WOLFSBURG-NAPOLI (amich. 11/8/2018) 3 A 1 ‘A VEDETTE ACCUSSÍ

WOLFSBURG-NAPOLI (amich. 11/8/2018) 3 A 1

‘A VEDETTE ACCUSSÍ

Nun ce pozzo crerere  guagliú, nun ce pozzo crerere!Nun me fósse maje aspettato  ca  ll’urdema ammestosa (amichevole) ‘nternazziunale, chella  d’ajere ‘mmerz’ê ssette, jucata dô Napule d’’o Jancone a  vWolfsburg(o) contr’â scuatra lucale d’’e lupacchiotte terische,sibbacco (match)ca rappresentava ‘nu  n’itibbarro (test) ‘mpurtante p’’e guagliune d’’o Jancone  se fósse cunchiuso cu n’ata scutuliata doppo chella asseccata dô Liverpooll(o), mmece, mannaggia chi ll’è stramusica, accussí jette a ffení cu ll’azzimma (sconfitta)  d’’e nuoste [ca scennetteno ‘ncampo cu ‘na muntazzimma (divisa) da sputarle ‘nfaccia,brutta cchiú d’’a misera, certamente arrubbata a pPugliano o Resina ‘mmiez’ô terzo scarto d’’e ppezze vecchie] e cu     

‘a nichemata (vittoria) d’’e terische cu ttutto ca  ’e nuoste  s’appresentajeno  cu n’armidanno (centrocampo) assaje artachío (tecnico) e dde qualità ca però nun  servette ‘mprimmose a ffà da culaturo (filtro) ‘nnante â trasera (difesa); e accussí jette a ffení malamente cu ‘o nattiggio (risultato) ô 90’ ‘e tre a uno p’’o  Wolfsburgo ca cu ddoje addaffe (reti) ‘nfra ‘o 71’ i ‘o  74’ doppo chella d’’o 43’ adderezzata da sant’Arcadio sulo  ô 70’.Vuje capite cumme stammo mise? ‘A nichemata (vittoria) contr’ô bBorussia Dortmund aveva araputo ‘na senga ‘e luce ‘mmiezo a ‘nu cielo ‘e neglia, ma ‘a paccariata pigliata ajere ce dice ca nun putimmo tené ancòra nisciuna arichinna (certezza) cu ‘o Jancone ca cuntinua a sperimentà cumme si tenesse chi sa’ quantu tiempo addó ‘o campiunato accummencia ggià dummeneca ca vène cu ‘a (trasferta) a rRoma contr’â Lazzio!Stammo overo mise cu ssette parme ‘e saciccio e nun pozzo annasconnere ca sto’ ‘nu poco preoccupato cumme – penzo – pure cchiú dd’uno ‘e vuje, guagliú, ma simmo nate pe suffrí e ll’âmm’a fà bbuono!

