SPAL – NAPOLI (23.09.17) 2 A 3 ‘A VEDETTE ACCUSSí

SPAL   – NAPOLI (23.09.17) 2 A 3

‘A VEDETTE ACCUSSí

E ppure chesta è ffatta guagliú! Tre ppunte cunquistate! E  i’ mo cche vv’aggi’ ‘a dicere? Si so’ cuntento d’’a nichemata (vittoria) d’ajere a fFerrara ‘ncasa d’’a Spal(le) addó ‘o Napule turnaje doppo justo cinquant’anne? E ddicimmo ca sí, visto ca so’ sseje ‘ncopp’a sseje ‘e mmubbare (partite) vinciute…, ma – jenno bbuono a ccèrnere ‘o sciore ‘e farina - m’attocca ‘e dicere ca ‘a nichemata (vittoria) d’ajere fove overo  sufferta, faticata e afferrata justo justo p’’e rrecchie, anze p’’e capille a ll’83’ quanno, ‘ntribbuna divano ce credevemo sul’io e nepotemo. Forze ‘o Ciuccio à depositato ‘nu marchio ‘e fraveca chiaro: sufferí, faticà,ma  nun perdere ‘a calma, ‘ntignà, stregnere ‘e diente e rriuscí a ll’urdemo purtà ‘e tre ppunte â  casa. Cumminfatte   ajere ‘mmerz’ê sseje, a ll’ora ‘e pastarella e rrusolio, ‘o Ciuccio – comme v’aggiu ditto -  doppo justo  cinquant’anne  turnaje a fFerrara contr’â Spal(le) p’’o tacatammo (l’anticipo) d‘’a sesta jurnata ‘e campiunato; ce jette da primmo ‘ncrassifica e, ccumme a ccinquant’anne fa [ddoje a uno pe nnuje cu stuche (gol ) ‘e Bosdavès(se) e Orlando...] turnaje cu ‘e tre ppunte dint’â sacca  e ‘sta vota ‘a nichemata (vittoria)  fove cchiú cauzante visto ca ce permettette ‘e rummané ‘ncimm’â crassifica a ddiciotte punte a pparo cu  ‘avecchia zoccola, anze ‘nu zico ‘a cuollo  avenno fatto 22 stuche (gol) quatto ‘e cchiú d’’e janche e nnire  e nnun ‘mporta si nuje n’âmmo pigliate cinche e lloro sulo tre! Turnammo â mubbara d’ajere e ddicimmo ca se trattaje ‘e ‘nu sibbacco (match) dicisamente cumpricato p’’e guagliune ‘e Sarri ca pe sfarma d’’a trasera (difesa) [primma Kalidú, po  Ghoulam(me) e ppo Reina] ô 13’ se truvajeno sotto pe mmano ‘e Schiattarella; Pe bbona sorta ‘nu minuto doppo ce penzaje Lorenzigno a ttruvà ‘o russimmo (pareggio) mettenno a ffrutto ‘na bbella azziona ‘e Peppe ‘a ‘nguenta dint’â muntaca (area di rigore) emigliana; però  po avettem’aspettà ‘o 72’ pe ppassà ‘nvantaggio cu Peppe ‘a ‘nguenta ca sfruttaje ‘o bbassurero (suggerimento ‘e Ghoulam(me). Fatta? Ma chi t’’o ddà? Sette minute doppo Viviani ce facette tremmà e ‘ncullabburaziona cu Reina [ca sbagliaje a ppiazzarese e  rrummanette fremmo senza fà niente facennose fottere ‘ncopp’ô palo suĵo] cu ‘nu tiro ‘e timmurria [ca pe mme nun ce steva]dô lemmeto afferraje ‘o russimmo (pareggio). Però nun fenette lla pecché a ll’83’ Ghoulam(me) se facette perdunà ‘a puttanata fatta ô 13’ e ppigliato palla a mmità ccampo s’’a purtaje nsi’ô lemmeto d’’a muntaca (area di rigiore) emigliana i ‘a lla ‘a piazzaje cu ‘nu granne diacunale a ffilo ‘e palo luntano riajalannoce ‘a sesta nichemata (vittoria)’e ‘stu campiunato e ccu ttutto ca chillu sacchetto ‘e ll’ummento ‘e ll’arbitro  senza scuorno casalinco assignaje cinche minute ‘e recupero, ce purtajemo ‘e tre ppunte â casa, tre ppunte ca però ce custajeno ‘a sbentura (infortunio) ‘e sant’Arcadio ca ce refunnette ‘o denucchio ‘e dritta e sperammo ca nun se tratta ‘e niente ‘e serio e nnun ce attocca ‘e perderlo p’ati tre o quatto mise!’Stu guaglione tene quacche sseccia ca ‘o perzeguita!... Lassammo perdere, va’... passammo ê ppaggelle:

