MANCHESTER – NAPOLI ( ciampionsa 17.10.17) 2 A 1 ‘A VEDETTE ACCUSSÍ

MANCHESTER – NAPOLI  ( ciampionsa 17.10.17) 2 A 1

‘A VEDETTE ACCUSSÍ

E i’ mo che ve pozzo dicere guagliú? Sulo ca tengo ‘o vveleno nfi’ a ‘mpont’ô musso pecché ‘a delusione p’’a scunfitta d’ajeressera a mManchester(re) fove grossa, grossa assaje. ‘O ssaccio ca pe nnuje ‘a ciampionsa è ssulo ‘nu spassatiempo, ma nun se po’ gghí ‘nnacchella (in trasferta) a rrijalà bbuone trenta minute ‘e juoco a ll’avverzarie e ddeciderse a gghiucà sí e nno a ll’arrancua (ripresa), pecché è nnaturale ca, si uno ce mette cchiú ‘e vinte minute pe ppiglià ‘a mesura ‘e ll’avverzarie, lloro n’appruffitano e appena ànno ‘o pere a ll’evera te casticano cchiú ‘e ‘na vota, comme succedette ajeressera  ca ‘ncapo ‘e quinnece minute ggià stevemo ‘nsotta ‘e doje addaffe (reti), una cchiú ffessa ‘e n’ata  e ddoppo d’avé falluto cu Ciruzzo ‘nu ricore[ca s’era abbuscato ‘o Masto] ce decidettemo a gghiucà sulo  dô  33°ascenno sí a ccapa auta  dô statio ‘ngrese, ma cu ttante e ttante  mutatunne (recriminazioni) p’avé cuncesso ‘a primma mez’ora ô City, p’avé sciupate troppi accasione e pp’avé rijalato ê padrune ‘e case dduje jucature [‘mprimmose Marekiaro e ppo Zielinski ca facceteno a cchi sbagliava cchiú assaje]; menu male ca po a ll’arrancua ‘e cuane (azzurri) turnajeno ‘ncampo cu n’ata capa, dicise a nnun mullà  e ccunvinte ca se fósse pututo adderezzà ‘a varca russimanno (pareggiando) e ccumminfatte spaventajeno ‘o City, ma cchiú ‘e arapí n’ata vota ‘o trascurzo cu  dDiawara ô 73’ [cu n’atu ricore ca s’abbuscaje Ghoulamme] nun riuscetteno a ffà e a ll’urdemo ce restajeno sulo, comme v’aggiu ditto tanti  mutatunne (rimpianti) pe ‘na scunfitta ca se fósse pututa scanzà.Cunzulammoce cu ‘a speranza ca, comme po dicetteno tanti pennarule, ô san Paolo ‘a facenna d’’a cualificazziona se po’ adderezzà. E ssí, dicimmo ca s’adderizza pure si pe mme ‘a ciampionsa rummane  sulo ‘nu spassatiempo i à dda cuntà assaje ‘e cchiú ‘o campiunato! Passammo ê ppaggelle:

REINA 6,5   Nun tenette niscina itimma (colpa)’ncoppa ll’addaffe (reti) pigliate e pp’’o riesto riuscette a ffermà ògne atu tentativo d’’e ‘ngrese cu ttanti pparate e rispinte ‘ndivinate.

HYSAJ[Meza cucchiara] 5  Atalossa (prestazione) poco suddisfacente; dâ parta soja   Silva e Sané jetteno a ccarna e mmaccarune. Peccato! [Dô 70’  MAGGIO 5,5  ‘nu poco meglio d’’o Meza cucchiara, ma pur’ isso  jette ‘int’ê chiavette cu ‘a tassezza (velocità) ‘e Sané.]

ALBIOL[‘O Masto] 5,5  Sufferette p’’e primme vinte minute e nnun riuscette,arapenno ‘o cumpasso, a ‘ntercettà ‘a palla ca addeventaje ‘a siconda addaffa (rete) d’’o City, ma po migliuraje mettenno quacche pezza cca e lla e, sciso ‘nnante,  se jette a abbuscà ‘nu ricore a ffavore, ma Ciruzzo ‘o sciupaje. Che peccato!  

KOULIBALY 6   Salvaje ‘ncopp’â linia ‘nu stuco (gol) e cchesto lle fa abbuscà miezu zifo (voto) ‘e cchiú però tenette ‘ncopp’â cuscienza ‘a primma addaffa (rete) ‘ngrese quanno  ‘ncuollo a  vWalker(re) repuzaje  (respinse) a bbienetenne e , pe mmità cu ‘o Masto,  tenette ‘ncopp’â cuscienza pure ‘a siconna avenno rummanuto libbero e ffranco a gGabriel Jesus(se) a ‘nu passo dâ porta. ‘Sti ccose nun se fanno pe nnisciunu mutivo!

