NAPOLI – LAZIO (10/02/18) 4 A 1 ‘A VEDETTE ACCUSSÍ

NAPOLI – LAZIO (10/02/18) 4 A 1

‘A VEDETTE  ACCUSSÍ

Alé oh-oh, alé oh-oh! Canta Napule, Napule primo ‘ncrassifica e ppirciò tutto a pposto  guagliú! Tutto a pposto cu ttutto ca ajere ssera ce jettemo âssettà ‘ntribbuna divano cu ‘o ffele ‘mmocca pe bbia ca viernarí a ssera ‘a vecchia zoccola [ca s’è accattato ‘o munno e ffa chello ca vo’ futtenose ‘e tutto] era juta a vvattere ‘ncasa soja ‘a Fiorentina apprufittanno pure d’’a varra ca lle  cunzola ‘a sora ca s’era ‘mmentato n’attasallulo (fuorigioco) ca nun ce steva annullanno ‘nu justo ricore siscato a Cchiellini pe ‘nu carí (fallo) ‘e vraccio dint’â muntaca (area di rigore) soja. ‘Nzomma ce assettajemo cu ‘o ffele ‘mmocca, ma po ce aizajemo cu ‘o mmèle quanno ‘o Ciuccio  ce facette stravedé cu ‘na granna, overo  granna arranca (ripresa) e ffacette chello ch’êv’’a fà  vvattenno  ‘o pappavallo ‘e Lotito e cunzignannelo cumplessivamente quatto brasciole ‘e locena ‘e puorco ‘mbuttunate ‘e passe e ppignuole, nchiudenno ‘o sibbacco (match) cu ll’istessa cifra ‘e chillo ‘e ll’addabba (andata): quatto a uno   repigliannose accussí ‘a cimma d’’a crassifica, addó ‘o vulimmo vedé a mmaggio cu ttutto ca chillu jellato ‘e Ghoulam(me), mentre se steva repiglianno i era pronto pe  tturnà, s’è spaccaje ‘nu denucchio e mmo chi sa’ quanno e ssi  ‘o vedimmo n’ata vota... Nc’è ppoco ‘a fà: tenimmo tropp’uocchie sicche ‘ncuollo e fósse ora ca ‘o presirente  Dela ‘e ppurtasse a bbenericere ‘mparanza... e nun facesse ati pputtanate cumme a cchella ‘e levarese dduje bbuoni jucature ‘e panca [Strinic e Zzapata]ca êsseno  pututo darce ‘na mana! Beh, lassammo stà e tturnammo ajere cundicenno  ca ‘o primmo ajone s’arapette ‘na chiaveca [quanno ô 3’ minuto Mario Rui[6 e ppo ve dico] lassaje ca  Immobile spustatose ‘ncopp’â curzia ‘e dritta lanzasse ‘na palla longa ‘int’â muntaca (area di rigore) addó Tonelli [5.5 e ppo ve dico] nun s’addunaje ‘e De Vrij ca  spuntannole ê spalle e ‘mpezzannose jette a ccogliere cu ‘na ponta  ‘e pere chella palla futtenno da duje passe  a rReina   ca sta ancòra jestemmanno...] e’o Ciuccio êtte ‘a  ccuntinuà ‘a mubbara (partita) luttanno  i affannanno [contro a ‘na Lazzio scesa ‘ncampo fatta ‘e bbubbazzella e malamente ‘ntenziunata a gghiucà a ffà male senza ca chillu sacchetto ‘e ll’úmmeto senza laccetto, Banti  [4 e ppo ve dico]  s’accurgesse ‘e niente] e ppassaje quase tutto ‘o primmo ajone (tempo) primma d’arrivà a ccogliere ‘o russimmo (pareggio) mumentaneo ô 44’ cu Peppe ‘a ‘nguenta...; però po arrivate a ll’arrancua (ripresa) s’avutaje ‘o vangelo e  ccagnaje  museca i ‘o Ciuccio turnaje ‘ncampo  cu ‘a capa dicisa  ‘e fà chello ca sape fà e ll’abbiaje a ffà ggià ô 54’ cu pPeppe ‘a nguenta ca da dritta mettette dint’ô muntaca (area di rigore) lazziala, ‘nu metro ‘nnante â porta ‘e Stracoscia ‘na palla velenosa tanto tassosa (veloce) e fforte  ca chi sulo ll’êsse ‘ntuppata ll’êva pe fforza menà dinto, cumme capitaje a uno d’’e centrale d’Inzaghi ‘nu bbeduino a nnomme Wallace  ca facette chiagnere ‘o purtiere suojo e cce détte ‘o vantaggio d’’o 2 a 1, vantaggio ca aumentaje e criscette  cu Zielinski ca  ô 56' ce mettette ‘o fora pere ‘e dritta mettenno dinto ‘nu bbellu tiro ‘a luntano ‘e Mario Rui e ffove Ciruzzo ca cumpletaje ‘o ricamo ô 73' sfruttanno ‘nu granne bbassurero(suggerimento)’e Zielinski a ccentro ‘e muntaca. I accussí cumpressivamente foveno quatte ‘e brasciole ‘e locena ‘mbuttunate ca ‘o Ciuccio cunzignaje a Inzaghi e cumpagne ll’istessi quatto  brasciole ‘e ll’addabba (andata) ca forze erano state tanto sapurite ca ‘a scuatra d’’o pappavallo ‘e Lotito vulette fà ‘o bbis(se). Bbuono accussí!