 REINA 5  Me dispiace, ma ll’aggi’’a dicere: ajere Pepe nun me piacette: fove poco riattivo ‘ncopp’ô tiro ‘e Schiattarella e soprattutto se piazzaje malamente ‘ncopp’â timmurria (punizione) ‘e Viviani, facennose fottere ‘ncopp’ô palo suĵo!

 HYSAJ 6 – Sufferette ‘nu poco a ll’epata (fase) difenziva, però ‘ncumpenzo dette ‘na mana a cchella uffenziva ‘ncopp’â curzia ‘e dritta.  

 MAKSIMOVIĆ 5,5   Truvaje accunte scamuse e ffaticaje a mmarcà soprattutto Antenucci ca lle criaje quacche prubblema.

 KOULIBALY 5,5  Lassaje ‘ntennere ca lle mancaje ‘a cumpagnia d’’o Masto e ffove isso ca se perdette a Antenucci, lassannole dduje metre i ‘a pussibbilità ‘e fà sponna pe Schiattarella ca, lassato libbero e franco da Ghoulam(me) futtette a rReina

 GHOULAM 6,5  Se fosse mmeretato ‘e cchiú p’’e tutte ‘e ccorze soje ‘ncopp’â curzia ‘e mancina, pe ll’jusaida (assist) d’’o doje a uno ‘e Peppe ‘a ‘nguenta e soprattutto pe ll’addaffa (rete) ca decitette a ll’83’ ‘o sibbacco (match), ma nun lle pozzo perdunà d’esserse perzo a Schiattarella ‘nnaccosione ‘e ll’uno a zzero ‘e ll’emigliane.

 ZIELINSKI 5,5 – No, nun fove isso! Sbagliaje cchiú ‘e ‘nu pasiglio (passaggio) e nun sempe facette  ‘a cosa justa, ô mumento justo: ‘nzomma  nun riuscette a ffarese apprezzà, comme ‘mmece succere quanno trase dâ panca. [Dô 70'  MILIK 5,5  Trasette e pparette ca ‘o Napule fósse cchiú uffenzivo e ppericuluso, ma lle capitaje ‘e sbaglià dduje stuche (gol) ‘nnante ô purtiere, fallenno ‘a mira; pe gghionta ‘e ruotolo lle ‘ntravenette po ‘a sbentura (infortunio) ô denucchio e ascette chiagnenno dô campo! Facite ‘o bbenericere!!!]

 DIAWARA 5,5  Ajere fóse stata ll’accasiona soja, ma ‘o guaglione nun cacciaje fora nè ‘a sciacchesía (carattere) nè ‘a perzunalità ssoje esaggeranno cu quacche gghiucata inutile e ddimustrannose troppo bbatí (lento) quanno êtt’’a fà partí ll’azziona: ‘nzomma se sentette ‘a mancanza ‘e Giorgigno ‘mmiez’ô campo!  

HAMSIK[Marekiaro] 5,5  Nun dico ‘e no; pure ajere ce mettette ‘a bbona vuluntà, ma nun avastaje: ‘e gghiucate foveno poco prise e p’’o capitano nun fove cosa ‘e truvà n’addaffa (rete); pure ajere Sarri ll’êtte’a fà ascí facenno trasí n’ato! [Dô  ALLAN [‘o ‘Ncrifato] 6,5  Sarri se ll’êsse sparagnato pe mmarterí ca vene p’’o sibbacco (match) ‘e Ciampionsa contro a ll’ulandese d’’o Feyenoord(o), ma fove custretto ffarelo trasí e isso se dètte da fà dànno ô Napule assaje cchiú cegna (grinta) e mmuvimento mo attaccanno e mmo difennenno.]

