ROMA – NAPOLI (14.10.17) 0 - 1 ‘A VEDETTE ACCUSSÍ

ROMA – NAPOLI  (14.10.17) 0 - 1

‘A VEDETTE  ACCUSSÍ

 Sfugliatelle, cannuole, pastiere e sciampagna guagliú!Canta Napule,  Napule primmo ‘ncrassifica cu vvintiquatte punte dàtose ca, cu cchella d’ajere a ll’ulimpico rumanese,songo otto ‘ncopp’a otto ‘e mmubbare (partite) vinciute dô pprincipio ‘e campiunato. Si, comme s’era ditto, chillo d’ajeressera era ‘o sibbacco (match) cchiú ccumplicato e n’esame ‘e nadija  (maturità) putimmo sulo essere cuntente d’’o Ciuccio e dde chello ca facette vincenno, strignenno ‘e diente e ppurtannose â casa tre ppunte ca nne valetteno seje visto ca ê sseje, pe pparta soja, Ciro Immobbile ce ll’aveva miso a cchillu servizzio a Allegri e ssocie stennenno cu ddoje addaffe (reti) ‘a vecchia zoccola   lla addó essa vinceva sempe cosa ca ce cunzentette d’allungà ‘o passo ‘ncimma â crassifica facenno ‘a lepera e vvulanno a cchiú ccinche ‘ncopp’â vecchia zoccola, Lazzio e Interre [aspettanno ‘o scontro milanese cu ‘o Milanno]. Vedimmo ‘a vicino ‘e fatte d’ajeressera: ‘O Napule passaje (ô 20’) pure a rRoma cu ‘nu stuco (gol)’e Lorenzigno i ‘a scuatra ‘e Sarri vincette cu granna tarajeja (pragmatismo) d’’o primmo ajone e ‘nu pizzeco ‘e culo [quanno ce vo’, ce vo’!...]a ll’arrancua, quanno nè   Fazio nè Dzeko riuscetteno a ttruvà ‘o russimmo (pareggio) e ll’abbastaje ‘e mettere a ffrutto ‘nu rijalo ‘e De Rossi ca mettette ‘ncundizzione ‘o frattese ‘e fottere a  Allisson(ne). Certo se fósse pututo pure signà ‘e cchiú, ma ‘nu poco ‘o purtiere rumanese ca fermaje ‘nu paro ‘e vote ‘e nuoste, ‘nu poco ‘nu ricore sacrusato nijato a cCiruzzo c’êttem’’a cuntentà ‘e vencere sulo uno a zzero, però ‘o spettaculo fove bello cu ‘nu  Napule ca  quanno sagliette dette ‘a ‘mpressione ‘e spannerse a mmachia d’uoglio cu mmuvimente tutte ‘ndivinate e ddicimmo pure matàle (perfetti), soprattutto chille d’’e mediane ca cupretteno e bluccajeno a mmestiere tutte ‘e ppussibbile linie ‘e pasiglio (passaggio) ascenno dâ pressione  (pressing) e ‘mpedenno ca ‘e rumanise putesseno metterce ‘mpericulo. ‘Nzomma, tutto summato ‘a scuatra dimustraje granna nadija  (maturità) e ppirciò i’ dico ca ce avimm’’a crerere pecché overo chesta po’ essere ‘a vota bbona!

Passammo ê ppaggelle:

REINA 8 Ô 70’ vulaje pe ffermà ‘na fremma  cabbesera (colpo di testa) ‘e  Fazio, mettenno ‘a palla ‘nfacci’ô palo e ‘sta cosa, credetime,  valette  quanto e comme n’addaffa (rete) pecché salvaje ‘o risultato; ‘nzomma ‘na parata sensazziunale, quase come a cchella d’’a tempurata (stagione) passata pe ffermà ‘nu tiro ‘e  Perotti.P’’o riesto  sempe attiento,pure ô nijajo  (finale) ‘ncopp’a  Underre.

HYSAJ 6 Calmo e udú (tranquillo)facette ‘e ccose juste, senza fà fessarie, guvernanno ‘a curzia soja e ssulo  raramente, soprattutto ô primmo ajone (nel primo tempo), lassaje  a pPerotti ‘a pussibilità d’’o puntà, sempe però senza cunsequenzie.

ALBIOL[‘o Masto] 7  Manco ‘nu sfregazzo (sbavatura) p’’o Masto ca nun mullaje nisciuno,  spisso tacatammanno (anticipando) ll’avverzario ‘e turno e ffurmanno cu ‘o cumpagno ‘e sezziona (reparto) ‘na chietta (coppia) ‘nzuperabbile.  

