VIRZO E RRISO â NAPULITANA

VIRZO E RRISO â NAPULITANA

Assodato apprimma (premesso) ca a Nnapule s’ausa poco ‘o riso  ‘a fora ca p’ ‘o sartú,virzo e rriso,  riso e ppatane e sulo ‘a poco riso â piscatore assodato apprimma chesto,  ‘sta vota parlammo proprio  ‘e ‘na ricetta antica che è appunto virzo e rriso   ca fuje ‘nventata pe ffà ‘nu menestone puveriello e sparagnà ‘e ausà troppa rrobba (patane, fasule, accio eccetera) e accuntentarse sulo ‘e ‘nu bbellu virzo majateco (grande).

Venimmo â riggetta, ca si è ccucenata a mmestiere mettennoce tutto chello ca ce vo’(accummincianno dâ ‘nzogna e dê ccotene)  è ssapurita assaje  e aggarba  ‘a vocca e ‘o  vernecale.  

Chello ca ce vo’ pe sseje perzone

‘nu bbellu virzo majateco  (grande) ‘e seje o sitticiento gramme,
- miezu chilò ‘e riso
-  ‘nu spiculo d’aglio spugliato e ntretato,

- ‘na cepolla rossa ammunnata e ntretata,
- duiciente gramme ‘e cotena ‘e prusutto fiammiggiata, tagliata a strisciulelle quanto a  ‘nu dito, lavata e sculata,

- ‘nu cucchiaro ‘e ‘nzogna,

- miezu bbicchiere  d’ uoglio ‘auliva dunciglio,
- ciento gramme ‘e scorze ‘e pruvulone piccante d’ ‘o monaco crastïate (ben raschiate) e mmise a mmollo dinto a ‘na ciutulella d’acqua cauda,

- ‘na farínula  (un dado) pe broro veggetale,

 - cinquanta gramme ‘e furmaggio pecurino  tagliato a ffarínule piccerenelle,

-  sale fino  e ppe peniro macenato a ffrisco quanto   ve piace

Comme se prepara:

 Dinto a ‘na capace cazzarola pruvvista ‘e cupierchio,a ffuoco sustenuto, mettitece ‘a ‘nzogna e ll’uoglio e aunitece cepolla e aglio ntretate e facitece suffrijere‘e strisculelle ‘e cotena ‘nfunnennole cu ‘nu bicchiere d’acqua vullente nfi’ a cche nun songo bbuono ‘ntennerute  . Quanno so’ ccotte e ‘o  zzuffritto è divintato bello junno junno, avasciate ‘o ffuoco e menate dint’â cazzarola ‘o virzo precedentemente fatto fronne fronne, tagliato a ggiugliana  e llavato. Cummigliate cu ‘o cupierchio  e lassate cocere mmiscanno  ògne  tanto,sempe  a ffuoco vascio.
A mità cuttura aunite ‘e ffarínule ‘e furmaggio pecurino e  ‘e scorze  ‘e pruvulone d’ ‘o monaco crastïate (ben raschiate) e mmise a mmollo dinto a ‘na ciutulella d’acqua cauda;

quanno ‘o virzo è quase cuotto,allungate ‘na ciotola e mmeza d’acqua vullente addó avite sciugliuto ‘a firinula e bbroro veggetale, ammiscate e menate ‘o riso sciacquato e purtatelo a ccuttura ‘ncapo a ‘na  ventino ‘e  minute.
A ttutta cuttura avasciate miccio miccio ‘o ffuoco, scummigliate ‘a cazzarola e lassate repusà ‘stu virzo e rriso pe ccinche  minute e primma ‘e servirlo mmacenatece ‘a coppa paricchiu ppepe niro.
Pe cunziglio: nun ghittate ‘e scorze d’ ‘o pruvulone ca fosseno avanzate , ma ‘na vota ca ll’avite bbuono bbuono  crastïate (ben raschiate)  astipatavélle dint’ô fricorifero  arravugliate dinto a ‘na mappina ‘nfosa, ca pònno sempe serví!

Vino:  asciutte e prufumate janche ( Solopaca, Capri, Ischia, Falanghina, Fiano, Greco di Tufo) fridde ‘e fricorifero.

Mangia Napoli, bbona salute! E scialàteve!

Raffaele Bracale Brak