 CALLEJÓN[Peppe ‘a ‘nguenta] 7 ê vvote se jette annascunnenno, ma quanno se facette vedé fove sempe dicisivo comme a cquanno ô 14’ mettette ‘ncundizziona Lorenzigno ‘e signà sfruttanno ‘na bbella azziona soja  dint’â muntaca (area di rigore) emigliana o comme a cquanno ô 72’ sfruttaje ‘o bbassurero (suggerimento ‘e Ghoulam(me) e cce purtaje ‘nvantaggio. A pparte po ‘a valiosa (preziosa) fatica fatta ‘nnante quanno ascette Ciruzzo.    

MERTENS [Ciruzzo] 5,5  Tène quacche ppappace ‘ncampo ca nun ‘o fa essere isso; ajere nun me piacette troppo: avette quacche accasione, ma nun ‘a sfruttaje; zampettaje cca e lla senza cunchiurere... che peccato! [Dô 76'  ROG [‘a bbelva ] 5,5 Troppo jellato! Manco era trasuto ca chillu nnacchennello ‘e Mariani lle siscaje contro, pe ‘nu nurmale cuntrasto ‘e spalla,  ‘na timmurria ca nun ce steva, ma ca ce custaje ‘o doje a ddoje ‘e  Viviani.].

INSIGNE[Lorenzigno] 6,5   Miezu zfo (voto) mancante pecché se dètte assaje ‘a fà sulo  durante ô primmo ajone i ‘a perna soja fove chillu stuco (gol) ca ô 14’ ce dette súbbeto ‘o mumentaneo russimmo (pareggio). Se jette pure a ccercà ‘nu ricore, ca tutte ll’avesseno dato, ma no Mariani nun ce ‘o dette, anze ‘o nutizziaje pe mmuacca (simulazione) d’’a sora monaca!  Se ne scennette ‘e posa  a ll’arrancua (nella ripresa)

All. SARRI 6,5  Se vincette i avette raggiona, ma cierte ppedine scivete, p’’o rutizzio (turnover) nicessario nun dètteno ‘a risposta justa: Diawara e Zielinski nun piacetteno nè a mme, nè ‘ntribbuna-divano; êsse fatto meglio pure a llassà ‘mpanca a cCiruzzo facennolo risciatà, anze fósse bbuono si cercasse d’appurà che lle passa p’’a capa; azzeccaje però ‘e cagne cu ‘o ‘Ncrifato e sant’Arcadio ca lle detteno cchiú jajavía (brio).

Arb. MARIANI i ‘a chenca soja 4 Aggiu visto poche arbitre accussí casalinche comme a   ‘stu sacchetto ‘e ll’ummeto rumano ca ajere siscaje sempe, pe ppartito pigliato, contro ‘e cuane (azzurri) [ajere cu ‘na fetenta  jettatoria muntazzimma (divisa) blu-savoja...] nsi’ a nnijà a lLorenzigno ‘nu ricore sacrusanto nutizziannolo, pe sfreggio, pure pe mmuacca (simulazione)... Cose ‘e pazze.

E ccu cchesto ve saluto dànnove appuntamento, si dDi’ vo’ a mmiercurí ca vene doppo d’’o sibbacco (match)’e Ciampionsa ô san Paolo contro a ll’ulandese d’’o Feyenoord(o) e accuminciammo a ffà corne!’Ncunchiusione,  p’’a mubbara (partita) d’ajere se rusecasseno ‘stu fenucchio chille ca parlano ‘e mazzo pecché i’ ve dico ‘int’â vita è ttutto ‘na quistione ‘e mazzo: o ‘o tiene, o t’’o fanno e ffósse ora ca ‘o tenessemo pure nuje!

Staveti bbe’ R.Bracale Brak