NAPOLI-ROMA (28.10.18) 1 A 1 ‘A VEDETTE ACCUSSÍ

NAPOLI-ROMA (28.10.18) 1 A 1

‘A VEDETTE ACCUSSÍ

No, guagliú nun ce simmo; sto’ avveluto! Me penzavo ca doppo d’’a bbella mubbara (partita) jucata a pParigge, sfresanno ‘a nichemata (sifiorando la vittoria), ajeressera ô san Paolo ‘o Ciuccio êsse fatto unu muorzo d’’a scuatra ‘e chillu zappiello ‘e Di Francesco vincenno e tenenno ‘o passo d’’a vecchia zoccola  ca a Empoli s’era fatta aiutà da Calvarese a ppurtarese â casa ‘e tre ppunte.... e ‘mmece, mannaggia a cchillu demmonio scartellato, ‘e pecurare rumanise, addivintate – a cquanto pare ll’arvascia (bestia) nera  nosta – ce custrignetteno a ‘nu russimmo (pareggio)

p’uno a uno, acqua ca nun leva sete e ca  serve sulamente â vecchia zoccola ca mo s’è mmisa seje punte ‘nnante! Capisco meglio ‘nu russimmo (pareggio) ca ‘nu caucio ‘int’ê rine visto ca agguantajemo ll’uno a uno sulo ô nuvantesimo  cu cCiruzzo e dô quattuordicesimo stevemo abbuscanno p’uno a zzero e ppareva proprio ‘nu sibbacco (match) signato, uno ‘e chille ca ‘o pallone nun ne vo’ sapé ‘e trasí ‘mporta.... Capisco tutto, ma nunn’ ‘o rriesco a pparià e mme sento ancòra’o stommaco ‘nzubbuglio penzanno ca ‘a Roma, apprufittanno ‘e ‘nu sbandamento difenzivo nuosto signaje  a friddo cu El Shaarawy [14’] e ppo jucaje ‘na mubbara sulo armedabba (speculativa)  mettenno ‘ndifficultà  ‘o  Napule ca  senza spazzie nun se raccapezzaje cchiú attaccanno a ccapa sotto ma cu ppoco zuco e ssenza cunnimma datose ca sulo ‘nu paro ‘e vote stette lla lla pe ssignà, senza ce riuscí, anze sciupanno ll’accasione avute e ssulamente ô 90’, cu ll’urdemu araddo (assalto) Ciruzzo ‘o mettette a ppitoffio a Olsen(ne). Meglio ‘e ‘nu caucio ‘int’ê rine, ma troppo poco, troppo poco!

Passammo ê ppaggelle:

 OSPINA 6.5  Nun fove itimma (colpa) soja ‘o stuco (gol) pigliato e pp’’o riesto fove attiento e ppriciso  quanno venette chiammato ‘ncausa, soprattutto ascenno. Assaje bbello ‘nu lanzo ‘e sittanta metre pe cCiruzzo.

HYSAJ[Meza Cucchiara] 6 Facette ‘o ssuojo senza sfregazze (sbavature).[Dô 70’MALCUIT['O Tignuto] 6  Trasette diciso  a ffarese valé i ll’aradde (assalti) suoje a ddritta dètteno da fà a  cKolarov(vo).]

ALBIOL[‘O Masto] 6.5  Se facette apprezzà nun sulo pe cumme salvaje ‘ncopp’â linia ‘na palla velenosa, ma pe ccumme se muvette cuntinuamente gestiunanno ll’epata (fase) difenziva cuana (azzurra).

KOULIBALY[‘O Ggialante] 6  Ajere sufferette ‘nu poco areto e nun riuscette a ffarese vedé annante.

MARIO RUI 5,5  Miezu zifo (voto)mancante pecché nun sulo lassaje sulo a El Shaarawy ‘nnaccasione d’’o stuco (gol) rumaniso, ma pe ttutto ‘o primmo ajone (tempo) arrancaje malamente arreto... però facette coccosa ‘e cchiú attaccanno.

CALLEJON[Peppe ‘a ‘nguenta] 6.5 Mancaje ‘e cuncretezza, ma ‘e catie (tagli) suoje foveno ‘na spina ‘int’ô scianco rumaniso.

