NAPOLI - ROMA ( 03/03/18) 2 A 4 ‘A VEDETTE ACCUSSÍ

NAPOLI   - ROMA ( 03/03/18) 2 A 4

‘A VEDETTE ACCUSSÍ

Tengo ‘o bbeleno nfi’ a ‘mpont’ô musso,  e sto’ talmente ‘ntussecato guagliú ca si donco ‘nu muorzo a uno, m’âte ’a crerere ll’acciro e ancòra nun me capacito d’’a jurnata accussí zezzosa ca schiaraje ajere  quanno, ‘mmerz’ê ccinche, nun sulo ‘a vecchia zoccola [naturalmente arrubbanno] jette a vvencere contr’â scuatra d’’o pappavallo ‘e Lotito p’uno a zzero a ppochi siconne dâ scumpetura... ma   addirittura po, a ttarda sera, ô san Paolo ‘o Napule mettette ll’uoglio ‘ncopp’ô peretto e ppigliaje ‘nu sciuliamazzo esaggerato e sse facette vattere pe cquatto a ddoje dê pecurare  rumanise pure essenno passato ‘nvantaggio ô 6’ cu lLorenzigno! Vuje capite mo ch’amara delusiona fove scetarese dô suonno turnanno cu ‘e piere ‘nterra doppo tanti mubbare (partite) vinciute...  e ppo  proprio ô mumento meno uppurtuno! Ma che ce vulite fà? Purtroppo ‘o pallone nunn’è ‘na scienzia esatta i ‘a Roma ca, ‘ncopp’â carta, era data pe ccotta e ppirciò êsse avut’’a perdere..., risuscitaje e cce  facette saglí ‘e llacreme a ll’uocchie mentre ‘o Ciuccio faceva cumm’ô cane d’’o cacciatore ca proprio quanno êss’avut’’a secutà ‘a lepera, s’accuvaje a ccacà. I accussí succedette ca ‘mmece dà ‘na risposta â vecchia zoccola, mo pure  rummanenno ancòra  lla ‘ncimma â crassifica d’’o campiunato, sentimmo cchiú pressante ‘ncopp’ô cuollo ‘o sciato  puzzulente d’’a zoccola. Ma i’ nun m’arrenno i ancòra ce voglio crerere ô priggetto ‘mpurtante â faccia ‘e nobbele, sdobbele e dd’’o munno sano!Certo ca è ttosta luttà cu cchi è ffavurita, prutetta i accumpagnata dô Palazzo, ma proprio chesto ce à dda fà capí ca nun ce putimmo permettere leggerezze o puttanate cumme a cchelle d’ajere quanno chille  d’‘a trasera (difesa) nosta facetteno a cchi metteva ‘ncoppa a sbaglià cu ‘o Masto ‘ntesta sotto vraccio cu mMarittiello e ccu rReina! Cose ‘e pazze! ‘Nzomma guagliú ‘na jurnata tanto tignuta ‘e marrò ca ancòra ne sento ‘o fieto e spero ca nun succede cchiú! Passammo ê ppaggelle:

 REINA 5 Nun me piacette nè cumme rummanette fremmo a gguardà ‘o pallone ca se ‘mpezzava ‘mporta dopp’ô tozzi-tozza ‘nfra Marittiello i ‘o turco rumaniso, nè ‘a mancata littura d’’o mancino ‘a fora  ‘e Dzeko!

 HYSAJ 5,5  Perotti nun lle criaje prubbleme arreto, ma isso nun ne apprufittaje appressuranno (spingendo) poco i a bbienetenne.

  ALBIOL[‘O Masto] 5  Nun ce pozzo crerere, ma jette accussí, proprio accussí i ‘o Masto  s’addurmette ‘ncopp’ô primmo stuco (gol) ‘e  Dzeko, quanno cuncedette troppo a uno ca chello soprattutto sape fà: ‘a cabbesera (colpo di testa)! ‘Nu jucature cu ‘a ‘sperienzia ca tène ‘sti ccose nun ll’à dda fà!

  KOULIBALY 5,5   Tutto summato ‘o meno peggio lla ddereto, però  fove poco priciso quanno abbiaje ‘o muvimento, nè ccuntrastaje a dDzeko ‘ncopp’ô tiro a ggiro!