Passammo ê ppaggelle:

 REINA 6  Nun ce putette fa niente ‘ncopp’ â ponta ‘e De Vrj ca ll’accumparette annante â ‘ntrasatta e ddeviaje futtennolo troppo da vicino ‘na palla longa ‘e Immobile po  tenette ‘a fà  sulo si chiammato ‘ncausa dê cumpagne.

HYSAJ [Meza Cucchiara] 6  ô pprincipio nun facette troppo facenno sulo ‘a guardia ô bbidone, ma po a ll’arrancua (ripresa) fove tutto n’ata cosa, jette a mmille appressuranno (spingendo) e cupulianno (dialogando) cu ‘e cumpagne ‘e curzia. 

 TONELLI 5,5 ‘E cchiú nun le pozzo mettere! Miso a ssurpresa ‘ncampo ô posto d’’o Masto partette malamente nunn’ accurgennose  ‘e De Vrj ca lle spuntaje ê spalle,  sefferette  ‘e muvimenti ‘e  Immobile e cce mettette troppo tiempo pe ppigliarne ‘e mmesure e nnun dètte nisciuna sicurtà (sicurezza) ô cumpagno ‘e sezziona (reparto).

KOULIBALY[‘O Gialante] 7 Faticaje pe dduje, mettenno ordine, cumannanno e bluccanno tutto isso visto ca Tonelli ancòra nun êva capito ca nun era ‘e passaggio, ma  steva jucanno pur’isso.

Mario RUI 7  Nun ll’avesse ditto, ma finalmente avette ‘a surpresa bbona dô purtuchese ca facette ‘na granna mubbara  (partita) e soprattutto a ll’arancua (ripresa)fove isso ‘o pratucunista a mmancina e ssuojo fove ‘o tiro ca curretto da Zielinski ô 56’ ce dètte ‘o  3-1.

ALLAN[‘O ‘Ncrifato] 6,5   Granna atalossa (prestazione).Cu ttutto ca durante ô primmo ajone (tempo) ‘e lazziale ‘o pigliajeno ‘e mira vattennolo sistimaticamente cumme tuccava palla, nun se spaventaje, luttaje e cumbattette cu ‘o sanco a ll’uocchie cu ‘a cegna (grinta) nicessaria. [Da ll’ 81' ROG 6 ‘e stima. Trasuto a gghiuoche fatte, tuccaje sulo quacche ppalla.]

JORGINHO 7  Bbella, veramente bbella ‘a riggia soja ca se chiammaje ll’applavuso d’’o san Paolo; da ‘ncurnicià chella palla surprennente e ddicisiva ca ô 44’ dètte a pPeppe ‘a ‘nguenta.

 HAMSIK [Marekiaro] 5,5  Me dispiace, ma nun se mmeretaje ‘e cchiú: facette troppo poco sufferenno ‘e zzurieje (ritmi) d’’a Lazzio i ‘o juoco pesante a ffà male; jucaje sulo n’ajone (tempo) e nnun me piacette, Sarri ‘o levaje e bbuono facette. [Dô 46' ZIELINSKI 7  Tutto n’ata cosa a ppietto d’’o capitano; ajere fove isso ll’ommo dicisivo; trasette diciso a spaccà ‘o munno i a sse piglià ‘a scuatra ‘ncopp’ê spalle e scatenato apprimma signaje ‘o 3 a 1, ne sfresaje (sfiorò) n’ato e servette ‘na palla d’oro, chella d’’o 4 a 1 a cCiruzzo.Ch’ato êv’’a fà?]