Turnanno â mubbara (partita) dicimmo ca pp’e primme minute se jette sustanzialmete cu ‘o sibbemolle, chianu chiano e ccuoncio cuoncio tanto ca ‘o primmo periculo purtato  dê padrune ‘e  casa arraje sulo doppo durice minute,   ma pe ffurtuna Arnold(e)  nun furzaje ‘a  mana i ‘o Creco reopuzaje (respinse) ‘a palla, mentre êttem’aspettà ‘o 14′ pe vvedé ca Larenzigno facesse ‘o prurito a  Casteels. Ll’arbitro [ca nun me ricordo ‘o nomme] rumpette ‘o saciccio siscanno ògne ttanto pure quanno nun fósse stato ‘o caso  e ttutto chesto mentre Marekiaro cercava ‘e metterse ‘nnarraissa  (in cattedra) addó ca  ll’accasione ‘e signà s’’a jette a pprucurà ‘o Masto, purtatese ‘nnante, jenno a ccercà ‘a porta cu ‘nu bbellu dritto poco auto; ora mo mentre  ‘o Napule pareva ca tenesse bbuono ‘o campo, senza però essere periculuso... ‘o bbi’ lloco ll’acqua!: ‘o Wolfsburgo a ffriddo ô 43’, caputiatose ‘o juoco â ‘ntrasatta,Brekalo approfittaje d’’o spazzio truvato e dô lemmeto, senza ca nisciuno ‘o cuntrastasse casticaje ‘o Creco, ca, fremmo cumme a ‘na statua ‘e sale, vedette ‘e passà ‘a palla e nnun   muvette ‘na mana!I accussí fenette ‘o primmo ajone (primo tempo). A ll’arrancua (nella ripresa) ‘o Jancone facette cchiú ‘e cagno facenno trasí ‘ncampo    ‘o Ncrifato, ‘o Marrucchino  [Malcuit(te)],Ciruzzo e vVerdi ô posto ‘e Zielinski ‘e Meza Cucchiara, Lorenzuigno e pPeppe ‘a ‘nguenta. Avettemo ‘o tiempo ‘e vedé ‘na fessaria ‘e ‘nu terisco ca passanno, corta, ‘na palla arreto  mettette  ‘ndifficultà ‘o purtiere Casteels ca se vedette fottere ‘a palla da sant’Arcadio ca però nun riuscette a ssignà datose ca se truvaje troppo spustato. Ô 61′ ‘o Napule cagnaje ancòra cu Diawarà i ‘a bBelva trasute ô posto ‘e Marekiaro e de ll’Anema longa.  ‘Nzomma scuatra ancòra cumpletamente manzacca (stravolta)  cu ‘e meccaniseme ancòra poco scuiuovete; però... però ô 70’ finalmente sant’Arcadio adderezzaje ‘a varca sfruttanno cu n’ andivinato tacatarrassa (colpo di testa) ‘nu bbellu jabbro (cross) da mancina ‘e Mario Rui.  Che ve penzate ca ‘o Napule se fósse scurciato ‘e mmaneca pe ccercà ‘e vencere? Addó!?   ‘O Napule, cumme ggià era succieso cu lLiverpool(le) e Borussia Dortmund(e), ufferette troppi spazzie arreto i ‘o  sguizzero Mehmedi n’apprufittaje e  ‘int’a ttre ssuli minute ne facette carne ‘e puorco signanno ddoje addaffe (reti) [71’ e 74’] i ‘a siconna fove addirittura ‘nu rijalo d’’o Creco ca nun riuscette a ‘ntercettà ‘nu jabbro (cross) facile da dritta facenno passà ‘a palla. E cche ccacchio! E nnuje nce appresentammo ‘ncampiunato cu ‘nu mammuoccelo simmelo? Cu ddoje addaffe ‘nsotto che vvuó adderezzà cchiú?

Passammo ê ppaggelle :

KARNEZIS 5  Facette quacche cusarella, ma nun dètte nisciuna sicurtà (sicurezza)e sse purtaje ‘ncopp’â cuscienza allimmeno ‘o tre a uno!

HYSAJ [Meza Cucchiara] 6  Facette ‘o ssuojo pure senza esaggerà. [dô 46' MALCUIT[‘o Marrucchino] 5,5 Tenette perzunalità  e ccorza quanno appressuraje (spinse), ma nun me piacette cumme difennette.]

ALBIOL[‘O Masto] 5 Me dispiace, ma ajere, chiammato a ttroppa fatica difenziva, sbagliaje cchiú ‘e ‘na vota cuncedenno troppo spazzio ‘ncopp’ô primmo stuco (gol)  e nun chiudenno ‘ncopp’ô terzo [dô 75' MAKSIMOVIC s.v.]

KOULIBALY 5,5 Miezu zifo (voto) mancante pecché ‘o vedette troppo preoccupato datose ch’êtt’’a faticà assaje e facette quacche sfregazzo (sbavatura) ascenno.[dô 75' CHIRICHES 6 ‘e stima]

MARIO RUI 6,5  Se dette da fà a mmancina appressuranno (spingendo) assaje. Pennellaje isso ‘o jabbro (cross) miso a ffrutto da sant’Arcadio.[dô 75' LUPERTO sv]

FABIAN RUIZ[Anema longa] 6  Quanno êtte ‘a fà ‘nu mestiere ca nunn’è ‘o suojo: ‘o cane ‘e presa, nun me piacette, ma p’’o riesto niente ‘a dicere. [dô 61' ROG[‘A bBelva] 6  Corza, cegna (grinta)  e asciarra (cattiveria) nicessaria, nun riuscetteno a bbluccà ‘e ttemmidde (ripartenze) d’’e terische. Peccato.]  HAMSIK[Marekiaro] 5,5 Miezu zifo (voto) mancante pecché cumme direttore d’urchestra  faticaje a ttruvà ll’amecca  (profondità) e ll’êsse avut’’a fà!

