NAPOLI - CHIEVO (amich. 29/07/18) 2 a 0 ‘A VEDETTE ACCUSSÍ

NAPOLI -  CHIEVO (amich. 29/07/18) 2 a 0

‘A VEDETTE ACCUSSÍ

Tutto privisto, tutto a pposto, guagliú! Ajeressera ‘o Napule targato Jancone  scennette  ‘ncopp’ô panno ‘e bbigliardo d’’o campo ‘e Trento p’’a terza asciuta ammestosa (amichevole) i ‘a facette contro a cchilli chianchiere d’’e pariente lasche’e chella zoccola ‘e Giulietta ca pazziajeno a ffà male, ma s’êtten’’a fà cchiú ddinto ‘e dint’ô prozo pecché abbuscajeno ô stesso e ffoveno casticate ddoje vote, una p’ajone (tempo): Simone Verdi sbluccaje ‘a facenna ggià ô 10’ cu ‘nu granne  tiro a vvuolo, mettenno a frutto ‘na granna palla ‘e Lorenzigno, mentre êttem’ ‘aspettà   ll'86' pe vvedé  ‘o mutajaffo (raddoppio) uttenuto  da Tonelli cu ‘na tacatarrassa (colpo di testa) ‘ncopp’ô jabbro  (su cross) da dritta d’’o ‘Ncrifato. A Trento ‘o Jancone disignaje  ‘nu  Napule  classico cu ‘nu  4-3-3 addó ‘o Capitano fove cunfermato cumme zaniò  (playmaker) mentre ll’Anema longa s’’a vedette ‘nfra centro e mmancina e annante vedettemo Verdi e Lorenzigno ‘nzieme a sant’Arcadio; ‘e cuane (azzurri)  partettono bbuono i ‘o 4' Lorenzigno se truvaje a ttu ppe ttu cu Sorrentino ma sciupaje ll’accasiona  tiranno  troppo largo ‘e dritto.’A masciadda  (mira) matàla (perfetta) ‘mmece fove chella ‘e   Simone Verdi ca, cumme v’aggiu ditto piscaje, cu ‘nu tiro a vvuolo, ‘o curridore justo futtenno a sSorrentino e mmettenno a frutto chella granna pallqa ‘e Lorenzigno ca ‘o piscaje da chell’ata curzia. Da chillu mumento ‘o Napule facette ‘o juoco suĵo e sse spassaje passannose palla mentre chilli chianchiere, caprare ‘e ll’avverzarie abbiajeno a gghiucà pesante i a ffà male e ll’arbitro Sozza [3 e avasta ‘o nomme] se teneva ‘int’â sacca cartelline jalizze (gialli) e rrusse; ‘o primmo a ffarne ‘e spese d’’e mazzate fovwe Lorenzigno ca fove custretto a sse n’ascí ô 30’ pe ‘nu tarro (colpo) a ll’arcalla (caviglia) i ô posto suĵo trasette  Ounàs(se),súbbeto ‘mpalla, mentre ’e pariente lasche’e chella zoccola ‘e Giulietta cuntinuajeno a  ppazzià a ffà male, tentanno ‘e struppià a vVerdi e ll’arbitro... manco p’’o cacchio! Arrivate a ll’arrancua ‘o Jancone mannaje ‘ncampo a mMario Rui, ‘O Vampiro, ‘o Masto, Diawara,’o ‘Ncrifato  e Inglese, e ppo pure Tonelli,’o Carioca e  Grassi,i  ‘o Napule  cuntinuaje a sse prucurà bboni accasione, ma a ‘stu punto Sorrentino abbijaje a ccaccià ‘a scienzia, resistyenno e ddicenno no  a a Mario Rui ô 59', a Ounàsse ô 63', a Inglese da  dinto  â matacarmína  (area di porta) ô 70' i ô Vampiro ca ô 79’ curincaje (incornò) a bbotta sicura; dicette no pure a ‘nu bbellu tiro ‘e mancino d’Ounàs(se) a ll'84' ma duje minute doppo, cumme v’aggiu ditto, s’êtt’’a stà ‘ncopp’â tacatarrassa (colpo di testa)  ‘e  Tonelli ca ce assicuraje ‘o difinitivo doje a zzero, risultato justo che cunfermaje ‘o bbuonu mumento d’’o Napule; peccato sulo p’’e ttanti accasione mancate, pure si a ‘stu punto  ‘e priparazzione se ponno pperdunà.  

Passammo ê ppaggelle:

KARNEZIS 6  Nun êtt’’a fà quase niente e nun se fósse spurcato ‘e guante si nun lle fósseno arrivate ‘nu paro ‘e telefunate.(da ll’83’  CONTINI sv)

HYSAJ[Meza Cucchiara] 6,5 – Matalo (perfetto) quanno ascette o difennette, e sse facette vedé pure appressuranno (spingendo). [dô 66’ TONELLI 6,5 Miso a ffà ‘o terzino ‘e drittase facette apprezzà, ma soprattutto cu ‘a spicialità ssoja ce détte’o doje a zzero.]  

