GENOA – NAPOLI 25/10/17 2 A 3 ‘A VEDETTE ACCUSSÍ

GENOA – NAPOLI 25/10/17 2 A 3

‘A VEDETTE ACCUSSÍ

Che tensione, guagliú chella  partita d’ajeressera e nnun sapevo comme ammusciarla: nun fumo cchiú,nè me magno ll’ógne ‘a paricchie  anne,  nun ne pozzo magnà nè ccaramelle, nè ati spasse pe vvia ‘e quacche mmalatia   e ppe gghionta ‘e ruotolo ‘ntribbune divano steva ‘nu poco ‘e sciachinno (scetticismo) e rrumanette sulo a ppenà e sperà . Sinamparco(comunque) rusecannome rusecannome ‘o steccadente  me sceruppaje  ‘nu primmo aione (primo tempo)ca ggià ô 4’ ce vedette ‘nsotto pe bbia ‘e ‘na fessaria  d’’o Meza Cucchiara e dde Ghoulamme ca ‘nchietta permettetteno  a tTaarabt(e) ‘e signà, ‘o primmo sbaglianno ll’attasallulo (fuorigioco) i ‘o siconno addirittura perdennoselo; però po ggià sott’â mezora ‘e juoco Ciruzzo mettette ‘e ccose a pposto, apprimma [14’]dànnoce ‘o russimmo (pareggio) e ppo [30’] caputianno ‘o natiggia (risultato)cu n’addaffa (rete) ca lassaje senza parole pure a cchillu mammalucco ‘e ll’ armujllacco (telecronista) ‘e SKY; nun cuntento Ciruzzo cumpletaje ll’opera  a   ll’arrancua (ripresa)   quanno ô 60’ facette 'o terzo e cce dètte ‘na mmeretata nichemata (vittoria)!Da chillu mumento accumminciajeno però ‘e turiminte ‘e panza, dàtose ca chella mmunnezza ‘e Mazzoleni ô 76’ se ‘mmentaje ‘na timmurria (punizione) ca nun ce steva contro a nnuje  e ‘int’ô bburdello ca nne derivaje pigliajemo ‘a siconna addaffa(rete) e nsi’ ô 93’ fove tutta ‘na parpetazzione ‘e core, ma po – senz’ati ‘mpicce   se sciugliette ‘a ‘rolia, fernette bbuono , se vincette signannone tre, ce turnajemo a ppiglià ‘a cimma d’’a crassifica  e i’ sulo sulo fistiggiaje cu ddoje dete ‘e Strega...E  ccrediteme ca ce vuleva, pecché nun se puteva proprio vedé ‘a scuatra ‘e chillu prozo sfunnato ‘e Spalletti ô posto nuosto! E dd’’a nichemeta (vittoria) d’ajeressera êttem’’a dicere: “Grazzie!” a cCiruzzo ca decidette ‘e vencere e nne facette tre [14’,30’ e 60’] e ttre foveno pure si SKY   e cchille ca lle jetteno appriesso ce nn’assignajeno sulo dduje dicenno ca ‘o terzo era stato ô 60' nu daffimarma (autogol)  ‘e Zukanoviccio. Ma qua’ daffimarma d’’a sora?!State a ssentere: quanno Ciruzzo scuccaje ‘o càtaro (diagonale), ‘a palla comme partette accussí trasette ‘mporta senza Zukanoviccio ‘a spustasse manco ‘e tanto, manco ‘e ‘nu centimetro. Pirciò nun ce scassate ‘o saciccio: Ciruzzo ne facette tre e ttre ce nn’avite assignà, comme à fatto ‘a RAI!

Passammo ê ppaggelle:

REINA 7,5 – Bravo soprattutto quanno repuzaje (respinse) cu ‘e piere  ‘nu  tentativo di Lazoviccio, spurcato ‘a Koulibalý; nun tenette  respunzabbilità ‘ncoppa nnisciuna d’’e ddoje addaffe (reti) d’’e genuane. P’’o riesto urdinaria amministrazziona.  

HYSAJ [Meza cucchiara] 6 ‘A chiena i ‘a vacante: apprimma nun mantenette ‘a pusizziona e nun mettette Taarabt(e) ‘nnattasallulo (in fuorigioco), po a nniajo (finale) e primmo ajone (primo tempo) poco mancaje ca nun rijalasse  ‘a palla d’’o doje a ddoje a Lazoviccio cu ‘na grossa fessaria; meglio quanno se trattaje d’appressurà (spingere)ca fove prupusitivo e gghiette vicino ô stuco (gol). E cchesto va pe cchello.

CHIRICHES[‘o Vampiro]  6,5 Stancoô niajo (finale) sulo   Lapadula lle dette quacche prubblema, pecché, p’’o riesto,  me piacette; nun sbagliaje quase niente facennose valé cu pperzunalità e ssicurtà  (sicurezza).

