SHAKHTAR DONETSK-NAPOLI (Ch.13/09/17) 2 A 1

SHAKHTAR DONETSK-NAPOLI (Ch.13/09/17) 2 A 1

Che collera e cche ffèle ‘mmocca ajeressera guagliù! Doppo d’’a pusitiva bbidaja  (partenza) ‘ncampiunato,c’êvemo dato ‘o punio ‘mpietto ca pure ‘nCiampionsa êssemo fatto ‘o stesso; ma chi t’’o ddà? Chi? Ajeressera turnajemo cu ‘e piede ‘nterra visto ca dâ nacchella (trasferta)  a Kharkhiv(ve) p’’o sibbacco (match) contro ô Shakhtar(ro), se turnaje cu ‘na vranca ‘e mosche mmane pe bbia ‘e  ‘na  scunfitta amara ma mmeretata, ammaturata ggià ‘int’â primm’ora  d’antraffa  (partita) ca po fenette ‘ncopp’ô doje a uno pe ll’ uccranie (ucraini), ca – passate ddoje vote ‘mmaslajo (in vantaggio) ô15' cu Taisòn(ne)e ô 57' cu Ferreyra –riuscetteno a resistere, mantenenno ‘o  maslajo  nsi’ ô 95’ doppo ca sant’Arcadio êva accurciato ‘a distanzia cu ‘nu bbellu ricore ô 71’. Ê cuane (azzurri) nun servette niente ll’izarro (assedio) tellecuso (finale) e, mannaggia ê cane ‘e canciello ffernette malamente, comme maje m’êsse aspettate. Chi nce àve itimma (colpa)? Certamente dduje o tre jucature cuane ca po ve ddico, ma ‘mprimmose  ‘o mutarribbo (l’allenatore) Sarri [4,5], ca sbagliaje ‘a furmazziona, soprattutto a ll’armidanno (centrocampo) addó se ‘nfessette a ttené ‘nu Marekiaro, ca mo comme a mmo nun se po’ gguardà, lassaje fora ‘o ‘Ncrifato, facenno jucà a  zZielinski a ‘nu pizzo ca nun è ‘o sujo i annante preferette ‘nu Lorenzigno, stracquo e ‘mpriciso, lassanno ‘mpanca ‘nu Ciruzzo, anzurro  (elemento) funnamentale! ‘Nzomma ‘o Napule sufferette  pe ttutta l’antraffa  (partita) ‘a zurea  (velocità) ‘e ll’uccranie  (ucraini) e nun riuscette maje a ffarese valé cu ‘o palleggio o ‘a qualità d’’o juoco suojo; mettimmoce po ‘a serata no ‘e Reina e ttirammo ‘o tutale spiecannoce accussí ‘o passo fauzo d’ajeressera ca arrivaje pe cchello ca v’aggiu ditto e ppecché prubbabilmente ‘e nuoste, ‘mparanza, êvano stacaffato (sottovalutato) ll’avverzario, sbaglianno ‘o najo (l'approccio) â mubbara  (alla partita) [comme già  era succieso cu ll’ Atalanta e ccu ‘o bBulogna];sperammo ca mo nun facesseno cchiú ‘sta fessaria  e ca ‘a serata d’ajera servesse ‘e lezziona! Passammo ê ppaggelle:

REINA 4  Peccato!Me dispiace, ma ll’aggi’’a dicere: serata no d’’o purtiere cuano (azzurro) ajere, purtroppo uno d’’e punte daiffe (deboli) d’’o Napule:poco tafullo (reattivo) ‘ncopp’ô primmo stuco, (gol), ‘ncopp’ô siconno  ascette addirittura a ppalomme, forze pure pecché sciuliaje e sse dimustraje ‘mpriciso e ‘mbarazzato (insicuro) n’atu paro ‘e vote! Scetate Pepe! 

HYSAJ[Meza cucchiara] 6  Uno ‘e chille ca riuscette a nnun affunnà ‘ncopp’â curzia soja e ccercaje ‘e pruponerese p’appressurà (spingere).