ALLAN[‘O ‘Ncrifato] 6 Primmo ajone(tempo) ‘e sustanza, po se ne scennette ‘e posa pavanno ‘a stracquezza ‘e tanti mmajache(battaglie) cumpresa chella ‘e Parigge.

HAMSIK[Marekiaro] 6  Appannato, s’arrangiaje cercanno ‘e tirà da luntano ma nun ne cacciaje niente.[Dô 75’ZIELINSKI  7 Fove  dicisivo pe ttruvà ‘o russimmo  (pareggio) e ppenzo ca  se fósse mmeretato ‘e jucà dô primmo minuto pe sfruttà ‘a sevatta (spinta) soja assaje sustanziosa.]

FABIAN RUIZ[Anema Longa] 6 Cchiú ffummo ch’arrusto, nun lle pozzo perdunà ll’accasiona sciupata quanno ‘ncopp’ô zzero a zzero, trasette ‘int’â muntaca (area di rigore) rumanesa se libberaje ‘e tre pperzone i a pporta spalancata, ‘mmece ‘e tirà, facette ‘nu pasiglio (passaggio) a lLorenzigno ca sciupaje. Però fove ll’unico ca riuscette a zzumpà sempe ll’ommo.

 INSIGNE[Lorenzigno] 6  Cumme a pPeppe ‘a ‘nguenta pur’isso mancaje ‘e cuncretezza sotto porta accuntentannose d’’o nummero a surpresa.

MILIK[Sant’Arcadio] 6 Partette bbuono faticanno d’arbadanía  (fisico),po abbandunato lla ‘nnante dê cumpagne ca nun ‘o cercajeno, nè lle detteno ‘na palla bbona o malamente ca fósse, perdette cuntatto cu ‘o juoco i ‘o Jancone s’’o chiammaje ‘mpanca. [Dô 56’MERTENS [Ciruzzo] 7  Trasuto ‘ntenziunato a ppesà, fove ll’unico ca cercaje e ttruvaje spisso ll’emecca (profondità)e nun mullaje nsi’ ô 90’, quanno finalmente casticaje a Olsen(ne) dànnoce ‘o russimmo(pareggio).]

all. ANCELOTTI [’O Jancone] 5,5 Nun lle pozzo mettere ‘e cchiú pecché nun se sapette ‘mmentà niente pe ffà vencere ‘a scuatra soja e se cuntentaje d’’o juoco mascullo  (brillante), ma senza emecca  (profondità) e fficre (idee), nè me piacette ‘o fatto ‘e tenerese ‘mpanca  azZielinski e de nun pruvà dô 75’ sant’Arcadio cu cCiruzzo tenenno fora  Anema longa.

arb.MASSA i ‘a chenca soja 4,5: Me deludette pur’isso ‘stu bbancario licure ca ati vvote ce aveva purtato bbuono, ma ajeressera truttaje p’’o campo cummigliannose ll’uocchie pe nnun vedé cumme nun vulette vedé a mManolas(se) ca dint’â muntaca (area di rigore) rumanesa dètte ‘nu sbuttulone fremmo ê spalle ‘e sant’Arcadio menannolo ‘nterra, addó a Empoli Calvarese dètte ‘nu ricore a dDybala  ca s’era menato ‘nterra futtennose â bbonanema ‘e Mario Merola, ‘nfromme ll’avverzario ll’êva guardato stuorto. Pe nun dà a vvedé se spassaje a cunzignà ê rumanise  quacché cartellino jalizzo  (giallo), ma nun ce  vulette dà ‘o gghiusto e  nnicessario!

Cunchiudenno dicimmo ca ce avessem’’a cuntentà d’avé tenuto sempe ‘mmano ‘o pallino d’’o juoco, ma chesto nun po’ avastarce visto ca nun sapettemo truvà spazzio ‘int’ô  cóvelo(catenaccio) urganizzato rumaniso; ce fósse vuluta cchiú arcajara  (fantasia) e cchiú ttaca (energia) ca tenettemo sulo ô 90’. Troppo poco!

Basta accussí Nun fove ‘na mazzata troppo pesante,e nnun penzammo ca tutto è pperzo! Ce se à dda  crerere ô stesso e repigliarce accummincianno a vvencere ggià da viernarí ca vène quanno ô san Paolo arriva ll’Empoli   e ssi vo’ dDio ve ne parlo sapato ca trase. Staveti bbe’! R.Bracale Brak