‘NZALATA ‘E FASULE CANNELLINE

‘NZALATA ‘E FASULE CANNELLINE

Chello ca ce vo’ pe quatto perzone Tre buccaccielle (de ‘nu quarto ll’uno) ‘e fasule cannelline arvate (lessati), ‘na grossa pummarola custuluta,lavata asciuttata e tagliata a fellocce ‘e miezu centimetro, 200 gramme d’aulive ‘e Gaeta desciussate, ‘na cepolla ndurata ammunnata e ntretata, ‘nu tuppeto ‘e vasenicola lavato, asciuttato e murcellato (spezzettato) a mmano senza curtiello, ‘nu bicchiere d’uoglio ‘auliva dunciglio, tre tazzulelle d’acito ‘e vino janco, sale fino e ppepe janco mmacenato a ffrisco (q.c.n.v.)  comme se fa Revacà ‘e fasule arvate  dinto a ‘nu culaturo e sciacquarle sotto a ll’acqua fredda; scularle bbuono e metterle  dinto a ‘na zupperella; agnadí  ‘e fellocce ‘e pummarola, ‘a cepolla ntretata  e  ll’aulive desciussate; ammiscà  dellicatamente cu ‘na cucchiarella ‘e lignamme. Dinto a ‘na ciutulella  sbattere cu ‘na furchetta ll'uoglio, ll'acito, ‘o ssale e ‘o ppepe janco mmacenato a ffrisco. Ricà a ffilo ‘sta sarzulella ‘ncopp’â ‘nzalata ‘e fasule,agnadí  ‘o tuppeto ‘e vasenicola lavato, asciuttato e murcellato a mmano senza curtiello, ammiscà e primma ‘e servirla fà passà ‘sta ‘nzalata mez’ora p’ ‘a jacciaja. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale

.