’ascí Lorenzigno e nno Ciruzzo.

arbitro: MARCINIAK (Pol)5,5 Facette quase tutto ‘o duvere suojo.

Fermammoce cca dicenno ca a ‘stu punto è ffunnamentale nchiudere ‘a pratteca  ‘nterra ‘e Franza p’accummincià a mmeglio ‘na tempurata (stagione) ca putesse pure essere da tené a mmente!

Ve saluto e ssi dDi’ vo’ ce sentimmo dummeneca a mmatina  doppo d’’a nacchella (trasferta) ‘e sàpato a ssera  a vVerona p’’a primma jurnata ‘e campiunato. Staveti bbe’.

R.Bracale Brak