TORINO – NAPOLI (23.9.18) 1 A 3 ‘A VEDETTE ACCUSSÍ

TORINO – NAPOLI (23.9.18) 1 A 3

‘A VEDETTE ACCUSSÍ

Tutto a pposto, guagliú, tutto a pposto! Ajere a ll’ora sconceca e ll’apritivo ‘o Napule jette a tTurino, ma no dint’ô cesso d’’a vecchia zoccola bbenzí ‘int’ô viecchio Ulimpico e ss’’a jette a vvedé cu ‘a scuatra ‘e Mazzari e sse ne turnaje cu ttre punte dint’ô sacca doppo d’avé ‘ntummata ‘a furmazziona d’’o livurnese cunzignannole tre ppurpette: ddoje cu lLorenzigno [ ô 4’ i ô 59’] e una cu vVerdi[ô 20’] e ffovemo furtanate ca riuscettemo a vvederele dàtose ca ‘ntelesivione se vedette ‘ncopp’a cchella fetenzia ‘e Dazzon(ne)ca, pe cchello ca costa e tte dà è n’arruobbo civile. Però lassammo perdere e ddicimmo ca se trattaje ‘e ‘nu sibbacco (match) ncono (avvincente) cu quacche surpresa, pe mmano ‘e ll’arbitro Irrati [2 e ppo ve dico.]cu ‘nu primmo ajone (tempo) jucato  a  zzureje (ritmi) assaje aute e cu ‘na nadda (ripresa) assaje meno ncona (avvincente), ma sinamparco  (comunque) spassosa cu ttutto ca ‘o Napule rallentaje ll’azziona soja. ‘E nuoste  ‘nchiudetteno ‘a prattica ggià doppo ‘e primme 45 minute jennose a ppiglià ‘o ttè ‘nvantaggio pe ddoje a zzero e agghiustaje ‘o piso â nadda (ripresa)  signanno ‘a terza addaffa (rete) doppo ca chella mmunnezza d’ Irrati êva dato ‘a pussibbilità a bBelotti d’accurcià signanno [ô 51’] ‘nu ricore ca servette sulo a ffarece ‘ntussecà.

Mo però passammo ê ppaggelle:

OSPINA[Pastacrisciuta] 6  ‘E ‘ncuraggiamento pecché ‘a jurnata p’isso fove  tutto summato cuieta (tranquilla): durante primmo ajone (tempo) avette unu tiro centrale  i ‘o paraje,mentre  â nadda (ripresa)  se ll’ett’’a vedé sulo cu ‘o ricore ‘e bBelotti e sse facette spiazzà!

HYSAJ[Meza Cucchiara] 5,5 miezu zifo (voto) mancante pecché appressuraje (spinse) meno d’’o nnicessario e rrestaje ‘e guardia ô bbidone cu quacche sfregazzo (sbavatura), ma pe  ffurtuna senza cunzequenzie.

 ALBIOL[‘O Masto] 6  Se dètte da fà mo accuttanno (anticipando) ll’avverzarie mo ausanno ‘e mmanere cauzante. Chillu fesso  d’Irrati ‘o nutizziaje (ammoní) senza ch’êsse fatto niente!

KOULIBALY[‘O gGialante] 6  Mettette ‘a musarola a zZaza  e sSirigu nunn’’o dètte ‘e sfizzio ‘e signà  smanaccianno, nun saccio comme,   ‘na  tacatarrassa (colpo di testa) soja.

LUPERTO 5  ‘Nu zifo (voto) mancante pecché è ffesso e sse vedette quanno facette chillu peccato veniale ‘ncuollo a bBerenguer(ro); Irrati, ca chello aspettava,   cuncedette ‘nu ricore ‘o Turino ca si no, penzo,  nunn êsse signato maje! Peccato.  Ascette ô 72’ pe ‘nu ‘mpiccio  a ll’arcalla  (caviglia) [Dô 73' MAKISMOVIC 6 Ll'accuglienza fredda  d’’e viecchie  muidde   (tifosi) nun lle faccette nè ccaudo nè ffriddo].

