SAMPDORIA – NAPOLI ( 13/05/18) 0 A 2 ‘A VEDETTE ACCUSSÍ

SAMPDORIA – NAPOLI ( 13/05/18) 0 A 2

‘A VEDETTE  ACCUSSÍ

E i’ mo che v’aggi’’a dicere guagliú? Che ve pozzo dicere? Sulamente: peccato! Sí è stato ‘nu vero defàuto perdere ‘stu campiunato sulamente pecché ‘int’a ttre o quatte mubbare (partite) chiave quacche gghiucatore è vvenuto meno ‘int’ê mmecce i ‘o muntarribbo (trainer) cucciuto nun à tenuto ‘o cuorio ’e nunn’ ‘e ffà jucà. E ssantu dDio d’ammore, ‘sti ccose nun se fanno! Nun se po’ ‘nguajà ‘na facenna sulo pe ccucciutaggine. Manco  ‘o Cielo ’e pperdona ‘sti delitte; sperammo sulo ca Sarri  ll’à capíta e ssi ‘o campiunato ca vène resta cu nnuje i avessemo ‘a stessa accasione ‘e chistu campiunato, nun facesse ‘a stessa fessaria.Tanto ditto, turnammo a ajeressera quanno ‘o Ciuccio jette a vvattere  ô Luigi Ferraris ‘a Sampedoria e risulvette ‘a prattica sulo a ll’arrancua (nella ripresa) quanno Sarri se decidette a ffà trasí a sant’Arcadio ca ô 72’ lle levaje ‘e ccastagne dô ffuoco  appena dduje minute doppo da ch’era trasuto...i ‘a jonta ce ‘a mettette ‘o Masto a ll’81’ cu ‘na granna cabbesera  (colpo di testa). Capite? Tutto a ll’arrancua (nella ripresa)  doppo ‘nu primmo ajone (tempo) senza zuco e ccunnimma cu ‘na   Sampedoria ca se difennette sulamente! È overo ca Ciruzzo era riuscito a mmeterla dinto ‘na palla, ma chella fetenzia ‘e ll’arbitro  Gavillucci [4]e cchillu cecagnuolo d’’o culleca d’’a Varra [2], nun vulenno vedé ca ‘a palla Ciruzzo ll’êv’’avuta da ‘nu duriano,  nun avevano cunvalidata ll’addaffa (rete) chiammanno n’attasallulo (fuorigioco) ca nun ce steva... quindi per indi poi êttem’ aspettà ll’arrancua (ripresa) pe vvedé ca Sarri se decidesse a ffà ‘o nicessario cagno levanno a cCiruzzo e mmettenno a sant’Arcadio ca – cumme v’aggiu ditto – sfruttaje a mmestiere ‘a siconna palla ca avette e cu ‘na bbotta fremma a ggiro da fora muntaca (area di rigore) ‘a mettette sotto ll’afachía (traversa). ‘Assa fà ô Cielo! Sulo pe cronaca ve dico ca doppo  ll’addaffa (rete)  d’’o pulaccone ll’arbitro êtt’’a fermà pe ttre mminute ‘o sibbacco (match) pe bbia d’’e curudíe (cori) ‘e male parole uffenzive d’’e cchiú strunze  muidde (tifosi) duriane.’Nzomma quanno ll’arbitro ô 96’ se decidette a ammiscà ‘o mazzo ‘o Napule se mettette tre ppunte ‘int’â sacca purtannose ‘ncrassifica a 88 punte, cosa ca rappresenta ‘o sàggialo  (record) ‘e punte p’’o Ciuccio ‘nseria A, ma ca nun c’è avastato pe vvencere chillu cacchio ‘e  scutetto..., mannaggia ê cane ‘e canciello! Che peccato!

Passammo ê ppaggelle:

REINA 6 Urdema mubbara (partita) fora casa cu ‘a maglia d’’o  Napule e sserata udú (tranquilla): nunn’êtt’’a fà particulare tacculle  (interventi)

HYSAJ[Meza Cucchiara] 6  Solita atalossa (prestazione) carimma (generosa) ‘e ll’arbanese ca appressuraje (spinse)cuntinuamente.