KOULIBALY 7 – Comme ô Masto nun perdette ‘nu colpo mettenno ‘a musarola a Dzeko e ffacette tutto ‘o ppussibbile e dde cchiú cu ll’armaddia i ‘a tacnía ( fisico e tecnica), tenenno ‘e rumanise luntane dâ porta nosta; nurmale ca  êtt’’a faticà ‘e cchiú a ll’arrancua (ripresa), ma fove sempe ‘na trancara  (muraglia).  

GHOULAM 6 Sulo ‘nu paro ‘e vote se facette zumpà ‘a Bruno Peres(so), ma p’’o riesto daimmaje (sostenne) ll’azzione ‘e Lorenzigno e ffove isso ca accumminciaje chella ca ce  purtaje ‘nvantaggio.  

ALLAN 6,5 - Quantità e cqualità , armaddia e  ttacnía ( fisico e tecnica),  p’’o  brasiliano, allimento (elemento) assenziale pe ll’armidanno luvardo  (centrocampo azzurro).

JORGINHO 6,5 – Bindulalaica  (metronomo) ‘e  ll’armidanno luvardo  (centrocampo azzurro).) tuccaje tante e ttante pallune nun sbaglianno quase niente.Peccato pe cchillu cartellino jalizzo (giallo) ô nijajo  (finale) d’’o primmo ajone     (primo tempo )[  Dô 73' DIAWARA 6 Facette ‘o ssuĵo pure senza lassà masarre (tracce) d’essere trasuto.]

HAMSIK[Marekiaro] 6  Niente ‘e cchiú’e dà ‘na mana pe mettere ‘nzieme ll’arencabbutta (ragnatela) ‘e sarfe (scambi) e ppasiglie (passaggi) ca ‘mpriggiunajeno ‘a Roma; lle capitaje ‘a palla bbona p’’o doje a zzero e nnun ‘a sfruttaje. Peccato! [Dô 71' ZIELINSKI 6 Trasette dànno frischezza a ll’armidanno (centrocampo). ]

CALLEJON [Peppe ‘a ‘nguenta ] 6- êsse pututo fà ‘e cchiú, ma ajeressera, pure prupunennose e ttaglianno spisso nun lle riuscette ‘e ‘ntennerse cu ‘e cumpagne e ffove ‘o meno ‘mpalla d’’e tre nassie (attaccanti) [da ll'82' ROG[‘a Bbelva] 6 ‘e stima, ma trasette troppo tarde pe ffà ‘e cchiú]

MERTENS[Ciruzzo] 6,5 Fove ‘na   spina ‘int’ô scianco rumaniso e ddètte sempe apprietto (fastidio). Nun truvaje ‘o stuco (gol), ma fove sempe ‘nu periculo e ggià durante ô primmo ajone lle fósse attuccato ‘nu ricore a ffavore quanno Manolas(so) ‘int’â muntaca (area di rigore) d’’e pecurare lle scarpesaje ‘nu pere menannolo ‘nterra, ma Rocchi i ‘a chenca soja[4] nun vuletteno  vedé niente! Peccato êsse pututo aumentà ‘a ganimma (bottino) d’addaffe  (reti).Sperammo ca ‘o ffà cu ll’Interre!

INSIGNE[Lorenzigno] 7  Fove ‘a soja ll’addaffa (rete) ca ajeressera rijalaje ô Napule ll’uttava nichemeta (vittoria) cunzecutiva.Se trattaje ‘e ‘nu  stuco (gol) ‘mpurtante,  nummero 100 d’’o frattese cu ‘a maglia luvarda (azzurra) e dduicientesimo d’’o Napule ‘e Sarri. Friddo ‘nnante â porta e ‘nteliggente pe ccomme ggestiunaje (gestí) ‘e pallune; peccato ca nun sfruttaje quacch’ata accasione capitata perdenno ‘a furza (opportunità) ‘e mutaiaffà (raddoppiare).

All. Maurizio SARRI 7  Cu ttutto ca nun signaje cchiú ‘e ‘nu stuco (gol) ‘a scuatra se facette valé dimustranno, finalmente!, ‘e tené pure ‘a nadija (maturità) ‘e se purtà â casa cierti mubbare (partite) sconceche!

arbitro [i ‘a chenca soja]: Rocchi (4) e ll’aggiu trattato a ‘stu fiorentino, muto, surdo e ccecato  ca nijaje ‘nu ricore sacrusanto a cCiruzzo e  cce siscaje sempe contro pe ppartito pigliato!

E fermammoce cca, pure cu ‘a sciampagna d’’e fistiggiamente, credimmoce e ggià sàpato ca vene cumfermammo chille ca simmo quanno ô san Paolo  scenne ll’Interre ‘e chella faccia ‘e cestunia arruzzenuta ‘e Luciano Spalletti, accussí spero ca, si dDi’ vo’, dummeneca ca vene ve pozzo cuntà bboni ccose. Staveti bbe’.

R.Bracale Brak