LAZIO – NAPOLI (20.09.17) 1 A 4 ‘A VEDETTE ACCUSSí

LAZIO  – NAPOLI (20.09.17) 1 A 4

‘A VEDETTE ACCUSSí

Canta Napule, Napule a ggogó, guagliú! Stammo ancòra sbattenno ‘e mmane ‘ntribbuna divano ‘nnante  ô 43 vuse (pollici) nuovo ‘e trinca, pe fistiggià ‘a nichèmata (vittoria) ‘mpurtante d’ajeressera cunquistata dô Napule  a ll’Ulimpico  rumano contr â scuatra ‘e chillu naso a ppuparuole  d’Inzaghi , mantenenno ‘o passo d’’a vecchia zoccola e cunfermannose ‘ncimma â crassifica cu 15 punte, 19 addaffe (reti) fatte e ttre pigliate, ‘nu zico ‘a coppa d’’a vecchia zoccola janca e nnera ca d’addaffe n’à fatte sulo 14.  E ttutto chesto  cu ttutto ca ‘e cuane (azzurri) foveno custrette a scennere ‘ncampo vestute cu ‘na muntazzimma  (divisa) jettatoria blu-savoja contr’â bbanda d’’o pappavallo ‘e Lotito vestuta p’’a primma cummeniona; ma se vincette ô stesso e sse vincette largo cu ‘na granna arrancua (ripresa) doppo ca êvemo lassato  tutto ‘o primmo ajone ê lazziale e gghienno  addirittura  sotto quanno â mez’ora ‘oNcrifato se facette fà ‘a Ciro Immobile  e gGiorgigno lassaje libbero e ffranco a dde Vrij ca da duje metre futtette a rReina; ma po a ll’arrancua (ripresa) cagnaje ‘a museca, ‘o Napule turnaje a ffà ‘o Napule e ô prazzo ( alla fine)’ a bbanda d’’o pappavallo ‘e Lotito se n’ascette chiagnenno. Se vincette e sse vincette largo cunzignanno  â bbanda d’’o pappavallo ‘e Lotito ‘nu cartoccio cu ttre sfugliatelle firmate  Koulibaly  ô 54',Peppe ‘a ‘nguenta ô 56', gGiorgigno ô 92', mentre ô 59’ êva pruvveduto Ciruzzo a ccunfezziunà ‘na pastiera ca m’arricurdaje cierti ccose ca faceva DIEGO. ‘Nzomma se mantenette ‘a zurea (ritmo) d’allimmeno tre stuche (gol) a ssibbacco (match) e cchillo ca pe sSarri êva ‘a essere n’itibbarro (test) ‘mpurtante d’’o pprincipio ‘e tempurata (stagione) se cunchiudette cu ll’intisarro (trionfo) d’’e cuane (azzurri) e ‘o muntarribbo (l’allenatore) avette dâ scuatra  ‘na risposta pusitiva, chella  ca s’aspettava e ca ce purtaje â decima nichèmata (vittoria) cunzecutiva d’’e nuoste, sàggialo (record) d’’a storia d’’o ciuccio. E nnun fernesce cca!   Passammo ê ppaggelle:

 REINA 6  ‘Ncopp’â zampata ‘e de Vrij, lassato sulo libbero e ffranco ‘a Giorgigno, nun tenette sfarma (colpa); p’’o riesto facette chello ch’êv’’a fà, e rriuscette, ascenno,  pure  a ffermà a   Immobile e ppacienza si s’abbuscaje ‘na timmuria (punizione) contro e  ‘nu cartellino jalizzo ca nun ce steveno!

 MAGGIO 6  Atalossa (prestazione) aunesta ‘a soja, a gguardia d’’o bbidone rummanenno praticamente nchiummato ‘int’â camma( zona) soja; peccato ca nun scennette quase maje. 

ALBIOL[‘O Masto] 6,5 Nun sbagliaje praticamante niente, e  Immobile cercaje spisso inutilmente ‘e surprennerlo ê spalle. Assaje pusitivo ‘o fatto d’avé participato a ll’azziona ca  conzentette ô Napule ‘e mettere ‘e ccose a pposto angappanno ‘o russimmo (pareggio) cu Kalidú ô 54’.  

KOULIBALY 6+ P’’a verità nun è accumminciaje bbuono, giacché sbagliaje ‘nu paro d’anfisarre (disimpegni)e ccuntinuaje facennose firrà (sfuggire) a Immobile. Se facette però perdunà ô 54’ quanno se facette truvà ô mumento justo ô posto justo pe casticà ‘a Lazzio  recuglienno e fravecanno ‘mporta  ‘a rispinta ‘e Strakosha ‘mpignato da ‘nu tiro d’’o Masto!   

