NAPOLI – SAMPDORIA 23/12/17 [3 a 2] ‘A VEDETTE ACCUSSÍ

NAPOLI – SAMPDORIA 23/12/17 [3 a 2]

‘A VEDETTE ACCUSSÍ

Eccuce cca guagliú! Che sciarra  (lotta) e cche bbattaglia pe ttutt''o primm’ajone (tempo), ma po, sott’ô lampione  che suddisfazzione! Ajere all’ora d’’a tiella ‘o Ciuccio scummaje ‘e sanco ‘a Sampedoria p’’a cuntentezza nosta ca manco era fernuto ‘o sibbacco (match) ggià, pe ttutta ll’arrancua (ripresa)  festiggiavemo spuzzulianno scioccele, struffole, mustacciuole, raffiuole e ttutt’’o bbene ‘e dDio   ‘e Natale, cumminte ca ô prazzo (fine) êssemo veduto  ancòra ‘o Ciuccio ‘ncimma â crassiffica d’’o campiunato ô ssicuro ‘e chello ca po’ ssuccedere ogge. I accussí fove datose ca pe cquase tutto  ‘o primmo ajone (tempo) êttem’ ‘a fà ‘a rincorza d’’o risultato cumbattenno p’adderezzà ‘a varca fernuta pe ddoje vote sotto e ‘ncoppa pe dduje tire piazzate ca pe ddoje vote purtajeno ‘nvantaggio ‘a Sampedoria, ma po doppo d’esserce mise ‘ncopp’ô doje a ddoje, arrivate ô 39’ Marekiaro mettette dinto ‘a palla ca ce dètte ‘o tre a ddoje i accussí fenette quanno Massa ô 93’ siscaje ‘o prazzo(fine) dannoce ‘a pussibbilità ‘e fà casino p’’o Napule primmo ‘ncrassifica, accussí cumme ‘o ‘o vulimmo vedé a mmaggio ‘e ll’anno ca mo trase, accussí! E ddicere ca nun fove ‘na passiata dàtose ca ‘o Meza Cucchiara ggià ‘ncapo ‘e nuvanta siconne êva fatto  ‘na fessaria ca ce custaje cara visto ca Reina nun riuscette a ffermà ‘o tiro ‘e timmuria ‘e ? ca ‘o casticaje ‘a trenta metre. Cose ‘e pazze! Mubbara (partita) ‘nzomma  accumminciata ‘nsagliuta e cquanno po doppo ‘nu quarto d’ora [ô 17’] ‘o ‘Ncrifato agguantaje ll’uno a uno, manco ce mettettemo tranquille dàtose ca ‘o Meza Cucchiara facette ‘na puttanata cchiú grossa d’’a primma menanno ‘nterra ‘int’â muntaca (area di rigore) nosta ô duriano ch’êva signato ll’uno a zzero e ll’arbitro Massa, ca chello aspettava, ô 27’ ce siscaje contro ‘o ricore ca mMerdarella signaje cu ‘na cagliosa centrale  e ffove n’ata vota notte pecché êttem’’a turnà a adderezzà ‘a varca e ppe furtuna ca ô 33’ ce penzaje santu Lorenzigno ca se facette truvà ô pizzo justo, ô mumento justo pe mmettere a ffrutto ‘nu priciso bbassurero (suggerimento) ‘e Ciruzzo. Però nuje êvem’’a vencere e ppe furtuna ce credettemo attaccanno a ccapa sotto nsi’ ô  quanno Marekiaro, signanno ‘o cientosidicesimu stuco (gol) cu ‘a maglia nosta e piazzannose ‘ncimma â crassifica d’’e nassie (goleador) cuane (azzurri) ‘e sempe, ce dètte ‘a nichemata ( vittoria) ca cercavemo! Mo sí ca putimmo fistiggià bbuono Natale!

Passammo ê ppaggelle:

REINA 5  Me dispiace, ma ‘e cchiú nun lle pozzo mettere: è overo ca ‘a timmurria (punizione) ‘e Ramirezzo fove pricisa, però tirata ‘a trenta metre e isso êsse avuto ‘a fà ‘e cchiú; ô stesso p’’o ricore ‘e mMerdarella forte sì, ma centrale e ssi isso fósse rummaso allerta e fremmo, ll’êsse avuto ‘mbraccia!

HYSAJ[Meza Cucchiara] 4,5  Fove ‘ndifficultà pe ttutt’’o sibbacco ( match) e ffacette ddoje puttanate una peggio ‘e ll’ata;primma menaje ‘nterra uno inutilmente poco fora d’’a muntaca (area di rigore) nosta e ppo cu  ll'azziona d’’o ricore facette  ‘na frittata tanta, rrobba ‘e ‘nu pesce ‘e cannuccia: pallone cuntrullato ‘na chiaveca e mmancanza ‘e razziucino. E cche saciccio!

ALBIOL[‘O Masto] 6 -  ‘A pigliaje sempe o cu ’e bbone o cu ‘e ttriste dimustranno ch’è overo ‘nu masto.

