MILAN – NAPOLI (15/04/18) 0 A 0 ‘A VEDETTE ACCUSSĺ

MILAN – NAPOLI (15/04/18) 0 A 0

‘A VEDETTE ACCUSSĺ

Che peccato guagliú! Nun ce simmo, nun ce simmo e nun ce simmo! Ajere a ll’ora d’’a tiella ‘o Ciuccio jette a ssan Siro contr’ê diavule russe e nnire, ma doppo d’avé perzo quarantacinche minute ‘e ‘nu primmo ajone passato a ccammenà, ‘mmece ‘e correre  se resulvette a ttentà coccosa sulamente a ll’arrancua (ripresa), ma senza maje riuscí a mmettere seriamente ‘mpericulo ‘a porta ‘e Donnarumma ‘a fora ‘e ‘na granna accasiona capitata, quase ô prazzo (alla fine) ‘ncopp’ô pere ‘e sant’Arcadio ch’era trasuto ô posto ‘e Ciruzzo ô 66’...e ca però ‘a sciupaje pecché  tiraje ‘nchiana terra ‘mmece ‘e sott’ô travesagno (traversa)cunzentenno a dDonnarumma ‘e devià ‘o tiro e ffà ‘na bbella fijura.. Cunchiusione? Cunchiusione ca ô 93’, quanno Banti [ca grossi fetenzie  nun ce ne facette]siscaje ‘o prazzo (fine) ce purtajemo â casa  ‘nu punto scartellato ‘e ‘nu russimmo (pareggio) ca nun servette e nnun serve  a nniente.’Nzomma, me ripeto, nun ce simmo e cce putimmo sulo ‘ntussecà!

Passammo ê ppaggelle: 

REINA 6,5   Soprattutto p’’o primmo ajone (tempo) quanno s’allungaje ‘nterra fermanno ‘na cunchiusione ‘a luntano ‘e Bonaventura  e anticipaje ‘na vota  a  cKaliniccio e n’ata a cCalhanoglu.A ll’arrancua  (ripresa) se guardaje ‘o sibbacco (match).

MAGGIO 6  Bbona atalossa (prestazione) d’’o Vicchiariello ca s’’a vedette cu  cCalhanoglu senza maje jí dint’ê cchiavette.

ALBIOL[‘O Masto] 7,5 Cummannaje a mmestiere ‘a trasera (difesa) e llevaje ‘a miccia a ‘nu paro ‘e palle periculose.

KOULIBALY[‘O Gialante] 6  Bbona ll’atalossa (prestazione d’’o ggialante ‘e culore; peccato pe cquacche sfregazzo (sbavatura) quanno accumminciaje ll’azziona; nutizziato (ammonito)[ma se ll’era cercato...] à dda zumpà ‘a mubbara (partita) cu  ll'Udinese.

HYSAJ[Meza Cucchiara ] 5,5  Miso a mmancina nun se facette vedé ‘ncoppp’â curzia e nunn’ appressuraje (spinse) accuntentannose ‘e cuntrullà a  sSuso pure si nun sempe ce riuscette.

ALLAN[‘O Ncrifato] 5  Me dispiace, ma nun me piacette troppo: currette sí assaje, ma senza zuco nè ccunnimma p’’o juoco ‘e Sarri e sse ‘nzertaje (inserí) troppo poco! [da ll'86' ROG  s.v. Se po’ ffà poco ‘int’a cquatto minute!].

JORGINHO 6  Nun pozzo dicerle niente jucaje ‘nu tummulo ‘e palle pure si cu troppa lentezza.

HAMSIK[Marekiaro] 6 Passanno ‘e minute criscette cumme a ttutta ‘a scuatra e doppo ‘nu primmo ajone (tempo) ‘nzurdina sagliette ‘e tuono a ll’arrancua (nella ripresa) Sprecaje ‘nu paro d’accasione, ma tutto summato forze nun ll’êsse levato!  [dô 66' ZIELINSKI 6  Facette ‘o ssuojo, ma sempe  cu ppocu zuco!]

CALLEJON[Peppe ‘a ‘nguenta] 5 Sulo ‘nu tiro ‘int’â curva e ppoco ato; ‘nzomma fallette una d’’e sibbacche (match) cchiú ‘mpurtante d’’a tempurata  (stagione).

MERTENS[Ciruzzo] 5 – Sparaje ‘ncuollo a dDonnarumma ll’unica palla seria d’’a mubbara  (partita) soja e pp’ ‘o riesto  aizaje porvera pe ttutt’’o fronte uffenzivo senza maje  riuscí  a ascí dâ morza ‘e  Zapata e mMusacchio [dô 66' MILIK 5 – Me dispiace ma nun pozzo metterle ‘e cchiú visto ca sbagliaje ‘o pussibile 1-0 ‘a poche passe ô 92’,. E cche saciccio!]

 INSIGNE 5,5 – Tutto summato ‘o meglio ‘e lla ‘nnante, ma ‘nu poco ‘a ‘mpricisione, ‘nu poco  Donnarumma nun riuscette a ttruvà ‘a porta.

all. SARRI 5  Nun se vincette e pur’isso tene ‘e rrespunzabbilità ssoje!

arb. Banti 5,5 Cumme v’aggiu ditto grossi fetenzie  nun ce ne facette.

E fermammoce cca. Jette cumme jette e ppacienza se vede ca accussí era destinato. Ve saluto e, si dDi’ vo’ ce sentimmo ggioverí ca vene quanno spero ‘e puterve cuntà ca ‘o Napule miercurí a ssera à vattuto ll’Udinese ca scenne ô san Paolo. Staveti bbe’ r.Bracale Brak