VERONA -NAPOLI (19/08/17) 1 A 3 ‘A VEDETTE ACCUSSÍ

VERONA -NAPOLI (19/08/17) 1 A 3

‘A VEDETTE ACCUSSÍ

Che nervatura guagliú!Aggio paura ca pure st’anno ‘e cuane ànnu diciso ‘e fareme magnà ‘a rezza d’’o core ‘nu passo arreto â vecchia zoccola[ca, pe pparta soja tene cchiú cculo ca anema]; ccumminfatte ajeressera a vVerona contro  ê pariente ‘e chella granna  zoccola ‘e Giulietta, êssemo pututo nun sulo  mantené ‘o passo,ma  addirittura fà meglio  d’’e janche e nnire vincenno allimmeno pe tre a zzero fora casa, si nun fósse succieso ca a ll’ 82’ ‘o meza cucchiara  nun avesse fatto ‘na granna puttanata facennose siscà ‘nu ricore contro ca nce custaje ll’addaffa (rete) pigliata addó, pe cchello fatto, pe cquase tutt’’o sibbacco (match)êssemo avut’’a vencere addirittura pe quatto, cinche a zzero dàtose ca fovemo padrune d’’o campo nsi’ a ll’ uttantesimo e ssulo ‘a ‘mprecisione ‘e Marekiaro e dde Lorenzignonun  nun ce cunzentette ‘e sbrasà. Naturale po ca ll’urdemi minute [perze ‘o meza cucchiara jettato fora i ‘o Vampiro ca cadenno se facette male a ‘na spalla], naturale ca ‘e padrune ‘e casa ce desseno quacche preoccupazziona.Però mo nun ce fasciammo ‘a capa: tenimmo tutto ‘o tiempo ‘e scartavetrà quacche spiculo. Però ll’âmm’’a fà! Passammo ê ppaggelle

REINA 6,5  Tutto summato fove custretto pochi vvote a spurcarese ‘e guante, ma quanno ‘o ffacette, jette a cciammiello; peccato can un capette ca Pazzini êsse tirato centralmente ‘o ricore e sse menaje a ddritta lassanno ‘a porta spalancata.

 HYSAJ 4,5 ‘O meza cucchiara nun me piacette proprio; ajeressera ll’arbanese fove ‘o cchiú ‘nsufferenzia d’’a scuatra; cumminfatte dâ parta soja arrivajeno, mo cu cCerci, mo cu vVerde, ll’accasione cchiú periculose p’’e  cuane (azzurri); nun sulo s’abbuscaje ‘nu cartellino jalizzo (giallo), mo po   Rimedia un'ammonizione, po, pesce ‘e cannuccia comme a ppoche, a ll’82’ se facette cogliere da ll’arbitro Fabbri (4,5 e ppo ve dico) ca ‘o teneva puntato mentre  riaggeva malamente ê pruvucazzione ‘e chillu figlio ‘e coperativa  ‘e Bessa e sse facette siscà  ‘nu ricore contro facennose pure caccià. Nun ce simmo!

CHIRICHES  [‘o Vampiro] 6  A pparte ‘nu paro ‘e sfregazze (sbavature) senza cunsequenzie, cuncedette poco o niente ê pariente ‘e chella zoccola ‘e Giulietta, facennose rispettà.

KOULIBALY 6,5  Pure senza ‘o cumpagnone solito, senza ‘o Masto, ma cu ‘o Vampiro vicino swe dimustraje sempe forte e ssicuro mettennoce ll’armaddia (fisico), saluta e ‘nteliggenza bluccanno sott’ô colpo ògne nazzuva  (velleità) d’’e nassíe  (attaccanti) ‘e  casa.

GHOULAM 7  Bbella atalossa (prova) ‘e ll’alcerino ca nun sulo bluccaje chi capitaje mo a ddritta, mo a mmancina, ma fove periculuso cu ‘nu paro ‘e timmurie(punizioni) e quacche jabbro  (cross) e soprattutto mettette dinto ‘a terza addaffa (rete) ca nchiudette ‘e cunte.

ZIELINSKI 6 Pure senza ‘ncantà, facette ‘o ssuojo soprattutto palla ô pere.  

DIAWARA 6,5  Sia quanno avette libbertà ‘e moverse sia quanno fove pressato dimustraje ordine, precisione ‘e pasiglio (passaggio) e ccuntrollo d’’o juoco, dànno ‘a ‘mpressione ca fósseno facile pure ‘e ccose difficile! Fove isso ca accumminciaje ll’azziona d’’o doje a zzero.

HAMSIK[Marekiaro] 5,5 Comme ggià era succieso  contro ô Nizza,’o capitano nun me piacette: a pparte quacche rara bbona jucata i ‘a mana data â trasera(difesa) sbagliaje cchiú ‘e ‘na vota quanno avette ‘a pussibbilità ‘e cercà ‘a porta e cchesto nun ce ‘o pputimmo perrmettere!Ô posto ‘e Sarri nn’êsse fatto a mmeno![Dô 66' ALLAN 6  Trasette ‘ncopp’ô tre a zzero e dètte ‘na  bbona mana a ccuntrullà ll’armidanno (centrocampo); peccato ca ô niajo (finale) jette pur’isso ‘int’ê cchiavette!]