 GHOULAM 6  Facette ll’assenziale senza sfurzarse troppo e vvenetteno meno ‘e jabbre (cross) suoje. Peccato.

ALLAN[‘O ‘Ncrifato] 5,5 Miezu zifo (voto)mancante p’esserse fatto fà ‘a Ciro Immobile nn’accasione ‘e ll’addaffa (rete) lazziale; p’’o riesto doppo ‘nu primmo ajone ca ‘o vedette ‘ndifficultà  ‘nfra  Milinkovic-Saviccio e ll’ate triblirre (palleggiatori) lazziale, migliuraje assaje  a ll’arrancua ( nella ripresa), comme a ttutto ‘o Napule.

JORGINHO 6,5 Durante ô primmo ajone jette ‘int’ê cchiavette cu lLuis Alberto; po a ll’arrancua ( nella ripresa), pigliate ‘e mmesure riuscette a ffà chello ca sape e ppo fà e se vedette quanno ô 59’ lanzaje a cCiruzzo chella palla addivintata ‘a terza addaffa (rete); nun cuntento ô 92’ fessiaje a Strakosha da ll’ armarno (dischetto). Ce vuleva!

HAMSIK   [Marekiaro]6   Sta turnanno a essere isso chianu chiano; ajeressera se fósse mmeretato pure ‘nu ricore a ffavore durante ô primmo ajone (tempo) ‘ncopp’ô zzero a zzero, ma chillu sacchetto ‘e ll’ummeto ‘e Damato pe nnun ce ‘o dà nchiudette ll’uocchie e ss’appilaje ‘e rrecchie!Pure ajere a mmeza arrancua (ripresa) Sarri s’’o chiammaje ‘mpanca, ma ‘o capitano, pure facenno ‘a faccia storta,  nun se rizzelaje; cugliette ‘nu palo (e fforze êsse pututo fà meglio...) sfresaje(sfiorò)  ‘na daffimarma (autogol), ma ll’jusaida (l’assist) pe ll’addaffa (rete) ‘e Peppe ‘a ‘nguenta ô 56’ fove ‘nu capolavoro. Aspettammolo n’a’ ppoco![dô 73'  ZIELINSKI 6+ Se jette a guaragnà ‘o ricore  ‘e ll'uno a cquatto; e nnun fove poco!]

 CALLEJON[Peppe ‘a ‘nguenta] 7  A pparte ca mettette spisso ‘mpreoccupazziona ‘a tràsera (difesa) lazziale cu ‘e taglie suoje e Strakosha facette ‘nu miraculo pe fermarle ‘nu pallone ca se chiammava stuco (gol), ô 56’ mettette dinto ‘a palla d’’o doje a uno funnamentale pe  ll’arrialle (rimonta)! [da ll'86'  ROG 6 ‘e stima Trasette troppo tarde pe ffà vedé chello ca sape e pputesse fà, si jucasse ‘e cchiú! Purtroppo se joca sulo cu unnece jucature...]

MERTENS[Ciruzzo] 8  E nnunn’ aggio esaggerato!Lle se po’ ffà chello ca vulite vuje, ‘o scugnizzo nuosto nun perdona e si ave ll’accasione nun s’’a fa fují. Chello ca cumbinaje ajeressera chiammannose fora a Strakosha, futtennose cu ‘a ponta d’’o pere ‘o pallone e piazzanno ‘na palomma sott’ô sette d’’o palo luntano fove ‘na cosa ‘a mettere ‘ncurnice e rraccuntarla ê nepute!  [da ll'81'  MILIK 6   Sulo ‘na dicina ‘e minute, ma ll’abbastajeno pe sfresà (sfiorare) ‘nu stuco (gol) e ffurní ‘nu bbell’jusaida(assist) a  zZielinski, jettato’nterra ‘a   Parolo.]

 INSIGNE[Lorenzigno] 6,5 Nun signaje ma se dette da fà pure quanno ‘o Napule,durante ô primmo ajone (tempo) arrancaje,e ddètte ‘o cuntribbuto pesante  suojo accummincianno ll’azziona d’’o doje a uno.

All. SARRI 7   Avette ‘a risposta ca s’aspettava dê suoje e ffove accuntentato; tutto summato avette raggiona isso nun cagnanno furmazziona; nun ce scurdammo ca  chi vence ave raggiona!

Arb. DAMATO 4 nun s’ammereta ‘e cchiú, ‘stu barlettano tifuso jummerdino! E nun me spiate ‘o pecché!

E ffermammoce cca. Si dDi’ vo’ ce sentimmo dummeneca a mmatina doppo d’’a sfita ‘e sapato ca vene ô san Paolo contr’â Spal(le).

Staveti bbe’

R.Bracale Brak