KOULIBALY 6  Sulo ô pprincipio êsse avuto stà cchiú attiento e ccercà  ‘e dà ‘na mana a gGhoulamme pe bbluccà  a tTaarabte e nun ‘o ffacette; però po migliuraje durante ô sibbacco (match) i ô niajo (finale) salvaje ‘ncopp’a lLapadula.

GHOULAM 6  Arma uffenziva ‘e cchiú pure dâ bannerella, se facette apprezzà pe ccomme appressuraje (spinse) ‘ncopp’â curzia. Però quanno avette ‘a difennere jette ‘int’ê chiavette allimmeno ddoje vote: ô 4’ quanno se perdette a tTaarabte e ppo ô 76’ quanno  Rigoni ‘o futtette  servenno a Izzo ‘a palla d’’o doje a ttre! Peccato.

ZIELINSKI 6 Pure isso fove assaje pulitelico (prezioso) p’’o juoco cuano(azzurro) e pp’’o Napule: forze poco mubbarajo (appariscente), ma participaje ô zarrabbuo  (palleggio), dànno ‘na mano arreto o annante.

DIAWARA 7  atalossa (prestazione) muibba (magnifica) d’’o guaglione: jucanno annante â trasera (difesa) nun perdette pallunne, jucanno semprice e dànno sicurtà ê cumpagne; nun facette mancà quacche bbassurero (suggerimento) comme a cchillu lanzo capolavoro ca Ciruzzo facette addeventà ‘o doje a uno cu ‘nu miraculo!  

HAMSIK[Marekiaro] 6,5  ‘O capitano cupuliaje a mmestiere cu lLorenzigno  e se ‘nzertaje  (inserí) cuntinuamente, ascio (vivace),nascitto  (attivo), vuliuso ‘e farese nutà; peccato ca  ancòra però  fove poco priciso ‘a luntano sparacchianno fora,e ‘int’a ll’azziona d’’o doje a ttre nun stette cu ll’uocchie apierte. [Da ll'81' ALLAN[‘o ‘ncrifato] 6 trasette e azzannaje cchiú ‘e ‘nu felietto. ]

CALLEJON[Peppe ‘a ‘nguenta]  6- Nun me ‘ncantaje: si levammo ‘nu paro ‘e jucate ‘nchietta cu ‘o Meza cucchiara fove ‘o meno pusitivo lla ‘nnante e nnun ce scurdammo ca ‘int’â muntaca (area di rigore) perdette ‘o tiempo pe ttirà ‘mporta sciupanno ‘na bbona accasione. E cche ccacchio!! [dô 71' ROG[‘a bbelva] 6  Trasette e sse facette apprezzà pur’isso dànnose da fà ‘int’ô ‘nfucato niajo (finale)Mazzoleni nun mancaje ‘e nutizziarlo (ammonirlo). S’’o mmeretaje, ma  quanno ce vo’, ce vo’!]

MERTENS [Ciruzzo] 9,5  Jucaje ‘na granne sibbacco (match)signanno tre addaffe (reti) una cchiú bbella e’e n’ata. Ch’ ato lle se po’ addimannà?

INSIGNE[Lorenzigno] 7  Peccato ca cu ‘e tanti tire ca facette da ògne pparte nun lle riuscette ‘e truvà ‘o stuco(gol) ch’êsse cunnito a dduvere, mettenno ‘a jonta  ê ttanti bbelli ghiucate fatte e ppure a ll’jusaida (assist) d’’o terza addaffa (rete). [dô 90'  GIACCHERINI s.v.Me sto’ spianno ancòra che trasette a ffà!]

All.SARRI 6,5  Se sufferette ‘nu poco ô niajo (finale),ma   vincette, comm’era nicessario jucanno ancòra ‘na vota a mmemmoria e cchile lla [ ‘o Vampiro  e  dDiawara.] mise ‘ncampo ô posto d’’e titulare   lle dètteno suddisfazziona; ‘ncarraje pure a ffà trasí ‘o Ncrifato i ‘a bbelva.

Arb. MAZZOLENI 4 ‘Stu coso curiuso ‘e ‘na manera o n’ata ce à dda sempe rompere ‘o pasticciotto; ajeressera ‘o facette siscanno, pe ppartito pigliato, sempe contro a nnuje e soprattutto cu cchella timmurria (punuzione) ca se ‘mmentaje e ca ce custaje ‘a siconna addaffa…, ma s’avette ‘a fa dint’ê rrecchie pecché ‘o Napule vincette ô stesso â faccia soja ‘e Spalletti, d’’a vecchia zoccola e dde chi ce vo’ male!

Fermammoce cca. E ssi dDi’ vo’ ce dammo appuntamento a llunnerí ca vene  doppo d’’a mubbara (partita) casalinca ‘e dummeneca vintinove  contr’ô Sassuolo, n’ata scuatra  assineja (satellite) d’’a vecchia zoccola. Raggiona ‘e cchiú pe scardarle ‘e ccorne... E ce   ll’âmm’’a scardà, guagliú! Assulutamente.

Staveti bbe’ R.Bracale Brak