KOULIBALY 6,5  Nunn’êtt’’a fà cape d’angelo, ma fove sempre prisente difennenno a mmestiere e stutanno súbbeto quacche pussibbile tentativo d’’o Chievo. [dô 46’ ALBIOL[‘O Masto] 6 - Cumme ô cumpagno cumannaje a mmestiere ‘a trasera  (la difesa) i ‘e nassie  (attaccanti) avverzarie ammucciajeno súbbeto.]

MAKSIMOVIC 6  ‘Sta vota parette cchiú cuncentrato e nnun sbagliaje pasiglie (passaggi) riuscenno pure a mmettere quacche ppezza a ‘nu paro ‘e palle perze dâ mediana. [dô 46’ CHIRICHES[‘O Vampiro] 6,5  Se muvette bbuono ascenno palla ô pere e participanno a cquacche surtita uffenziva; sfresaje ‘e capa pure n’addaffa (rete).]

LUPERTO 6 Miso  a mmancina cunfermaje ‘e saperce fà mo ascenno e mmo accumpagnanno ll’azziona. [ dô 46’ MARIO RUI 6  Ggià trasuto ‘ncundizziona sustenette ll’azziona cu cqualità.]

ROG 6 - Quacche pallone ricuperato, ma pure cchiú ‘e ‘nu prano  (errore) quanno diammaje (appoggiò). ‘O Jancone ll’à dda cunziglià ‘e cchiú. [dô 46’  ALLAN[‘O ‘Ncrifato] 6 Assaje cchiú cqualità cu ‘o pallone ‘nfra ê piere, mettette ‘ncudizziona ‘e cumpagne ‘e tirà e de jabbrà (crossare), suĵo ‘o jabbro (cross) pe ll’addaffa (rete) e Tonelli.]

HAMSIK[Marekiaro] 7  Overo ‘o capitano, cumme dicette ‘o Jancone, dètte ‘a ‘mpressione d’avé sempe jucato lla ‘mmiezo; mannaje ‘mporta ddoje vote a lLorenzigno e ssempe mmesurato nun facette maje ‘na jucata sballata.[ [dô 46’ DIAWARA 6  Quacche bbona istiglia (verticalizzazione), jenno a ppezzecà ‘e cumpagne ‘nfra ê linie; peccato pe quacche sfregazzo (sbavatura) ‘mpruvviso ca ‘o Jancone nun s’aspettava!] FABIAN RUIZ[Anema Longa] 6,5  Cunfermaje tutte ‘e cqualità soje! [dô 66’ GRASSI 6  Buone vinte minute cu pperzunalità e presenzia.]

VERDI 7   Facette vedé bbelli ccose  dopppo d’avé sluccato ‘o sibbacco (match) cu n’addaffa (rete) da applavuse; spustasose a mmancina ô pizzo ‘e Lorenzigno, asciuto, jucaje pochi ppalle.[dô 66’ VINICIUS[‘O Carioca] 6  Miso a ffà ‘o carigginno  (esterno) facette quacche cusarella ‘mprucressione e sse facette nutà pe ‘na cabbesera  (stacco .]di testa)

INSIGNE 6 Se fósse mmeretato ‘e cchiú pe cchella palla da ‘na curzia a n’ata ca permettette a vVerdi ‘e sbluccà ‘o sibbacco (match), ma pe ‘na cosa bbona fatta ‘int’ô primmo quarto d’ora, ne sbagliaje n’ati ttre! E cche ccacchio! Mazzuliato a mmestiere da chillu samente  ‘e Tanasijeviccio fove custretto a sse nn’ascí doppo mez’ora! [dô 30' OUNAS 7  Trasette súbbeto ‘nsibbacco (nel match) e soprattutto a ll’arrancua (ripresa) facette fedé ‘e surice russe a ll’avverzarie;’mpignaje Sorrentino da fora ‘nu paro ‘e vote e n’ata vota cchiú ‘a vicino.]

MILIK[Sant’Arcadio] 6 ‘e stima  pecché ‘o guaglione se muvette bbuono dannose da fà, ma ‘e cumpagne nun ‘o cercajeno e nnun ‘o vedetteno lassano sulo. [dô 46’ 1'st INGLESE 6- Se magnaje ‘nu stuco (gol) permettenno a sSorrentino ‘e fermarlo ‘ncopp’â linia ‘e porta... P’’o riesto facette atto ‘e presenza e nnun se ‘ntricaje e nnun se ‘mpicciaje cumme si ‘o fatto nun fósse d’’o suĵo; êtte ‘a penzà: “Ma chi m’’o ffa fà ‘e ‘mpignarme contro a ‘sti quatto scieme ca me ponno fà male?” E che cacchio!]

all. ANCELOTTI [‘O Jancone]6 ‘E stima.

E bbasta accussí; fermammoce cca  e ssi dDi’ vo’, ce sentimmo p’’a vota ca vene ca mo nun saccio quann’è e addó è. Staveti bbe’. R.Bracale Brak