NAPOLI – GENOA (18.03.18) 1 A 0 ‘A VEDETTE ACCUSSÍ

NAPOLI – GENOA (18.03.18) 1 A 0

‘A VEDETTE ACCUSSÍ

‘Assa fà ô Cielo, guagliú! Forze nunn’è ttutto perduto cumme pareva ddoje dummeneche fa! Ajeressera ô sanPaolo, ‘o Ciuccio, nun perdette n’ata accasione e scutulianno, pure si sulo p’uno a zzero  ‘o Crifone d’’a lanterna [ca era venuto a gghiucà ‘a mubbara (partita) d’’a vita, piazzanno ‘nu pulmanne ‘nnante â linia d’’a muntaca (area di rigore ] se mettette dint’â sacca tre ppunte ‘mpurtante e sse purtaje ‘ncrassifica a ssole ddoje lunchezze dâ vecchia zoccola ca,jenno a fFerrara, nun s’era fatta ajutà penzanno ‘e puté  fà unu muorzo d’’a scuatra ‘e casa e ‘mmece nunn’era riuscita nè a vvencere, nè a ssignà e  ssàpato era sata fermata ‘ncopp’ô zzero a zzero dâ scuatra ‘e Liunardo Semplice.  ‘Assa fà ô Cielo, guagliú!  A ‘stu punto, cumme stanno ‘e ccose, da  mo a mmaggio ‘o Ciuccio à dda  sulo   stregnere ‘e riente e nnun à dda fà nisciunu passo favezo e ppo’ essere ca ‘nu suonno addiventa rialdà! I’ nun me voglio fà diebbete cu ‘a vocca, ma penzo ca nun me sto’ sbaglianno!  Allimmeno accussí spero. Certo ‘e guagliune ‘e Sarri nunn’ ànn’ ‘a magnarse dduje o tre stuche (gol) â vota, cumme ‘mmece succedette ajere, e ll’ànn’’a ferní ‘e cògliere chilli ‘nfame   pale   d’ajere e- pe pparta soja -  ‘o muntarribbo (allenatore) nuosto à dda capí ca ê vvote è ‘o caso ‘e fà trasí a sant’Arcadio assaje primma ‘e ll’urdeme diece minute, senza custringere ‘e luonghe d’’a trasera (difesa) a gghí ‘nnante pe risolvere ‘na matassa ca nun se sbroglia. Turnammo ô sibbacco (match) d’ajere e   ppassammo ê ppaggelle:

 REINA 6 RIspunnette prisente ‘na vota ‘ncopp’ a ‘nu tiro ‘e Taarabatte [o cumme cacchio se chiamm’isso]e n’ata vota ‘ncopp’a ‘na cunchiusione ‘mpruvvisa ‘e Rosi, ma p’’o riesto nun fove chiammato a ffà tacculle (interventi) cumpricate.

 HYSAJ[Meza Cucchiara] 5,5 ‘O miezu  zifo (voto) mancante s’’o mmereta e  nce ‘o mecco nun sulo pe ‘nu sfregazzo (sbavatura) ca puteva custarce caro quanno lassaje ca  Hiljemarke se ‘nfilasse ‘int’â muntaca (area di rigore), pe ffurtuna senza cunsequenzie, ma pure pecché arrivato ô niajo (finale) jette spisso ‘int’ê chiavette cu lLaxalte e pp’’o riesto quanno se prupunette ‘nnante ‘o ffacette senza zuco né ccunnimma

 ALBIOL[‘O Masto] 7,5  Se mmeretasse ‘na statua d’oro p’’e tre ppunte ‘e bbalatinno (platino) ca nce dètte ajere sciglienno ‘na matassa cumpricata; p’’o riesto fove praticamente mascullo  (perfetto)  lla ddereto addó senza nisciunu sfregazzo (sbavatura) sagliette ‘ntusiello o nzerranno ‘a sarracinesca, o facenno partí ll’azziona

KOULIBALY[‘O Gialante] 6  ‘E cchiú nun pozzo metterle pecché truvaje pusizione e ccuncretezza sulo doppo esserse fatto zumpà periculosamente ‘a Lazoviccio, ca po – pe ffurtuna - specaje  e ddoppo n’ata palla perduta ca cunzentette ‘nu tiro, ma sballato, a bBertolacci.

