NAPOLI - SHAKHTAR DONETSK (Ch.21/11/17) 3 A 0 ‘A VEDETTE ACCUSSÍ

NAPOLI - SHAKHTAR DONETSK (Ch.21/11/17) 3 A 0

‘A VEDETTE ACCUSSÍ

N’ata nichemata (vittoria) guagliú, n’ata suddisfazziona ca  ‘o Ciuccio ce dètte ajeressera ô san Paolo, addó vattenne ll’ucraíne, se levaje e cce  levaje, cu ‘e ‘nteresse, ‘e pacchere ‘a faccia d’’a scunfitta pe ddoje a uno ‘e ll’ addabba (andata), ma mo nun saccio proprio dicerve si d’‘a   nichemata (vittoria) d’ajeressera âmm’’a essere cuntente o no e cchesto pecché vincenno, forze ‘o Napule cuntinua ‘o cammino ‘nCiampionsa, cosa ca pe ccerto fa piacere  a dDela, ca penza a cchello ca po’ metterese dint’ô vurzillo,mentr’i’   vulesse ca ‘a scuatra nun se stancasse troppo e penzasse a nnun perdere ‘e vista chillu trianculillo janco russo e vverde can un vincimmo ‘a troppu tiempo,ma nun voglio chiammarme ‘e ddisgrazzie ‘ncuollo e ppirciò dico ca âmm’’a essere cuntente d’’a  nichemata (vittoria) d’ajeressera e ppo succede chello ch’à dda succerere, meglio vencere ca pattà o perdere!

E ajeressera se vincette pecché doppo ‘nu primmo ajone (primo tempo) sbeteco, senza zuco e ccunnimma, soprattutto pecché quaccuno (e ppo ve dico) nun stette ‘e ggenio  e sse facette ‘e cacchie suoje senza partecipà ô juoco, a ll’arrancua cagnaje musica i ‘o Napule turnaje ‘ncampo cu n’ata capa diciso a ttirà ‘o capo ‘nterra i a rrisolvere ô mmeglio ‘a brica (sfida) e ggià ô 56’ Lorenzigno mettette ‘e ccose ‘nchiaro mannanno ‘int’ô sette mancino ‘na palla cu ssette parme ‘e sacicce; da chillu mumento ‘ncampo ce fove ‘na scuatra sola, ‘o Napule, e vvenette nurmale ca casticasse ll’ucraíne  n’ati ddoje vote: a ll’81’ cu Zielinski e a ll’83’ cu Ciruzzo, mannannone â casa lloro chiagnenno chilli piecure curdische ‘e ll’ucraíni ca pe tutta ‘o sibbacco (match) jucajeno a ffà male cu ttrasute assassine ‘ncuoll’ê cuane (azzurri).’Ncunchiusione se vincette largo comme ce mmeretajemo â faccia ‘e chi ce vo’ male e nne so’ ttante, accumincianno da chillu strunzo cu ‘a  nocca d’ Alisandro Antinelli, ca nunn’ aggio appurato chi ‘o veste â matina e ppecché! Però chisto è n’atu trascurzo; lassammo perdere e  ppassammo ê ppaggelle:

 REINA 7  E s’’o mmereta tutto pecché è overo ca a ll’arrancua nun êtte ‘a fà niente e se facette nutà sulo currenno a assuccià cu ‘nu curdisco ucraíno ch’êva stiso ‘nu cuano (azzurro) a ,mmità ccampo, cercanno ‘e struppiarlo, ma durante ô orimmo ajone (nel primo tempo) facette ddoje bbelli pparate,mantenenno ‘a porta acrata (inviolata),attiento e ppronto comme fove ‘ncopp’ a dduje tire periculuse, primma ‘e   Marlòs(se) e ppo ‘e  Fred(de).

 MAGGIO 6,5 Custretto a gghiucà pe nicessità, a 35 anne sunate  se chiammaje quacche applavuso cu n’atalossa (prestazione) accorta  e  ccarimma (generosa).

 ALBIOL[‘O Masto] 7 ‘Nu vero zaimmo (leader): priciso e ssicuro arreto, cassaje dô campo a fFerreyra e, nun cuntento jette a ddà ‘na bbona mana annante e cu ‘na ‘ncurnata d’’e ssoje unuicaje (propiziò) ‘a terza addaffa (rete).

 CHIRICHES[‘O Vampiro] 6,5  Atalossa (prestazion) cchiú ca pusitiva d’’o Vampiro ca  cadenno ‘nterra ô pprincipio ce facette spaventà p’’o delore â spalla, ma strignette ‘e diente   e se dette da fà senza sfregazze (sbavature), ma senza esaggerà.

HYSAJ 6 Arreto lassaje ‘o ppoco ‘e spazzio soprattutto ‘int’ ‘ô ttu ppe ttu,ma quanno se facette vedé annante fove ‘nu bbellu vvedé.

