BOLOGNA – NAPOLI (10.09.17) 0 A3 ‘A VEDETTE ACCUSSÍ

BOLOGNA – NAPOLI (10.09.17) 0 A3

‘A VEDETTE ACCUSSÍ

Si so’ cuntento d’’a zinfunia napulitana  ajeressera ô Dall’Ara ‘e Bulogna addó ‘o Napule vincette largo pe ttre a zzero,  mmantenenno ‘a porta acrata (inviolata)? Certo nun dico ‘e no guagliú però si cunzentite e ppure si nun cunzentite i’ dico ca fósse stato nicessario fà ‘nu zico ‘e cchiú signanno n’ata addaffa (rete)   pe mmantené ‘o passo d’’a vecchia zoccola ca sapato êva vattuto ‘o Chievo pe ttre a zzero piazzannose ‘ncimma â crassifica a nnove punte cumpressive  cu ‘nu tutale ‘e  diece addaffe (reti) fatte e ddoje pigliate. ‘Mmece nujie vincenno pe ttre a zzero ci simmo piazzate ‘ncrassifica pure nuje a nnove punte, ma simmo sulo siconne cu ‘nu tutale ‘e  nove addaffe (reti) fatte e ddoje pigliate. Fósse stato  pirciò nicessario vencere allimmeno pe cquatto a zzero, ma     ‘e guagliune ‘e Sarri nun  ce ‘a facetteno e nnun m’ accuntentajeno! Sinamparco (comunque) ‘o Napule turnaje cu ttre ppunte dint’â sacca doppo ‘nu primmo ajone troppo mutavazzino (equilibrato) dàtose ca ‘e cuane cunzentetteno ê mmurtadelle ‘e tené troppo ‘o campo. A ll’arrancua (ripresa),però – trasuto Zielinski -  ‘o Napule turnaje a essere isso e sbrasaje cunzignanno a cchella faccia ‘e pesta ‘e Donadoni i ê ccumpagne suoje  tre guappe  sfugliatelle ricce: ô 66′ cu pPeppe ‘a ‘nguenta, a ll’82’ cu cCiruzzo  i a ll’88’ cu  zZielinski; peccato sulo ca duje minute doppo ‘o ‘Ncrifato, pe ttroppa pricipitazziona, nun riuscette a ‘ncartà ‘a quarta riccia e c’êttemo accuntentà ‘e vencere pe ttre a zzero, poco a ppietto d’’o sette a uno d’’o campiunato passato. Sapite cumm’è: nun sempe ‘o mese è dde trentuno. Pacienza. Passammo ê ppaggelle:

REINA 7  AttIento, concentrato e ssempe pronto mantenette ‘a porta acrata (inviolata) facenno granni ccose allimmeno ‘nu paro ‘e vote. ‘Nu purtiere accussí è ‘nu peccato perderlo!

HYSAJ[MezaCucchiara] 6  Nun chiú ‘e chesto, pecché ll’arbanese facette justo justo ‘o nnicessario sufferenno p’’e nfente e contranfente ‘e Verdi ca lle dette che ffà!

CHIRICHES [‘o Vampiro] 6,5  Nsi’ a cche rummanette ‘ncampo  ll’atalossa (prestazione) d’’o Vampiro fove pricisa e urdinata cu bbelli nchiusure; peccato ca fove custretto a sse nn’ascí ô 42’ pe bbia ca se prucuraje ‘na scarugnata sgummatura (lussazione) a ‘na spalla .[Dô 43’ ALBIOL[‘o Masto] 6,5  ‘a solita atalossa (prestazione) ‘e sustanza d’’o Masto. Trasuto pe nnecessità jucaje urdinatamente senza sfregazze (sbavature) ‘a fora ‘e ‘nu sfurtunato artitaddo  (rimpallo) ca nce steva pe ccustà n’affidarma (autorete); pe ffurtuna ca Koulibaly nce mettette ‘na santa pezza!)

KOULIBALY 7   Granna atalossa (prestazione) d’’o ggialante nuosto ca fove praticamente matàlo  (perfetto) ‘mmiezo â trasera  (difesa) cuana (azzurra), rijalanno sicuranza  (sicurezza) e ppresenza addó fove nicessario, pure ‘ncopp’â linia ‘e porta!