 CALLEJON [Peppe ‘a ‘nguenta] 7,5  Dicisivo, funnamentale p’’a scuatra e pp’’o sibbacco (match); avastasseno pe ddimustrarlo chelli ddoje perne d’’e ssoje: ‘o cuntrollo ‘e palla p’appruntà ‘o russimmo (pareggio) e cchella palla misa mmiezo ca ce purtaje ‘nvantaggio.E nnun parlo d’’o riesto.   [Da Ll’ 84' MAGGIO ‘e stima. Trasuto pur’isso  a gghiuoche fatte, tuccaje sulo quacche ppalla.]

MERTENS[Ciruzzo] 7  Se dètte da fà e ddurante ô primmo ajone (tempo) lle fósse spettato pure ‘nu ricore a ffavore ca sulo chillu sacchetto ‘e ll’ummeto d’arbitro nun vulette vedé. Ma arrivato ô 73 jette a sfruttà a mmestiere ‘nu granne bbassurero(suggerimento)’e Zielinski a ccentro ‘e muntaca  futtenno a Stracoscia!

INSIGNE 6,5  ‘Nforma, ma sfurtunato nun riuscette a ttruvà ll’addaffa (rete), ma ‘a sfresaje tre o quatto vote cu bbelli gghiucate ca se fósseno mmeretate ‘e cchiú. Peccato.

all.  SARRI 7 ‘A scuatra soja ô pprincipio sbandaje e isso se ‘ncazzaje e sse facette sèntere tiranno ‘e rrecchie a ccoccheduno e bbuono facette, anze ‘ncarraje tutto  ô 46’ 

levanno  ô capitano ridisignanno ‘e ffelere e ffacenno trasí a   zZielinski,  ca, cumme v’aggiu ditto, fove isso ll’ommo dicisivo d’’o sibbacco (match).Bbuono accussí!  Nun capette pecché Banti ô 45’ ‘o menaje fora custringennolo a vvederese ê suoje ca mazziavano ‘aLazzio, da dint’â cajola ‘e cristallo. Si tanto me dà tanto me ne facesse caccià sempe ô 45’!

arbitro BANTI 4  Vecchia cunuscenza e antica fetenzia, comme ô 99,9 pe cciento ‘e ll’arbitre taliane, ggià ati vvote ‘ncruciata dô Napule, ‘stu sacchetto ‘e ll’ummeto, mannato pe ttentà ‘e spezzarce ‘e passe,  ajere però [‘a fora ‘e chillu ricore nun dàto a ffavore ‘e Ciruzzo e ppirciò lle mecco quatto] nun  ce facette gruosse tuorte [forze pe ffarese perdunà chille  d’‘o ppassato!] e ll’unicu sfizzio suojo fove chillo ‘e romperce ‘o pasticciotto, facennoce cacà sotto ‘ntribbuna divano cunzultanno ‘a varra [ca lle cunzola ‘a sora], addó steva appustiato chill’atu bbellu mobbile ‘e D’amato, jummerdino patentato, primma ‘e cunfermà ognuno d‘’e quatte stuche (gol)nuoste, ma s’êtte ‘a fà cchiú ddinto ‘e dint’ô prozo isso, chi ‘o mannaje, ‘a vecchia zoccola e ttutt’’e cestarielle ca ce menano a seccia!

E‘nchiudimmola cca ringrazzianno ‘e guagliune cuane (azzurri) p’ avé vinciuto  n’ata mubbara (partita) assaje ‘mpurtante! Forza Napule, Ciuccio fa’ tu e ppure dummeneca ca vène ,facce sunnà vattenno ‘a suggità ‘e Ferrara! Nuje però ce sentimmo apprimma , si dDi’ vo’,  e cciovè viernarí ca vene  doppo d’’o sibbacco (match) casalinco d’ E.L. contr’ô Lipsia, ca – ve cunfesso – nun saccio chi è e  cqua’ panne veste   e vve ne parlo. Staveti bbe’.

R. Bracale Brak