FARENATA CU ‘E FFAVE

FARENATA CU ‘E FFAVE

chello ca serve pe seje perzone:

Miezu chilo ‘e fave fresche

, Miezu chilo ‘e farenella gialla,

‘Nu bicchiere d’uoglio ‘aulive e.v.,

1 cepolla janca ntretata,

150 gramme ‘e pancetta tesa ntretata,

dduje cucchiare ‘e pignuole passate p’’o furno cavero (240°),

 ‘nu cucchiaro ‘e semmente ‘e fenucchio,

‘na presa ‘e sale duppio,

‘nu cucchiaro ‘e peperna spullecata,

sale fino e ppepe niro macenato a ffrisco dduje pizzeche.

comme se fa.
"Mettite ‘ncopp’ ô ffuoco  ‘na marmitta grossa cu ‘nu litro d'acqua e ‘na presa ‘e sale duppio; quanno ll'acqua jesce a vóllere,mettite miezu bicchiere d'uoglio e ‘a farenella: s’à dda ggirà comm’ ê sferre d’’o riloggio, cu ‘na cucchiarella ‘e lignammo e à dda cocere   pe quase 3/4 d'ora.
Priparate ‘e ffave a pparte, zuffrijenno dinto a n’ata marmettella vascia e larga ‘o riesto ‘e ll’uoglio assieme â cepolla e â pancetta ntretata; aunite ‘e ffave, appena lavate,cu miezu bicchiere d’acqua, ‘nu pizzeco ‘e sale e pepe, cummigliate e facite stufà pe ‘na mez’ora.
Quanno ‘e ffave e ‘a farenata sarranno cotte, mettite ‘nu cucchiaro ‘e peperna spullecata,avutate ancòra  e facitele cocere assieme ancòra pe dieci minute  mettennoce â fine  ‘o cucchiaro ‘e  semmente ‘e fenucchio, ‘e duje cucchiare ‘e pignuole e n’atu pizzeco ‘e pepe.

‘Mmece d’’e ffave fresche se ponno pure ausà ‘e favette secche, epperò primma d’’e ffà stufà, ‘e ffave secche s’ànno mettere a mmollo pe n’ora  dinto a acqua fredda cu ‘nu poco ‘e bicarbunato... e s’ànno’a cocere pe n’ora, no pe mez’ora!

Certo ‘e ffave fresche so’ cchiú mmeglio, ma vanno bbone pure ‘e fave secche sulo ca nce vo’ cchiú tiempo e pacienza!

Vini:  secchi e profunati bianchi campani ( Solopaca, Capri, Ischia, Falanghina, Fiano, Greco di Tufo) freddi di frigo

Mangia Napoli, bbona salute!E alliccateve ‘o musso pecché ‘sta farenata è sapurita assaje!

raffaele bracale