CALLEJON [Peppe ‘a ‘nguenta] 6- Le capitaje ‘ncopp’ê piere ‘o pallone d’’o pussibbile vantaggio e isso ‘o sciupaje; cchiú ttarde po nun détte palla a ccentro addó s.Arcadio ‘a steva aspettanno. ‘Nzomma  attivo sí,  ma poco cuncreto e nnun ce ‘o pputimmo perrmettere! [Dô 73' GIACCHERINI s.v.]

MILIK[s. Arcadio] 7- Miso ‘ncampo a surpresa pe bbona mez’ora nun avette ca pochi pallune e sse mettette a ddisposizzione d’’a scuatra; po ‘e ccose migliurajeno ‘nu poco e  [doppo ca  ô 33' ‘ncopp’a ‘nu tiro ‘e squina ‘e Lorenzigno   Nicolas(se) era asciuto a vvacante lassanno ca ‘o pallonne  sbattesse ‘ncopp’ê piere ‘e Souprayen(ne) e trasesse ‘mporta] arrivate ô 39’ ‘o pulaccone mettette a ffrutto ‘na granna apertura ‘e Lorenzigno [ca s’era fatto miezu campo palla ô pere]piazzanno ‘nu càtaro (diagonale) forte e ppriciso justo a ffilo ‘e palo ‘e dritta , truvanno n’addaffa (rete) funnamentale nun sulo p’’o risultato, ma pure pe ttené auta ‘a  ticca (fiducia) [Dô 61'  MERTENS 6 -  Pure senza lassà ‘o signo participaje [e ccomme! ]a ll’azzione d’’o tre a zzero e sse facette vedé spisso a mmettere ‘ntrivule e ttempesta ‘a trasera (difesa) ‘e casa.]

INSIGNE [Lorenzigno] 7  Nun lle mecco ‘e cchiú pecché nun fove capace ‘e mettere palla ‘mporta pure avennone avuto ll’accasione. ‘Ncumpenso  ce mettette tutto ‘o riesto: corza, cegna(grinta), tassarie (accelerazioni) e jusaide (assist); mancaje sulo ‘a pricisione quanno cercaje ‘a porta e nnun ce ‘o pputimmo permettere.   

All. Maurizio SARRI 6.5 Nun cunzideranno  ‘o capitano, ca i’ nun êsse fatto jucà,  ‘o Napue dimustraje ‘e stà ‘ncundizziona cu ‘nu juoco ggià cullaudato, e sse  vedette; peccato p’’a fessaria fatta dô meza cucchiara ca arresecaje d’arapí n’ata vota ‘nu sibbacco (match) ggià nchiuso.Sbagliaje isso però  ca durante ll’affasilla (intervallo) nun pigliaje p’’e rrecchie quaccuno d’’e suoje pe lle raccumannà ‘e nun fà puttanate! Peccato.Sperammo ca nun succede cchiú!

 Arbitro:  FABBRI 4.5  ‘Stu ‘mpiacato [ma nun se sape addó]ajere arbitraje p’’a primma vota ‘o Napule e cce facettemo ‘a croce a mmana smerza; aggio paura ca ggià – pur’isso – sta ‘ncopp’ô stato paca d’Agnelli & socie. Cumminfatte ajere siscaje sempe contr’ô Napule caputianno carí (falli) e ppermettenno ê pariente  ‘e chella granna  zoccola ‘e Giulietta ‘e fà ‘e commete lloro senza dicere niente; pigliaje ‘mpont’ô naso ô meza cucchiara i apprimma ‘o nutizziaje (ammoní) e ppo a ll’ 82’ nun lle parette overo ‘e lle siscà ‘nu ricore contro jettannolo fora; e ddicere ca jette pure a ccuntrullà ‘int’â varra d’’a sora e nnun vulette cecà a vvedé  ca si ‘o meza cucchiara êva fatto ‘o mmalamente a bBessa, chillo ch’aveva accumminciato, pruvucanno ‘o cuano (azzurro)  era stato proprio  chillu figlio ‘e puttana d’’o bbrasiliano [arrivato ‘nnitaglia p’aumentà ‘a ddosa d’’e figlie ‘e puttane ca jocano ‘int’ô campiunato tagliano, comme si nnun abbastasseno chille ca ce stanno!] Che ne parlammo a ffà?!

E ffermammoce cca. Ve saluto e ssi dDi’ vo’ ce sentimmo miercurí  a mmatina  doppo d’’a nacchella (trasferta) ‘e marterí a nNizza addó âmm’’a nchiudere pusitivamente ‘a pratteca d’’o previo (preliminare) ‘e Ciampionsa!  Staveti bbe’.

R.Bracale Brak