GHOULAM 6,5  Carta canusciuta: annante se prupunette bbuono e ccu cqualità, mentre arreto facette sí e nno ‘o nnicessario.

JORGINHO 5 –Disurdinato e ‘mpriciso se facette sgamà e nnun essere ‘ncundizziona; marcato stritto sbagliaje cchiú d’’o nnicessario ‘nquartannose quanno nun avette, e nun ll’avette maje!, ‘a pussibbilità ‘e fà chello ca sape fà. .[Dô 78’ DIAWARA 6 ‘e stima]

ALLAN[‘o ‘Ncrifato] 6,5  ‘Nzieme a  zZielinski i a dDiawara  è  ll’arvasatto  (centrocampista) cuano (azzurro) cchiú ‘nfromma: pressiona  (pressing) corza a ttutto campo e ttanta qualità; fósse stato meno pricipituso ce avesse dato pure ‘a ggioja d’’a quarta addaffa (rete)!

HAMSIK[Marekiaro] 5 Me dispiace, ma pure ajeressera se vedette ca ‘o capitano nun sta ancòra  ‘nfromma e sperammo ca se decide a mmetterse a dduvere ampressa: Napule vo’ vederlo ggirà comme sape, po’  e à dda fà![Dô 78’ ZIELINSKI 6,5  Trasette ô posto d’’o Capitano e súbbeto s’avutaje ‘o Vangelo, ‘o Napule cagnaje faccia e ffove tutta n’ata musica; ‘o guaglione dètte ‘na sferzata pusitiva â scuatra e sse facette truvà ô posto justo pe mmettere dinto ll’addaffa (rete) d’’ob tre a zzero. Applavuse!]

CALLEJON[Peppe ‘a ‘nguenta] 7 Nun fove ‘o solito jucatore ca canuscimmo, ma ô stesso dimustraje ca nun se ne po’ ffà a mmeno rijalannoce ‘mprimmose ‘o stuco (gol) ca sbluccaje ‘o sibbacco (match) e  ppo ‘na granna jusaida pe zZielinski!

MERTENS [Ciruzzo] 6,5  Ajeressera Ciruzzo se vedette poco,però da chillu granne scugnizzo figlio ‘e ‘ndrocchia ca è riuscette, cu ccegna (grinta) e ccazzimma,  a ffotterse ‘o pallone dê piere ‘e Pulgarre i ‘o piazzaje  ‘mporta facennolo passà ‘mmiez’ê ccosce ‘e Mirante i accussí mettette ô ssicuro ‘o risuldato! 

Insigne 6+ Ma nce ‘o mecco sulamente pecché ô 66’, doppo ca pe quase tutta ‘a mubbara (partita) êva aizato porvera, riuscette a ‘mmentarese ‘na granna affitaja (apertura) pe pPeppe ‘a ‘nguenta ca a mettette a ffrutto. Se vedette ca ‘o guaglione ‘e   Frattamaggiore teneva ancòra ‘int’ê rrecchie ll’inticadde (critiche) p’’e duje sibbacche (match) cu ‘a nazziunale...

All. SARRI 5,5  Chi vence ave raggione, ma ajeressera pe tutto ‘o primmo ajone (tempo) ‘o Napule nun fove isso soprattutto pecché ‘o mutarribbo (l’allenatore) se ‘nfessette a ffà jucà ggente cumme a jJorginho  e mMarekiaro ca nun stanno ‘nfromma e ce mettete tiempo pe cchiammarsele ‘mpanca. 

arbitro: GIACOMELLI  i ‘a CHENCA SOJA    3  ‘Stu triestino è scemo, fesso e ccecato,nun sape chello ca fa e sse fa mettere ‘e ppurpette ‘mmocca; ajeressera siscaje a vvienetenne e ssempe ‘ndanno d’’e cuane; nun ce dette nemmeno uno d’’e duje ricure ca ce fósseno spettate, ma s’êtt’’a fà ‘int’ê recchie pecché ‘o Napule vincette ô stesso e llargo â faccia soja e de cchiú ‘e ‘nu cestariello! 

E ccu cchesto ve saluto dannove appuntamento, si dDi’ vo’, a ggioverí ca vene doppo d’’a nacchella (trasferta) ‘e Ciampionsa contro ô Shakhtar(re) Donetsk, ca nun saccio chi so’!  Staveti bbe’.

R.Bracale Brak

.