UDINESE - NAPOLI (26/11/17) 0 A 1 ‘A VEDETTE ACCUSSÍ

UDINESE - NAPOLI (26/11/17) 0 A 1

‘A VEDETTE ACCUSSÍ

‘Assa fà â Maronna guagliú.... Tutto a pposto! Ajere a ll’ora d’’a tiella  ‘o Napule,â faccia d’’e troppe  cestarielle ca ce perzeguitano,    jette  a vvencere â casa ‘e ll’Udinese,’ncopp’a ‘nu campo difficultuso, contro a ‘na scuatra ca jucaje nun sulo cu ‘o pulmanno parchiggiato ‘nnante â porta ‘e Scuffett(e), ma pure  cu ccegna (grinta) e ccattiveria i  a ffà male comme dimustrajeno ‘e tanti cartelline jalizze (gialli) ca ll’arbitro fove custretto a sventaglià sott’ô naso d’’e jucature d’Oddo. Certo nun fove ‘a mubbara (partita) d’’o solitu Napule-cassosa, ma ce fruttaje bbuono e cce cunzentette ‘e    metterce  dint’â sacca ‘e tre ppunte ca ce  cunfermajeno ‘ncimma â crassifica d’’o campiunato e ‘a nichemata pulitelica (vittoria preziosa) arrivaje     cu gGiorgigno ô 33’ quanno ‘o centrale nuosto ‘e mità ccampo apprima tiraje ‘na chiaveca ‘o ricore ca ll’arbitro ce dette pecché uno d’’e tanti chianchiere d’’a scuadra ‘e casa stennette ‘nterra ‘o vicchiariello nuosto prooprio a ‘nu passo dâ porta, ma po riuscette a arrivà pe pprimmo ‘ncopp’â rispinta d’’o purtiere e mmettette ‘a palla ‘int’â rezza  i ‘a nichemata (vittoria) cunquistata fove  nicessaria comme ô ppane datose ca sapato a ssera ‘a scuatra ‘e chillu mazzo apierto ‘e spalletti era juta a vvattere ‘o Cagliari ‘ncasa soja e ttempuraneamente nc’era zumpata ‘ncuollo, cusicché ajere, a ll’ora d’’a tiella êttem’’a mettere n’ata vota  ‘e ccose a pposto e cce turnajemo a ppiglià ‘o posto ca nce spetta â faccia ‘e chi ce vo’ male! Passammo ê ppaggelle:

 REINA 6,5 Se facette truvà pronto chellu paro ‘e vote ca ll’Udinese avette ll’accasione ‘e tirà ‘mporta ‘a luntano cu bBarak(co); p’’o riesto rummanette a ppiglià friddo   guardannose ‘o sibbacco (match).   

MAGGIO[‘O Vicchiariello] 7 Fove ‘o meglio d’’o mazzo difennenno e attaccanno cu ‘nteliggenza e ccuncentrazzione; ‘e cchiú se jette a guadagnà ‘o ricore ca ce fruttaje ‘a nichemata (vittoria) accussí cumme v’aggiu ggià ditto; se chiammaje pure ll’applavuso cu ‘nu granne ricupero pe difennere.

CHIRICHES [‘O Vampiro] 6 Pure ajere dimustraje, ma ‘o ssapevo, ca Sarri s’’o po’ ttruvà sempe e ffove priciso, puntuale, cuncreto e ccuncentrato.  

KOULIBALY[‘O Gialante] 6,5 N’ata granna  mubbara (partita) d’’o gGialante ca arreto  fove ‘na trancara  (muraglia) e cquanno sustataje (impostò) ‘o ffacette cu cqualità e alicanza.  

HYSAJ[Meza cucchiara] 6   Atalossa (prestazione) da seje pure si ajere dètte ‘a ‘mpressione ‘e jí meglio a ddritta ca a mmancina.

ALLAN 6 Ce mettette ‘a solita corza e ccegna (grinta), ma meno qualità a ppietto ‘e ll’urdemi tiempe. Forze s’êtt’ ‘a  emuzziunà.