CALLEJON[Peppe ‘a ‘nguenta] 6,5 ‘Na spina ‘int’ô scianco d’’a trasera (difesa) ‘e Mazzarri currenno pe ttutt’’a curzia ‘e dritta, dànno ‘na mana arreto; servuto a cciammiello fravecaje ‘int’ô palo ‘na palla ca turnanno arreto addeventaje chella d’’o tre a uno!

HAMSIK[Marekiaro] 6 – Fistiggiaje ‘a trecentientesima mubbara (partita)[299 cu ‘o Napule e 1 cu ‘o Brescia!] cu ‘na bbona atalossa (prestazione) ‘int’â pusizziona nova cu quacche arranca (miglioramento) a ppietto ‘e ll’urdema vota, allummanno ‘o juoco cu llanze ‘e primma ‘ntenziona. 

ROG[‘A bBelva] 4,5  Tanto se mmereta pecché fove ‘o peggio d’’e nuoste. Tutto ‘o primmo ajone (tempo) ‘nzurdina senza riuscí a ffà niente ‘e chello ca sape e ppo’ ffà; s’abbuscaje pure d’essere nutizziato (ammonito) e nn’êsse pututo fà a mmeno; nun migliuraje manco  durant’ â nadda (ripresa) e ddoppo n’ora ‘o Jancone ‘o levaje.[Dô 60' ALLAN[‘O ‘Ncrifato] 6  Trasette e ddètte ‘na bbona mana a mmantenere ‘a natiggia  (risultato).]

VERDI 7   Cagnaje spisso ‘a pusizziona cu ‘e cumpagne mannanno ô manicomio ll’avverzarie ca p’’a primma mez’ora nunn’ ‘o  riuscetteno a ppiglià. ‘N’applavuso a pparte pe ll’azziona ca accumminciaje  ô 20’ e ccunchiudette isso stesso purtannoce ‘ncopp’ô doje a zzero![Dô 54' ZIELINSKI 6,5  Quanno ‘o Turino steva tentanno ‘e ricuperà, trasette isso rijalanno ajàvia (vivacità) â scuatra soja ‘int’’ô mumento cchiú ddificultuso.Dô pere suojo partette ll’azziona d’’o tre a uno!]

INSIGNE[Lorenzigno] 7,5  Ajere nun me deludette: arapette e nchiudette ‘o sibbacco cu ‘na bbella pareglia, dànno raggiona ô Jancone ca ll’à truvato ‘na puzizziona a cciammiello.

MERTENS[Ciruzzo] 7  Sbariaje pe ttutto ‘o fronte uffenzivo senza cuncedere punte ‘e merca (riferimento).Soja ‘a jusaida (assist) pe ll’addaffa (rete) ‘e Verdi.

all. ANCELOTTI [‘O Jancone] 7  À dda sulo faticà pe ddà arasmarra (continuità) â scuatra soja, ca p’’o riesto picette, visto ca vincette e cummincette.

arbitro IRRATI [2]  Me penzavo ca chisto fósse sulo  scemo,ma ajere dimustraje ch’è ppure surdo e ccecato e pprubbabilmente se nn’è ffujuto dô Cottolengo..., però  ce porta bbuono! Cu cchisto nun âmmu maje perzo e cquase sempe vinciuto, comme succedette ajere cu ttutto ca ‘sta mmunnezza  ce dètte   ‘nu ricore contro pe ‘nu peccato veniale ‘e Luperto; p’’o riesto e  ttanto pe nnun cagnà  siscaje ad capocchiam, caputiaje cchiú ‘e ‘nu carí (fallo), rumpette ‘o saciccio mettennose pe ‘mmiez’ê piede d’’e nuoste, nun nutizziaje (ammoní) cchiú ‘e ‘nu  chianchiere d’’a bbanda ‘e Mazzarri ,ca facetteno ‘e capuzielle, mentre ‘e nuoste foveno prive ‘e dicere a n’avverzario: che bbell’uocchie ca tiene.., ch’isso ‘e nnutizziaje (ammoní) però nun ce putette pecché nuje vincettemo e nce  ‘o mettettemo a ppitoffio ‘mprimmose a isso!

E ccu cchesto ve saluto dannove appuntamento si dDi’ vo’ a

ggioverí ca vene doppo d’’a nutturna ‘e miercurí contr’ô Parma speranno ‘e putereve cuntà n’ata  bbella cosa.

Staveti bbe’!

R.Bracale Brak