 ALBIOL[‘O Masto] 5,5 Serata nun troppo pusitiva p’’o masto ca, lassato sulo da ll’armidanno (centrocampo)[ca se porta ‘ncopp’â cuscienza ‘o primmo stuco (gol)]]  sufferette mo cu  fFerreyra, mo cu mMarlon(ne)   e mmo cu Taison(ne) quanno puntajeno ‘a porta; p’’o riesto sbagliaje coccosa quanno fove custretto a sustatà (impostare).  

KOULIBALY 5  Stranamente ‘o gialante ‘e culore sufferette cchiú d’’o cunzentito, nè mmigliuraje ‘ncorzo d’opera, venenno spisso futtuto ‘ntassezza (in velocità). E che saciccio, pure tu Calidú?!

GHOULAM 5,5  Se dette da fà dô primmo a ll’urdemu minuto, appressuranno (spingendo) assaje, ma sbaglianno praticamente tutte ‘e jabbre (cross).

ZIELINSKI 4,5  Custretto a gghiucà fora pusizziona soja fove ‘mpratteca ‘nu  fantasema a Kharkhiv(ve). Nun se vedette quase maje, nè annante, nè arreto e fove uno ‘e chille ca cunzentetteno ‘o primmo stuco (gol) ‘e ll’uccranie (ucraini).[dô 77’ ALLAN[‘o ‘Ncrifato] 6  Trasette comme pe spaccà ‘o munno, ma cchiú ca azzannà ê feliette ‘e ll’avverzarie nun riuscette a ffà. Però è ddiffile fà a mmeno ‘e uno accussí!] 

 DIAWARA 5  ‘A chiena i ‘a vacante; passanno ‘e minute criscette senza maje però fà cape d’angelo; purtroppo p’‘e primme minute nun se putette guardà: sbagliaje tanti daimme (appoggi) pure facile e spisso fove custretto a ccessà arreto.

HAMSIK [Marekiaro] 4 ‘E cchiú nun se mmereta! ‘E certo coccosa nun va. Ggià era stato uno d’’e cchiú ppegge cu ‘o bBulogna e ajeressera cuncedette ‘o bisse. E sSarri a fforza ‘o vo’ fà jucà; po è ccustretto a ccagnarlo.Ma va passie, Maurí!  [Dô 60’ MERTENS[Ciruzzo] 6,5 Trasuto isso i ‘o ‘Ncrifato ‘o Napule cagnaje faccia: nun sulo se jette a pprucurà ‘o ricore, ma ce pruvaje n’atu paro ‘e vote. Nun se ne po’ ffà a mmeno! ]

CALLEJON [Peppe ‘a ‘Nguenta] 5,5 Rummanette spisso fora dô juoco,e ffallette ddoje ‘o tre vvote ‘a spicialià ssoja: ‘o taglio ê spalle d’’o terzino; sperammo ‘e vederlo cchiú ppronto dummeneca ca vène.

 MILIK [sant’Arcadio] 6,5 Jucaje p’’a scuatra e mettette dinto ‘o ricore cu freddezza e ppricisione. Pure si ‘e cumpagne nun ‘o vedeno maje troppo, isso ‘e ‘na manera o n’ata segna sempe. Menu male!.

INSIGNE[ Lorenzigno] 5 Niente ‘e che: casinista e ppe nniente zincatejo (incisivo),Ajeressera lle difettaje ‘a pricisione, pure si ce mettette cegna (grinta) e vvuluntà. Peccato. Forze s’êsse arrepusà.

All. SARRI 4,5  Comme aggiu ditto sbagliaje furmazziona e ffacette tarde ‘e cagne. Troppo cumminto ‘e chello ca penza nun s’à dda ‘nfessí a ‘nchiudere ll’uocchie pe ffà jucà chi nun s’’o mmereta!

Arb.  ZWAYER terisco de Ccermania (5) Facette ‘o duvere suojo ‘a fora d’’e troppe cartelline jalizze (gialli) ca, pe ppartito pigliato,  ce appiuppaje.

E ccu cchesto ve saluto e,  si dDi’ vo’ ce sentimmo lunnerí ca vene doppo d’’o scontro ‘e dummeneca a ll’ora d’’a tiella, cu ‘o bBeneviento speranno ca ‘e guagliune cuane (azzurri) êsseno alliggeruto ‘e mmazzate pigliate ajeressera e tturnasseno a vvencere, facenno chello ca sanno fà!

Staveti bbe’!

R.Bracale Brak