 RUI[Marittiello] 5   Troppo jellato, ‘o purtuchese; accumminciaje bbunariello ô 6’ cu ‘o bbassurero(suggerimento) pe iLorenzigno, ma po se perdette e sse purtaje ‘ncopp’â cuscienza d’’e quatto stuche (gol) rumanise  allimmeno dduje:ô 7’ chillo d’’o turco Under(ro) e soprattutto ô 79’ chillo ‘e Perotti! 

ALLAN 6  Uno d’’e meglie d’’o Napule; è overo ca accumminciaje a gghiucà  sulo doppo ‘nu quarto d’ora, ma po ce mettette ggenio, corza  e ccegna (grinta) e   ffove ll’urdemo a mmullà;  peccato ca ‘o juoco da pruvinciale rumaniso  [dieci jucature arreto â linia d’’a palla] nun lle permettetteno ‘e trasí dint’â muntaca (area di rigore).

JORGINHO 5,5 Pe  urtizzà (verticalizzare), sì ‘o ttentaje, ma ‘a Roma ca se  ll’aspettava, liggette súbbeto ‘e ‘ntenzione soje i ‘o stuppaje pure pecché ‘e cumpagne suoje nun cullabburajeno.

[Dô 75’   MILIK 5,5  Cchiú d’’o ppoco ca facette nun putette fà ‘mbuttigliato lla ‘mmiezo. Nun ce scurdammo ca turnaje ‘ncapo doppo cinche mise.] 

 ZIELINSKI 5  Niente ‘a fà, ajere ‘o guaglione nun me piacette, cunfermanno ca va bbuono si trase  currento sibbacco (a match iniziato); cumminfatte  nun lle riuscette ‘e sfruttà ll’accasione ‘e stà ô posto ‘e Marekiaro cuntentannose ‘e tanta corza, ma  cu ppoca qualità ‘a fora d’’o pasiglio a mMarittiello ô 6’. Troppo poco!

[Dô 65’  HAMSIK[Marekiaro] 5,5  Poco ‘e cchiú ‘e chello ca facette Zielinski; manco a isso nun lle riuscette ‘e dà chella qualità ca êsse vuluto Sarri!]

CALLEJON[Peppe ‘a ‘nguenta] 5,5 Nun fove ‘nserata; facette sí chilometre e cchilometre a sservizzio d’’e cumpagne, ma cu poca cunnimma; cumminfatte a ppe isso cchiú ‘e ‘nu palo cu ‘nu tiro ‘e squina (corner) nun ne cacciaje.  

 MERTENS [Ciruzzo] 6  Nce mecco miezu zifo (voto) ‘e cchiú p’’o stuco (gol) ca ô 92’ rennete meno amara ‘a mazzata pigliata, però p’’o riesto se jette annascunnenno o accussí me parette!

INSIGNE[Lorenzigno] 6,5   Êsase vuluto vencere ‘o sibbacco (match) a ppe isso; se dannaje ll’anema cercanno cuntinuamente ‘a porta, però ‘a truvaje sulo ô 6’ pecché p’’o riesto êtt’’a vedersela cu ‘o purtiere Alisson(ne) ca vincette ‘a brica (duello).

All. SARRI 5  ‘A scuatra soja nun se po’ permettere ‘na mubbara (partita) cumme a cchella d’ajereI duminata ‘int’â mità ccampo avverza, ma  scumbinata dint’â soja cu troppi puttanate e sventatezze!

Arb. MASSA i ‘a chenca soja 4 Me deludette pur’isso ‘stu bbancario licure ca ati vvote ce aveva purtato bbuono, ma ajeressera truttaje p’’o campo cummigliannose ll’uocchie pe nnun vedé cumme nun vulette vedé a fFazio ca dint’â muntaca (area di rigore) rumanesa,  ê spalle afferaje p’’a maglietta a cCiruzzo e s’’o carraje ‘nterra. Forze êssemo perzo ô stesso, ma isso nce ajutaje p’’a scesa!

E ffermammoce cca. ‘A mazzata è stata pesante, ma nun penzammo ca tutto è pperzo! Ce avimm’’a crerere ô stesso e repigliarce accummincianno ggià da dummeneca ca vène  jenno a sfidà ll’Interre a mMilano e ssi vo’ dDio ve ne parlo llunnerí. Staveti bbe’! R.Bracale Brak