KOULIBALY[‘O Gialante] 7  Acalaje ‘a sarracinesca e nnun passaje nisciuna; mMerdarella pe ttuccà quacche ppalla êtt’’a spustarse ‘ncopp’â curzia, pecché ‘mmiezo nun fove cosa! Spettaculare quanno partette  palla ô pede, facenno ‘mpazzí ‘e bbemate (spalti).

MARIO RUI[‘O Cafettiere] 5  Faticaje facenno pure ‘e straurdinarie, ma cu ppoca cazzimma e nnisciunu  razziucinio tant’è vvero ca s’abbuscaje dduje cartelline lassanno ‘a scuatra ‘ndiece ‘int’ô mumento dicisivo. ‘Sti ccose nun se fanno!

ALLAN [‘o ‘Ncrifato] 7,5  Ce ne vulesseno n’ati dduje cumme a isso, ca se facette vedé sempe  addó servette i a ttutt’’e pizze,martiello ‘mmiez’ô campo, corza e ccegna (grinta) esaggerate ca ‘o facetteno truvà ‘nnant’ô purtiere ô pe ssignà ll’uno a uno; po fove isso ca favurette cu cCiruzzo ll’addaffa (rete) ‘e Lorenzigno stuppanno ‘nu duriano e dànno palla.

JORGINHO 5,5   Nun le pozzo dà ‘o seje pecché me parette debbule e ssenza forze, sbagliaje cchiú ‘e ‘nu pasiglio (passaggio) e a ccurto ‘e frischezza ffove custretto a secutà ll’avverzario; ‘nzomma nun fove isso e se n’addunaje pure Sarri ca ll’êtt’’a levà cchiú pprimma ca nurmalmente fa. [Dô 55' DIAWARA 6,5  Facette ‘o ssuojo , dànno sicuramente cchiú sustanza â linia centrale, accussí cumme srveva a cchillu mumento.

HAMSIK [Marekiaro] 7  Nun suilo pecché signanno ce détte ‘a nichemata (vittoria) ca ce serveva, ma pure pecché scigliette ‘o san Paolo pe ssignà, comme v’aggiu ditto  ‘a cientosidicesima addaffa (rete) cu ‘a maglia nosta e piazzannose ‘ncimma â crassifica d’’e nassie (goleador) cuane (azzurri) ‘e sempe. Bravo, capità, nun fermarte cca mo ca sî tturnato ‘o prufessore ‘e sempe,no ‘obbidello ‘e ll’urdimi mise [Dô 69' ZIELINSKI 5,5  Trasette senza ggenio e ccu ppoca cegna (grinta) sprecanno ‘nu paro ‘e palle bbone. Peccato.

CALLEJON [Peppe ‘a ‘nguenta] 6,5  Me parette ca fósse turnato a essere isso risultanno sempe periculuso quanno partette ê spalle ‘e Striniccio e sse turnaje a ffà rispettà pure sottoporta sfresanno  (sfiorando) ll’uno a uno poco primma ca  po ‘o facesse ‘o ‘Ncrifato.

MERTENS[Ciruzzo] 7  E nno pe ssimpatia, ma pecché pe cchello ca facette lle mancaje sulo ‘o stuco (gol); cumminfatte facette muvimente overo ‘e ‘na ‘nteliggenza straurdinaria  tuccanno ‘e fino pe llibberà ‘e cumpagne e ffurní ‘nu paro ‘e jusaide (assist) overo toche cumme a cchillo pe lLorenzigno. Si nun lle mettimmo pressa, so’ ccerto ca ‘o stuco (gol) arriva!  

INSIGNE[Lorenzigno] 7  Sustataje (impostò), bbinaje (costruí), ricamaje e mmettette a ffrutto ‘o bbassurero (suggerimento) ‘e Ciruzzo. Che ato à dda fà? È ccurto e mmale ‘ncavato, ma nun se ne po’ ffà a mmeno e  ajere  ‘o ddimustraje, turnanno a ssignà a vvolo!   

All. SARRI 6,5  Dâ bbanna (dal lato) d’’o juoco ‘o Ciuccio parette turnato isso jucanno a mmestiere e ccu perzunalità ‘int’ô stritto; peccato pe cchellu paro ‘e fessarie arreto però perzunale nnun d’’a chenca. Però tirasse ‘e rrecchie e ccazziasse a cchi sbagliaje!

 Arb. MASSA 5 Chisto ce porta bbuono, ma è scemo e ppure ajere facette ‘e scemità soje soprattutto esaggeranno cu ‘e cartelline jalizze (gialle) sventagliate a ccapa ‘e sacicce e ca ce custajeno ‘o russo  d’’o Cafettiere.Pacienza.

E fermammoce ccà; p’’o santu Natale ve faccio tante avucurie ‘e pace, saluta e ppruvverenza  e, si dDi’ vo’ ve dongo appuntamento pe sàpato ca vene doppo d’’a nacchella (trasferta) a cCrutone ‘e viernarí a ssera e spero ‘e puterve cuntà bbelli ccose!

Staveti bbe’. R.Bracale Brak