NAPOLI-FEYENOORD(Ch.26/09/17) 3 A 1 ‘A VEDETTE ACCUSSÍ

NAPOLI-FEYENOORD(Ch.26/09/17) 3 A 1

‘A VEDETTE ACCUSSÍ

Porca miseria, guagliú! Menammo ‘o ‘ncienzo pecché cartamente ce sta quacche cestariello ca ce à cuoveto cu ‘a favetta soja e ccu ‘sta cacchia ‘e Ciampionsa ‘o Ciuccio nun riesce a ffarece assaje cuntente. E ddico chesto pecché ajeressera ‘o Napule scennette ‘ncampo  ô san Paolo pe se calassarse (riscattarsi) doppo d’’o sciuliamazzo ‘nnUcraína ô 13 ‘e ‘stu mese e ppe vvencere, vincette sí, ma senza sbrasà comme fósse stato pussibbile e soprattutto senza riuscí a mmantené ‘a porta acrata (inviolata) cosa ca facette ‘ncazzà a mme ‘ntribbuna divano,a sSarri e soprattutto a rReina ca ancòra sta chiammanno ‘e muorte ê duje centrale nuoste, ma soprattutto a cchillu presutto ca Cairo se facette pavà prufumatamente... e mme spieco: Pepe êva fatto tutto i ‘e cchiú [cumpreso parà ‘nu ricore rijalato a ll’ulandese da chella mmunnezza d’arbitro  ] pe nun ffarese superà... e nc’era riuscito nsi’ ô 93’ quanno ‘e duje centrale nuoste [‘a pigli’i’, ‘a piglie tu] nun riuscetteno a cuvernà ‘na palla ‘nzipeta arrivata ‘int’â muntaca (area di rigore) nosta cunzentenno a ‘nu certo  Amrabat(e) [ca nun se sape chi ll’à sgravato]’e cogliere ‘e ponta chella palla e mmetterla ê spalle ‘e Reina. E cche ccacchio!  E ffove accussí ca ‘a mubbara (partita) se  nchiudette ‘ncopp’ô tre a uno addó si êssemo vinciuto pe quatto o cinche a zzero nun fósse stato ‘nu scannalo!Ecco pecché penzo ca avimm’’a menà ‘o ‘ncienzo e llevarecela ‘a cuollo ‘a favetta ca ce ànnu jettato!