JORGINHO 6  Fove isso ca ce facette vencere, ma nun le  mecco ‘e cchiú pe bbia d’’e troppi pasiglie (passaggi) sbagliate; anze ‘a puttanata fatta tiranno ‘o ricore ‘mbracci’ô purtiere ca ggià s’era menato ‘nterra, ‘mmece ‘e tirà ‘na cagliosa centrale, lle facesseno mmeretà ‘nu cinche e mmiezo, ma arriva ô seje pecché curriggette ‘o prano (errore) e recuglienno ‘a rispinta ‘e Scuffet(to) menaje dinto ‘a palla  ca ce dette ‘e tre ppuunte. [Dô 71’ DIAWARA 6 Trasette a ll’arrancua (ripresa) pe ddà cchiú sustanza a ll’armidanno (al centrocampo) e ffacette ‘o duvere suojo; unicu sfregazzo (sbavatura)  fove quanno ô niajo (finale nun chiudenno bbuono ‘ncuollo a bBarak(co) arresecaje ‘e rijalà ‘o russimmo (pareggio) ê jucature ‘e casa,ma pe ffurtuna nun succedette; ‘stu fatto però costa ô guaglione ‘o miezu zifo (voto) ‘e cchiú ca se fósse mmeretato].

HAMSIK[Marekiaro ] 5  Purtroppo n’ata mubbara (partita) d’’o capitano luntana da chello ca po’ e ssape fà e ca me fósse aspettato, addó ca isso se mantenette fora dô juoco cu n’atalossa(prestazione) cu ppoca qualità e ttante, troppi pasiglie (passaggi) sbagliate! [Da ll’ 83’ ROG 6 ‘e stima pecché trasette troppo tarde pe ffà coccosa.];

CALLEJON[Peppe ‘a ‘nguenta] 6  Tutto summato fove ‘o meglio d’’e tre lla ‘nnante  ma cchiú pecché spisso se facette vedé arreto a ddifennere, mentre annante nun fove maje periculuse. Ancòra nun ce pozzo crerere a ccomme sbagliaje quanno sulo annente ô purtiere lle tiraje ‘a palla ‘ncuollo ‘mmece ‘e fravecarla ‘mporta ‘nchiudenno ‘a mubbara (partita). E cche saciccio!  

MERTENS[Ciruzzo ] 5,5  Riuscette a ppiglià fuoco sulo raramente dimustranno, anze cunfermanno ca ‘o guaglione è stracquo e avesse ‘a risciatà. Però da ‘sta recchia Sarri nun ce vo’ sentí. 

INSIGNE[Lorenzigno ] 5  Me dispiace d’’o ddicere, ma nun ne pozzo fà a mmeno: doppo d’’e duje stuche (gol) signate   contr’ ô Milàn(no) e ô Shaktàr(re),ajere Lorenzigmo jucaje ‘o peggio sibbacco (match) ‘e ll’urdrmu paro d’anne; pacienza  ‘na jurnata storta po’ ccapità pure ê campiune: succere![Dô 78’ ZIELINSKI 6 Trasette pe ffà risciatà ‘nu Lorenzigno ca nunn’era isso, facette ‘o ssuojo pure senza esaggerà.Fósse trasuto primma êsse pututo fà ‘e cchiú. ]

All. SARRI 6  E nniente ‘e cchiú ‘nu poco p’avé fatto tarde ‘e cagne, mapure pecché ‘o Napule visto â Dacia Arena nun fove chillo ca ce fóssemo aspettato ‘ntribbuna-divano; però ‘a scuatra riuscette a ppurtarese â casa ‘e tre ppunte nicessarie senza sfregazze (sbavature) a ll’epata difenziva  (in fase difensiva) aizanno sempe ‘na trancara (muraglia) justa.

arbitro: DI BELLO 6 Ajere ‘stu  bbancario pugliese ce purtaje  bbuono e, ccu ttutto ch’è miezu scemo, ssiscaje cu esattezza quase tutto cumpreso ‘o ricore dato ‘nfavore d’’o vicchiariello nuosto; ne nutizziaje (ammoní) cinche d’’e lloro, ma n’êsse avuto jettà fora allimmeno uno!

E ccu cchesto ve saluto  e si ‘o vvo’ ‘o Cielo ce sentimmo sàpato ca vene, doppo d’’a mamma ‘e tutte ‘e  majche (battaglie), chella   contr’â vecchia zoccola ca scenne ô san Paolo viernarí a ssera e spero proprio ca pozzo raccuntarve ca ll’âmmu fatto ‘nu mazzo tanto! Staveti bbe’.

Raffaele Bracale Brak