 RUI 6   Pure si addereto avette sufferí bbastantamente cu Rosi e lLazoviccio, ‘ncopp’â curzia  mancina se dette da fà participanno spisso all'azziona  uffenziva, senza però lassà ‘o signo.

ALLAN [‘O ‘Ncrifato] 5,5  Me dispiace, ma nun fove isso! Sí ce mettette corza e ccegna (grinta),ma mancaje ‘e pricisione cchiú ‘e ‘na vota cumme a cquanno, ô niajo (finale) ‘e primmo ajone (tempo)sparacchiaje ê stelle ‘na palla da fravecà ê spalle ‘e Perin(no).  E cche saciccio! Cierti ccose nun se fanno!

JORGINHO 6,5  Ô ssolito tuccaje ‘na cifra ‘e pallune sbagliannone sulo uno e ghiucannone meglio tutte ll’ate; peccato ca ddoje granni jubbumme (imbucate)nun foveno mise a ffrutto da Ciruzzo e pPeppe ‘a ‘nguenta.

 HAMSIK[Marekiaro] s.v. Iellato; doppo manco vinte minute pe ‘nu ‘mpiccio nun saccio a cqua coscia se n’êtt’ ‘ascí. Peccato![dô 20'  ZIELINSKI 5 Me dispiace, ma nun fove ‘nserata  nun sulo sbaglianno quase sempe ‘o pasiglio (passaggio) o ‘a cunchiusione, ma jettanno ô viento paricchi pallune ‘a ggestiunà (gestire) assaje meglio; che peccato, ma po’ ccapità]

CALLEJON [Peppe ‘a ‘nguenta] 5,5  No, ajere  nun me piacette: se jette annascunnenno, se facette vedé poco e mmaje riuscette a ttirà; tutto summato meglio quanno tiraje â bbannerella. [da ll'86'  ROG 6 ‘e stima- Trasette troppo tarde pe ffà coccosa.]

MERTENS[Ciruzzo] 6,5  Po’ pparé esaggerato ‘o seje e mmiezo, ma cu ttutto ca me fósse aspettato ‘e cchiú, me piacetteno assaje chillu  tacco ca libberaje ô ‘Ncrifato e cchillu tiro a ggiro ca sfurtunatamente se stampaje ‘ncopp’ô palo luntano.[da ll'82'  MILIK[Sant’Arcadio] 6 ‘e stima Soprattutt’isso trasette troppo tarde pe ffà coccosa!]

  INSIGNE [Lorenzigno] 6  Ll’aggiu levato miezu zifo (voto) pecché è overo ca ô ssolito se dètte da fà cu bbelli ghiucate e ccupulianno (dialogando) cu ‘e cumpagne, ma ‘nu poco pe ghiella futtuta, ‘nu poco pe troppa ‘mpricisione nun riuscette a ccentrà periculosamente ‘a porta. E cche saciccio!

all. SARRI 5  Nun s’ammereta cchiú ‘e tanto pe bbia d’’a capa tosta ca tène i ‘a fissazziona ‘e fà trasí troppo tarde cierti ppedine ‘mpurtante; pe gghionta ‘e ruotolo ajere perdette a mMarekiaro doppo sulo vinte minute e ‘stu fatto nun lle dètte ‘na mano. Pe ggrazzia d’’o Cielo però ‘o Masto lle levaje ‘e vvérole dô ffuoco i ‘a scuatra nosta  ‘na vota tanto  vincette senza ‘ncantà. Però va bbuono pure accussí, tutto fa broro!

Arb. PASQUA 5  Scadente. Grossi fetenzie nun ce ne facette, ma siscaje a bbienetenne dànno ‘a ‘mpressione ‘e passià p’’o campo senza sapé che ce facesse lla ‘mmiezo e ppecché se truvasse lla.

E ffermammoce cca cuntente d’essere turnate a vvencere pure si p’ uno a zzero e d’avé accurciato ‘o passo arreto â vecchia zoccola. Dummeneca  ca vene nun se joca e sse ne parla n’ata vota  sàpato trentuno quanno ‘o Ciuccio va  fora casa contr’ô Sassuolo [n’ata scuatra assineja (satellite) d’’a zoccola janca e nnera] ca ce aspetta pe gghiucà ‘a mubbara (partita) d’’a vita, ma i’ spero – si vo’ dDio - ca ve pozzo cuntà   ca ll’àmmu scardata ‘a zella e ‘ntussecata Pasqua e pPasquetta. Staveti bbe’. R.Bracale Brak