GHOULAM 7  ‘Na furia ‘ncopp’â curzia mancina; ce rijalaje ‘na ‘ncurzione ‘int’â muntaca (area di rigore)’ngrese abbuscannose ‘o ricore ca Diawara mettette dinto. Sperammo ca se decidono a mmetterese d’accordo p’’o cuntratto ca sta pe scadé; fósse ‘nu peccato a pperderlo... e ppe nniente! 

ZIELINSKI 4,5  Ajeressera, niente nun me piacetteSbagliaje troppi pasiglie (passaggi) e  nun lle riuscetteno ‘e ccose cchiú ffacile. Paura? Po’ essere!

DIAWARA 6,5  È gguaglione, ma sta criscenno bbuono!Dint’ô mumento cchiú ddellicato se pigliaje ‘a respunzabbilità ‘e appresentarese a ttirà ‘o ricore ca mettette dinto cu ffreddezza e ppricisione. P’’o riesto nun sbagliaje quase niente andivinanno cchiú d’’o 95% d’’e pasiglie (passaggi).

HAMSIK[Marekiaro] 4,5 E ll’aggiu trattato:Venette meno proprio ‘int’ô sibbacco (match) ‘e cartiello! E cche saciccio! sbagliaje quase  tutte ‘e pasiglie (passaggi) e nnun se prupunette ‘nnante; chella grama vota ca ‘o ffacette   fallette ll’addaffa (rete) ch’êsse pututa essere funnamentale. Sarri s’’o chiammaje ‘mpanca troppo tarde! [Dô 78’ OUNAS 6 ‘e stima, ma trasette tarde pe ffà coccosa! ]

CALLEJON [Peppe ‘a ‘nguenta] 5,5  Dètte sí ‘na mana arreto, ma êss’ avut’’a farese vedé pure annante e nnun ‘o ffacette!

 MERTENS[Ciruzzo] 4,5 Me dispiace, ma ‘e cchiú nun pozzo metterle; ajeressera nun ne ‘ncarraje una; ‘o ricore sbagliato [nun se tira  centralmente senza aizà ‘a palla cunzentenno ô purtiere ca ggià sta ‘nterra ‘e ‘ntercettà cu ‘e piere; se tira forte e a mmeza aldezza!] ch’êsse pututo arapí n’ata vota ‘o sibbacco (match) durante ô primmo ajone (tempo), ‘o cundizziunaje facennolo sciupà cchiú ‘e ‘na bbona accasione a ll’arrancua. Peccato; sperammo ca se repiglia pe ssapato ‘ncampiunato. 

INSIGNE[Lorenzigno] 5,5  Durante â primma mez’ora fove ll’unico a ccercà ‘e rijalà quacche ccosa, ma nisciuno ‘o dette ‘na mana o ll’accumpagnaje e nnun riuscette a ddà sustanza a ll’azziona soja; pe gghionta ‘e ruotolo êtt’ ‘ascí tuccannose ll’anguinaglia e ffacennoce preoccupà pe sàpato ca vene. Facimmo corne! [Dô 57’ ALLAN[‘O ‘Ncrifato] 6,5 Trasut’isso ‘o Napule cagnaje faccia migliurannose.Êss’ avut’’a jucà dô primmo minuto ‘nzieme a Bbelva i facenno a mmeno ‘e ‘nu Marekiaro e de ‘nu  zZielinsk ca nun foveno lloro!]

All. SARRI 5,5   Se perdette e nnun pozzo darele ‘e cchiú; tenette ll’itimme (colpe) soje p’avé scivito Marekiaro tenenne ‘mpanca ‘o ‘Nrifato. Forze à sciveto pur’isso ‘o campiunato; nun fa niente, anze meglio accussí! 

Arb. LAHOZ (Spagna)5,5 Facette quase tutto ‘o duvere suĵo, ma sbagliaje  pecché êss’avut’ ‘a caccià fora ‘ô capitano d’’o City ca jucaje a ffà male cu ccapate e gguvetate ‘ncanna e  ‘mmece isso nun ‘o nutizziaje (ammoní) nemmanco!

Efermammoce cca. ‘O spassatiempo d’’a Ciampionsa, p’’o mumento, mettimmolo a parte e tturnammo a ppenzà ê fatte cchiú ‘mpurtante, ô campiunato: sapato ô san Paolo arriva ‘a scuatra ‘e chillu prozo sfunnato ‘e Spalletti, ma nun voglio sentí raggione: s’à dda turnà a vvencere. I accussí spero ‘e cuntareve, si dDi’ vo’ dummeneca ca vene! Ciuccio fa’ tu! Statevi bbe’. R. Bracale Brak