Basta va, ve riepiloco ‘o sibbacco (macht)jucato unnice [nuje] contro a ddurece[lloro]giacché chillu sacchetto ‘e ll’ummeto d’arbitro scuzzese s’’a tiraje cu ll’ulandese [e ppo ve dico...].Da poco scise ‘ncampo, manco ‘o tiempo ‘e piglià ‘e mmesure ca  â primma vera accasione (7’) ‘o Napule passaje ‘nvantaggio.Lorenzigno  ricuperaje palla poco doppo d’’a  mità campo, se facette miezu campo e [sfruttanno ‘o curridore apierto da Peppe ‘a ‘nguenta ca s’era carriato appriesso ‘e duje centrale ulandese]dô lemmeto d’’a muntaca (area di rigore)piazzaje ‘nu tiro ‘e dritta e ffuttette a   Jones(se). L’1-0 dette sicuranza  (sicurezza) ê nuoste ca cuntrullajeno quacche mudesta tacatamma (avanzata) d’’e profuche ulandese, pruvanno cu maccaría (calma) a ttruvà ‘o mutajaffo (raddoppio); passaje accussí ‘na bbona mez’ora senza lajate (sussulti) e ssulo a nniajo (finale) ‘e primmo ajone ‘a scuatra cuana (azzurra) sfresaje (sfiorò) cinche vote ‘o stuco (gol) senza però    ca nè Lorenzigno,nè Peppe ‘a ‘nguenta, nè Jorginho,nè ‘o capitano Marekiaro, nè ancòra Insigne, riuscesseno a ‘draccà (concretizzare) ll’artafavucca  (superiorità)cuana (azzurra).Ô pprincipio ‘e ll’arrancua (ripresa) ‘o Napule finalmente passaje ‘a siconna vota e ffove chillu scugnizzo ‘e Ciruzzo ca cu ccazzimma apprufittaje ‘e ‘nu rijalo ‘e ‘nu difenzore lloro e,  ssenza farese prijà, piazzaje ‘a palla d’’o doje a zzero ‘int’a n’anculillo firmanno ‘o stuco (gol) sujo nummero 50 ô san Paolo cu ‘a maglia nosta. Fove allora  ca ‘o  Feyenoorde tentaje ‘na riazziona  mannanno ô tiro ‘nu paro ‘e profuche,ca però nun surprennetteno a rReina, sempe attiento e ppusitivo. Parette ca ‘a mubbara fósse nchiusa; ll’arbitro però cercaje ‘e ll’arapí n’ata vota ô 67’ quanno rijalaje [doppo dì’averene nijate dduje sacrusante  ô Napule]’nu ricore a ll’ulandese, pe ‘nu carí, ca però vedette sul’isso, ‘e Ghoulam(me)  ‘ncuollo a bBerghuis(se) ma s’êtte ‘a fà dint’ô prozo pecché  Reina se superaje e ce ‘o paraje i accussí dô pussibbile ddoje a uno jettemo ô tre a zzero pecché Ciruzzo (70’) arrubbaje palla e ‘a servette a pPeppe ‘a ‘nguenta ca cu ‘nu bbellu diacunale signaje ‘o tre a zzero; ô niajo (nel finale) ce fove tiempo pe n’ata parata ‘e  Reina ‘ncopp’a  bBerghuis(se) e ppe ‘na cabbesera (colpo di testa) fora ‘e Kalidú. Fenuta? Macché! Fenette ô terzo minuto  d’antijsso (recupero) ‘ncopp’ô tre a uno, quammo succedette ‘a disturbata i ‘a fessaria ‘nchietta ‘e  Koulibalý e d’’o Presutto ce custaje ‘o stuco (gol) d’Amrabat(te), ‘a vocca amara a mme i a sSarri e ‘na murtiata a rReina ca nun vattette ê  duje cumpagne sulo pecché s’ammesuraje ‘a palla e nne facette passo visto ca so’ dduje cummò cu ‘o specchio.Sinamparco(comunque) a ‘stu punto  putimmo dicere ca ‘stu Napule,  sempe cuncentrato ‘ncopp’ô campiunato, po’ ddicere ‘a soja pure ‘nCiampionsa e ‘a tarra  (sfida) d’uttombre cu ‘o  Manchester(re) City  ce po’ ddicere ‘int’â tempurata (stagione) aiurupea addó po’ arrivà ‘stu Napule!

Passammo ê ppaggelle:

REINA 7,5  Bella atalossa (prestazione) ‘e Pepe ca, non pe sfarma (colpa)soja,   nun riuscette a mmantené ‘a porta acrata (inviolata), ma fove prutacunista d’’a serata paranno ‘nu ricore e sfuderanno ati tre o quatto tacculle (interventi) pruvvidenziale.

HYSAJ 6  Facette ‘o ssuĵo urdinatamente; appressuraje (spinse) poco, ma cuntrullaje bbuono chi passaje p’’a curzia ‘e dritta.

MAKSIMOVIC[‘o Presutto] 5  Facette pesà ll’assenza d’’o Masto e sse purtaje ‘ncopp’â cuscienza ‘o stuco (gol) ‘e ll’ulandese durmenno cchiú d’’o cunzentito ‘ncopp’ a ‘na palla ‘a jettà subbeto luntano, p’’o riesto fove poco priciso e nun riuscette maje a urtizzà (verticalizzare) ascenno dâ muntaca (area di rigore) e custringette ô cumpagno ‘e sezziona a ffaticà pure p’isso! Ancòra m’addimanno comme  facette Cairo a ppigliarese tanti sorde pe cce ‘o dà.   

KOULIBALY 5,5  Miezu zifo (voto) mancante p’’a meza durmuta ‘nchietta cu ‘o Presutto ‘ncopp’a ll’addaffa (rete) ulandese; p’’o riesto faticaje cchiú d’’o nicessario visto ca nun ce steva ‘o Masto; s’êsse pure  pututo sparagnà d’essere nutizziato (ammonito) inutilmente.

GHOULAM 6,5  Appressuraje (spinse) a mmancina sfruttanno corza e ccundizziona. Nun lle se po’ dà nisciuna sfarma (colpa) p’’o ricore contro pecché l’alcerimno nun facette niente i ‘o ricore nun ce steva!