[dô 61' DIAWARA 5,5 Miezu zifo (voto) mancante pecché pur’isso cumme ô bBelva nun riuscette a bbluccà ‘e ttemmidde (ripartenze) d’’e terische.] ZIELINSKI 5,5 Miezu zifo (voto) mancante pecché turnato dopp’ô ‘mpiccio a ll’arcalla (caviglia),preoccupato cchiú d’’o nnicessario nun furzaje e ttiraje spisso ‘o pere arreto cullizziunanno cchiú ‘e ‘na fessaria, nun penzo ca ‘o Jancone contr’â Lazzio  lle dà ‘o posto ‘e titulare. [dô 46' ALLAN 6  Nicessario ca trasesse, ma puette fà poco: corza, cegna (grinta) e ricupere ‘e palla , ma pure quacche prano (errore) ‘int’ô stritto.. C’’e pperdòno!]

CALLEJON [Peppe ‘a ‘nguenta] 5,5 Miezu zifo (voto) mancante pecché nun facette ‘nu granché: ‘nu tiro rimpallato e cchesto è ttutto; p’’o riesto nun riuscette a ccumbinà cu ‘e cumpagne e aizaje porvera. [dô 46' VERDI 6   Se dètte da fà cchiú d’’o culleca sustituito, puntanno ‘a muntaca (area di rigore) e cumbinanno cu ‘e cumpagne ‘e sezziona (reparto).]

MILIK[Sant’Arcadio] 6,5  Risposta pusitiva d’’o pulaccone ca signaje pure ajere ‘e capa e ne sfresaje n’ato; nun sulo se dette da fà ‘mpressiona custante e cumbinanno cu Ciruzzo. [dô 75' OUNAS sv]

INSIGNE [Lorenzigno] 5,5  Miezu zifo (voto) mancante pecché nun facette ‘nu granché: ‘a fora ‘e quacche bbona ppalla ‘mbucata pe Mario Rui,p’’o riesto nun riuscette a ffarese nutà ‘mpusitivo, ma sulo p’’e prane (errori) cumme a cchillo ca fove causa d’’a primma addaffa (rete). [dô 45' MERTENS[Ciruzzo] 6  Poche tarribbe (allenamenti)doppo ll’atalle (vacanze e sse vedette quanno jucaje da fremmo, ma se dette da fà appressuranno (spingendo) pruvanno ‘o tiro e cupulianno bbuono cu sant’Arcadio.]

All. ANCELOTTI[‘O Jancone] 5 quanno se perde ‘o primmo a pperdere e avé tuorto è ‘o mutarribbo (allenatore) respunzabbile nun sulo d’’a poca priparaziona d’’a scuatra a ‘na semmana dâ primma ‘e campiunato, ma pure de cuntentarese ‘e ‘na uarrada (rosa) ‘ncumpleta soprattutto ‘mporta addó pe mmo tenimmo ‘nu mammuoccelo p’’o triato d’’e pure. È overo ca isso stesso cunvenette dicenno ca cu ddoje azzimme (sconfitte) ‘int’a ttre mubbare (partite) ce s’à dda preoccupà, ma ‘a respunzabbilità è dd’’a soja e ffacesse meaculpa, meaculpa e mmettesse primma ‘e mo ‘na toppa a ll’epata (fase) difenziva addó se cummettono troppi prane (troppi errori)!

Ll’arbitro PINCO PALLINO [ nunn’’o ssaccio!] 5 Siscaje troppo i a vvacante!

E ccu cchesto ve saluto e cce sentimmo, a dDi’ piacenno, dummeneca ca vene  doppo d’’o sibbacco (match) ‘e sapato diciotto   contr’â Lazzio, primma ‘e campiunato e    sperammo ca pozzo cuntareve ca nunn’avimmo accuminciato cu ‘na fijura marrò! 

Staveti bbe’. R.Bracale Brak