NAPOLI – LIPSIA (E.L. 15.02.18) 1 A 3 ‘A VEDETTE ACCUSSÍ

NAPOLI – LIPSIA (E.L. 15.02.18) 1 A 3

‘A VEDETTE ACCUSSÍ

Che nnervatura e cche scuorno, guagliú! Cumme si nun ce vulesse credere a cchello ch’ êttem’’a vedé ajeressera ô san Paolo, miezo vacante,  addó ‘o Ciuccio, sciso ‘ncampo pe pperdere e nnun vencere…, p’ ‘a collera d’’a tribbuna divano, riuscette a ffarese mazzià dê terische d’’o Lipsia pe ttre a uno e mmo, pure ca ce ‘o ddicimmo aummoaummo, ‘e fatte nun cagnano i ‘o Napule ato nun aspetta ca d’essere ghittato fora dâ coppa piccerella airupea ch’è ‘nu ‘mpiccio p’’o pruggetto principale ‘e ‘sta tempurata (stagione), e cquase certamente ‘nfra sette juorne ‘nCermania     succede  ca [p’’a cuntentezza d’’a suggità cuana (azzurra)] ‘o Ciuccio se leva ‘o penziero ‘e coppe, cuppine e ccuppette e ppo’ ppenzà sulo ô spezziale, ciovè ô campiunato addó ‘a vecchia zoccola nun ‘o lassa ‘e pere...; certo è ‘na bbrutta cosa da mettersene scuorno, ma ato nun se po’ ppenzà doppo d’’o sibbacco (match) d’ajeressera ca ‘o Napule jucaje a vvienetenne, no contro, ma  a pparte cu ‘e terische [‘a fora ‘e duje, forze  tre] cu ppasiglie (passaggi)sbagliate  apposta, jennose a ‘mbuttiglià dint’ô stritto pe nnun truvà ‘a strata libbera verz’â porta teresca, facennose puntualmente superà ‘ntassezza (in velocità) cumme si êsseno tenute, ‘mparanza, ‘e gghiorde dint’ê ccosce. ‘Nzomma se vedette chiaramente ca ‘e nuoste jucajeno, cuntente e ssurisfatte,   ô chi perde e cchesto, ‘ntribbuna divano nun ce piacette e lle chiammajemo spisso ‘e muorte a sSarri i ê suoje e ss’’e mmeretajeno pecché cierti ccose ca  fanno schifo nun s’êssen’’a fà e ‘mmece lloro ‘e ffacetteno senza scuorno e ffoveno accussí sporche ca ce  n’addunajemo súbbeto  tanto ca nun vale manco ‘a pena ‘e suffermarese ‘ncopp’ô fatto ca Sarri mannaje ‘ncampo ‘na scuatra ca nun fove ‘na scuatra cu ‘nu  Ciruzzo scualificato, cu ‘nu Lorenzigno, ca, trasuto tarde,   manco facette niente, cu ‘nu ‘Ncrifato ca poco facette   e ccu ‘nu gGiorgigno,ca manco trasette! Figurate vuje ca nemmeno credettemo ca putesse succere coccosa ‘e bbuono quanno ô 53’, cu ll’unica manovra ‘ncarrata,  Peppe ‘a ‘nguenta i ‘a bbelva libberajeno ô tiro a Ounas(se) ca signaje; cumminfatte se  trattaje ‘e ‘nu suonno (illusione) sunnato e c’êttem’’a scetà, turnanno cu ‘e piere ‘nterra,  ggià ô 61’ quanno Werner(re) jette a signà ‘o stuco (gol) d’’o russimmo ( pareggio) primma ca ô 74’ Bruma purtasse ‘nvantaggio ‘e terische ca cummannavano ‘o juoco mo arreto, mo annanze cu cKeita,  cu pPoulsen(ne) e ttutte ll’aute i ‘o Napule arrancava malamente     tant’è overo ca p’essere sicure d’essere ghittate fora, penzaje bbuone ô 93’ ‘e farese asseccà n’atu bbuffettone [‘o terzo!] ancòra  da Werner(re). Vuje me capite? Tu qua’ surpresa! Lla se vedette chiaro ggià dô primmo minuto che ghieva ascianno ‘o Ciuccio e nnisciuno po’ ppenzà ca ‘nfra ‘na semmana jammo â casa lloro i ‘e vvattimmo pe ttre a zzero. Nunn’ ‘o po’ ppenzà nisciuno ca tène ll’uocchie ‘nfronte i ‘a capa ‘ncapa! Nisciuno! E cchi dice ‘o ccuntrario vo’ pazzià, guagliú.

Ora mo êsse ‘a fà ‘e ppaggelle, ma doppo chello ch’ànnu fatto ajeressera[sarvanno a rReina, a Peppe ‘a ‘nguenta i a Ounas(se), ca se ‘mmereteno 6 tutt’’e ttre pecché me parette ca nun vulesseno participà â pastetta a pperdere...]    tutt’ ‘o riesto se mmereteno 3 cumpreso ‘o muntarribbo (allenatore) pecchè è ffacile metterse ‘a màscara quann’è ffernuta e ccriticà... è ttroppo facile; no! Isso ca sta cazza e ccucchiara cu gghiucature, presirente e ccumpagnia bbella   se nn’êva accorgere p’’e juorne passate  ‘e chello ca se steva pruggettanno e sputtanà a ttutte! Aggio ‘a ‘mpressione ca pur’isso era d’accordo e mmo fa ‘o verginiello!

E bbasta accussí primma ca jesco fora dô semmenato! Si Ddi’ vo’ ce sentimmo llennerí ca vène doppo ca, p’’o campiunato,  dummeneca all’ora d’’a tiella scenne ô san Paolo ‘a scuatra ‘e Ferrara e i’ spero ca ve pozzo cuntà ca ‘o Ciuccio è tturnato a ffà ‘a perzona seria mazzuliannola a dduvere e mmacaro Mazzarri a tTurino ce  à fatto ‘nu rialuccio fermanno  ‘a vecchia zoccola.Chesto sí ca ce  piacesse!  Staveti bbe’.

R.Bracale Brak