ALBIOL[‘O Masto] 7 Nun  sulo cumannaje ‘a trasera (difesa) a mmestiere e ‘nchietta cu ‘o cumpagno ‘e sezziona (reparto) nun facette passà a nnisciuno, ma se levaje pure ‘a suddisfazziona ‘e nchiudere ‘a prattica cu ‘na granna, preputente cabbesera (colpo di testa) centrale.

KOULIBALY[‘O Gialante]  7  Atalossa (prova) da ‘ncurnicià; ajeressera ‘o ggialante fove ‘nu muro vuauro (invalicabile).

MARIO RUI 6,5 Serata pusitiva;cupuliaje (dialogò) ‘ncopp’â curzia soja e   ffove isso ca cu ‘nu granne tiro ‘e squina (corner) furnette palla ô Masto.

ALLAN[‘O ‘Ncrifato]  6,5  Tutto cegna (grinta) e ccorza fove ‘a solita culonna d’’a scuatra e servette a sant’Arcadio ‘a palla ‘e ll’uno a zzero.

JORGINHO 5  No, ajeressera nun me piacette;nun sulo ll’atalossa (prova) soja fove scunnita, ma cca e lla perdette quacche ppallone periculuso.Ascette troppo tarde. [Dall'81' ROG s.v.E ppe fforza! Trasette troppo tarde pe ffà coccosa!]

ZIELINSKI 6  S’’o mmereta ‘o seje, pecché pure si nun riuscette a ssignà, se dette da fà e  cce pruvaje allimmeno spisso.

CALLEJON[Peppe ‘a ‘nguenta] 5,5  Me fósse aspettato ca Sarri ll’êsse fatto arrepusà pe ‘na vota..., ma ‘mmece chi t’’o ddà: nun fove accussí i ‘o spagnuolo, a ccurto ‘e sciato,dimustraje d’attraverzà ‘nu mumento no. [Dô 67' HAMSIK[Marekiaro] 5,5 Miezu zifo (voto) mancante pecché trasette senza lassà ‘mpronta e ffove a ccurto ‘e ficre (idee); pe gghionta ‘e ruotolo ascette a cchi songo i’ e cchi sî ttu cu Ramirezzo e ll’arbitro ‘o nutizziaje (l’ammoní).]

MERTENS[Ciruzzo]  5,5  Purtroppo pure ajeressera ce cunfermaje d’essere stracquo e fora sciacalla (forma).

[Dô 70'MILIK[sant’Arcadio]  7  Trasuto troppo tarde, ll’avastajeno dduje minute i ‘a siconna palla tuccata  pe rrisolvere ‘a facenna... e sperammo ca Sarri ll’à capíta e se n’arricorda, si rummane, ‘a tempurata (stagione) ca vene!]

 INSIGNE[Lorenzigno] 5,5  Miezu zifo (voto) mancante pecché pure si ce pruvaje cchiú ‘e ‘na vota cu ‘o tiro a ggiro, maje centraje ‘a porta e sprecaje n’accasiona grossa cumme a ‘na casa a ttu ppe ttu cu ‘o purtiere duriano! E cche saciccio! 

all. SARRI 6  Soprattutto p’’o sàggialo  (record) ‘e punte, ma sbagliaje a ffà jucà a Peppe ‘a ‘nguenta e ccagnaje troppo tarde a cCiruzzo!Si rummane cu nnuje sperammo ca cagna capa!

arb. GAVILLUCCI 4   Sempe luntano da ll’azziona, siscaje a bbienetenne e, pe ppartito pigliato sempe contr’ô Ciuccio e cce facette ‘a ‘nfamità d’annullà ll’addaffa (rete) ‘e Ciruzzo  chiammanno n’attasallulo (fuorigioco) ca nun ce steva...   

E ffermammoce cca cu ll’amaro ‘mmocca p’avé sciupato ‘na granna accasione  e ssi dDi’ vo’ ce sentimmo lunnerí ca vene pe ccuntarve ll’urdema ‘e campiunato contr’ô Crutone ô san Paolo. Staveti bbe’!

Raffaele Bracale Brak