TREGLIE ‘E SCOGLIE A LLIMONE

TREGLIE ‘E SCOGLIE A LLIMONE

 

Chello ca serve pe 4 perzone:

ottuciento gramme   ‘e tréglie ‘e scoglie sventrate, scamate e llavate,

 mmiezu bicchiere d’uoglio d’auliva  dunciglio (exstravergine),

cinquanta gramme ‘e chiapparielle lavate e asciuttate,

‘nu cucchiaro ‘e pignuole,

miezu bicchiere ‘e vino janco,

‘o zuco‘e duje limune ‘e Surriento passato pe cculaturo ‘e setella,

 nu túppeto( un ciuffo) ‘e prutusino ‘ntritato fine fine

 ‘na presa ‘e sale duppio,

pepe niro macenato a ffrisco quanto ve ne piace.

prucedimento

Sventrate, scamate e llavate ottuciento gramme   ‘e tréglie ‘e scoglie. Mettitele dinto a ‘nu tianiello cu mmiezu bicchiere d’uoglio d’auliva dunciglio,cinquanta gramme ‘e chiapparielle lavate e asciuttate, ‘nu cucchiaro ‘e pignuole,miezu bicchiere ‘e vino janco e ‘o zuco, passato pe cculaturo ‘e setella, ‘e duje limune ‘e Surriento e ‘na presa ‘e sale duppio. Facite cocere a ffuoco doce pe ‘nu quarto dora. A taniello scummigliato facite astregnere ‘nu poco ‘a sarzulella; fora d’ ‘o ffuoco  aunite ‘o túppeto( un ciuffo) ‘e prutusino ‘ntritato fine fine e sservite.

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco di Tufo) fridde ‘e jacciaja.

Magna Napule, bbona salute! Scialàteve, e addecriateve ‘o vernecale!

R.Bracale Brak