 ZIELINSKI 6,5  Primm’ ajone (primo  tempo)’nsurdina, po a ll’arrancua se magnaje n’addaffa (rete)a pporta spalancata doppo ca Ciruzzo ll’êva servuto ‘e carna e mmaccarune, mettennole ‘a palla ‘nnant’ê piere, ma po se facette perdunà a ll’81’ quanno signaje, prutacunista ‘e ‘na granna azziona perzunale cunchiusa cu ‘o mutajaffo  (raddoppio) cuano (azzurro)addimannanno e uttenenno da Ciruzzo ‘nu trianculo ‘int’â muntaca   (area di rigore). [da ll’86’ MARIO RUI 6 ‘e stima, datose ca trasette assaje  tarde; êss’avut’’a trasí assaje primma ô posto ‘e n’ato: ‘o capitano].

DIAWARA 5,5  Serata no; miezu zifo (voto) mancante p’’e ttroppe palle perze, troppa ‘mprecisione  e ttroppa mancanza d’uddú (calma). pessino ‘ncopp’ô tre a zzero!

Marek HAMSIK 5,5  Nun me piacette: jucaje senza ggenio pe cquase tutta ‘a mubbara (fora)i ‘a fora ‘e ‘nu pasiglio azzeccato pe lLorenzigno durante ô primmo ajone (nel primo tempo)nun facette ato: troppo, troppo poco! Nun dico ca nunn’è ‘nu campione, ma quanno nun sta ‘e ggenio e sse fa ‘e cacchie suoje , nunn’ à dda essere ‘nu peccato murtale chiammarselo ‘mpanca. Ajere ce aspettavemo ca participasse â festa allimmeno cu cchillu beneditto stuco (gol) ca se fa aspettà da troppo, ma ancòra ‘na vota Marekiaro, ce facette fà ‘o cuollo luongo! E cche saciccio!   [dô 77’  ROG 6,5 Trasette e sse facette apprezzà addirittura sfresanno  (sfiorando)  ‘o stuco  (gol) d’’o tre a zzero.]

CALLEJON[Peppe ‘a ‘nguenta] 6,5 Ajere cassaje ll’atalossa (prova) ‘nzipeta ‘ncampiunato contr’â scuatra ‘e Muntella; se dette da fà súbbeto e ccurrette pe ttre.M’êsse fatto piacere si avesse signato, ma nun succedette; peccato!

 MERTENS []Ciruzzo] 7  Accumminciaje cu ‘a martellina tirata; po â ‘ntrasatta accumminciaje a gghiucà truvanno Zielinski a uocchie nchiuse cu ‘a palla a zzuco ‘e caramella ca valette ‘o doje a zzero e finalmente a ll’83’ a mmariuolo mettette dinto ‘o tre a zzero ‘e capa. Applavuse!  Lorenzo INSIGNE[Lorenzigno] 8 Prutacunista d’’a serata facette capí a vVentura ch’êss’’a cagnà mestiere jenno a  ffà ‘o pulezzascarpe; ajeressera Lorenzigno se ne futtette d’’o denucchio ca lle deva quacche ‘mpiccio ‘mpignannose ggià dô primmo ajone (prim tempo) quanno ce pruvaje cu ‘o solito iro a ggiro cchiú ‘e ‘na vota, ma fove sulo ô  56’ ca riuscette a ffà ‘o capo d’opera cu n’addaffa (rete) spettaculare : zumpate apprimma a bButko e ppo a  fFred(do), ‘e dritto sfuderaje ‘na maggia e ‘a piazzaje ‘int’ô sette ‘e mancina, cu ‘nu juoco ‘e pristiggio. Comme si nunn’avastasse, quanno fove ‘o caso se facette vedé pure ‘ncupertura.[dô 65’ ALLAN 6,5  Cu ‘a corza i ‘a cegna (grinta) soja dimustraje ca comme p’’o campiunato, accussí p’’a Ciampionsa nun se ne po’ ffà a mmeno p’’o bbene d’’o Napule.]

All. SARRI 6  Arresecaje tenenno fora jucature comme a gGorginho e Allan  e facenno jucà ‘nu Marekiaro senza ggenio.’A furtuna soja fove ca, scapuliato ‘o primmo ajone (tempo) senza piglià stuche (gol) Lorenzigno lle levaje ‘e ccastagne dô ffuoco ô 56’ cu ‘na granna addaffa (rete).Mo pe gghí annante s’à ddamettere’ncapo ca ‘ncasa ulandese d’’o Feyenoord(e), à dda fà jucà a cchi ‘o vvo’ fà e nun ase sparagna, sempe speranno ca  ‘o City vattesse ll’ucraíne, senza fà pastette!

Arb: SKOMINA (Slo)5 – Guaje gruosse nun ne facette, ma scemo cumm’è siscaje spisso a ccapocchia e nne nutizziaje ( ammoní) troppe d’’e nuoste pure pe ssenza niente, mentre nun ne jettaje fora ‘nu paro ‘e chianchiere ucraíne ca jucajeno a ffà male e nno a ppallone!

E fermammoce cca; mo p’’a Ciampionsa se ne parla n’ata vota  a ddicembre, ma dummeneca a ll’ora d’’a tiella, p’’o campiunato, ce aspetta ll’Udinese ‘ncasa soja e mm’aspetto ca ‘o Napule va lla a ffà ‘o Napule e se va mmettere tre ppunte dint’â sacca. Accussí sperammo e vve ne parlo llunnerí ca vene si dDi’ vo’. Staveti bbe’. R.Bracale Brak