TRASETURA ‘E MULIGNANE SPIRITOSE

TRASETURA ‘E MULIGNANE SPIRITOSE

chello ca ce vo’ pe 6 perzone

6 mulignane longhe viulette napulitane,

4 spicule d’aglio ammunnate e ntretate finu fino,

2 tuppete ‘e vasenicola lavate e asciuttate,

2 tazzulelle ‘e acito ‘e vino russo,

‘nu bicchiere d’uoglio dunciglio,

sale duppio ddoje vrancate,

sale fino e ppepe janco macenato a ffrisco q,n.s.

comme se fa

Spuntà  ‘e mulignane, lavarle, asciuttarle e tagliarle p’ ‘o lluongo a ffelle doppie nun cchiú ‘e  ‘nu miezu  centimetro;  sestimarle a ccuscie [derrammate (cosparse) ognuno ‘e sale duppio] dinto a ‘nu scolapasta pe ‘na mez’ora. Scularle, sciacquarle sotto a ‘nu strèpeto d’acqua fredda, spremmerle, asciuttarle e cocerle dduje minute pe faccia ‘ncopp’ a ‘na chiasta vullente. Tenerle ‘ncaudo; fraditanto mettere dinto a ‘nu mmiscatore ‘a vasenicola lavata e asciuttata, ‘o ttrigliato d’aglio,ll’uoglio, ‘na tazzulella d’acito russo sale fino e ppepe janco macenato a ffrisco q,n.s. e farne ‘na sarzulella spiritosa.  Sistimà una vicina a ll’ata ‘e ffelle ‘e mulignane dinto a ‘na sperlonga, derrammàrle cu ‘a sarzulella ‘e vasenicola e farle  arrepusà  pe dudice ore dint’â jacciaja. Serví accumpagnate ‘a fellocce ‘e pane abbrustuluto ‘nzieme  a ffellate ‘e salame, prusutto e capecuollo e a ppiezze ‘e caso staggiunato. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e aggarbbatéve ‘o vernecale!! Raffaele Bracale