ALLAN [‘o’Ncrifato] 6,5  Se sentette ‘a presenzia soja lla ‘mmiezo: recuperaje,cusette ‘a manovra, allargaje ‘o juoco e sse ‘nzertaje (inserí). Mo comme a mmo nun se ne po’ ffà a mmeno.

JORGINHO 6  Se facette nutà durante ô primmo ajone (tempo) p’’a riggia urdinata e pricisa pure senza fà cape d’angelo; addirittura meglio a ll’arrancua (nella ripresa). [Da ll’80’ DIAWARA 6 ‘e stima]

 HAMSIK [Marekiaro] 5,5  Niente,  ‘o capitano nun è ancòra isso; se move ‘e cchiú sí, ma ancòra nun riesce a ffà chello ca sape e ppo’ fà; Ciruzzo lle servette, ô niajo (finale) ‘e primmo ajone,  ‘na palla d’oro e isso ancòra ‘na vota sbagliaje.  [Dô 71’ ZIELINSKI 6+ Facette arrepusà ‘o capitano trasenno súbbeto cu ccegna (grinta) e ttaca (energia), cupulianno (dialogando) cu Lorenzigno.]

CALLEJON[Peppe ‘a ‘nguenta] 7  Ascette chiammannose ll’applavuse doppo ‘na mubbara (partita) jucata a dritta cu ccarattere e ccegna (grinta)cunnita ‘e ll’addaffa (rete) d’’o tre a zzero doppo ca  Jones(se) ll’êv’ ancercato   (anticipato) ‘nu paro ‘e vote ascenno.[Dô 72’ ROG 6  Pochi, ma pusitive minute.]

 MERTENS[Ciruzzo] 7 Sempe presente: durante ô primmo ajone (tempo) se dette da fà comme mattunella (sponda), po ô 49’ sfruttaje ‘o rijalo ‘e Diks(o) e timbraje  ‘o cartellino; nun cuntento (70’) mannaje ‘mporta a pPeppe ‘a ‘nguenta. Buono accussí.

INSIGNE[Lorenzigno] 7,5  Me parette ca se mettette ‘a scuatra ‘ncopp’ê spalle, jucanno ‘na granna mubbara (partita)ch’isso sbluccaje cu ‘nu bbellu stuco (gol) ‘e pricisione e ccunnette cu ttanti ghiucate cunzistente, facennose nutà pure ‘nnirto (in ripiegamento).Dedicaje ll’addaffa (rete) soja ô pulaccone juto sott’ê fierre e abbuzzaje quanno Zielinski ‘mmece d’’a maglia ‘e Milik(che) lle prujette ‘a soja. Conta ‘a ‘ntenziona!

all. SARRI 7  Presentaje ‘na scuatra ca gghiucaje a mmemmoria e sta ‘mparanno a ggestiunarese (gestirsi) pure quanno ce sta ‘nu calo d’armaddia (fisico). Peccato ch’êtte fà a mmeno d’ ‘o Masto, fermato da ‘nu schiuoppeto ‘int’ê rine, ancòra ‘na vota  fove custretto a cchiammarese ‘mpanca ‘o capitano! ‘O Napule fove assaje meglio d’’o  Feyenoord(e) e sse vedette. Me piacette pure comme se ‘ncazzaje p’’o stuco (gol) pigliato.

arb. COLLUM (Scozia) 3 E ll’aggiu trattato a ‘stu sacchetto ‘e ll’ummeto ca ce niaje dduje ricure, ne rialaje uno a ll’ulandese, ce siscaje contro troppi carí (falli) ca se ‘nventaje e sistematicamente se scurdaje ‘e siscà chille ‘e ll’avverzarie nuoste. Quaccuno, ‘ntribbuna-divano  me dicette c’arbitrava a ll’ingrese; i’ dico ca arbitra e  arbitraje ‘na chiaveca!

E ccu cchesto ve saluto. Turnammo a gghiucà p’’o campiunato e ssi dDi’ vo’ ce sentimmo lunnerì ca vene doppo d’’o sibbacco (match) casalinco cu ‘o Cagliari ‘e dummeneca a ll’ora ‘e ll’apritivo e sso’ quase certo ca pozzo cuntareve bbelli cose! Staveti bbe’. R.Bracale Brak