PARIS SAINT-GERMAIN - NAPOLI ( ciampionsa 24.10.18) 2 A 2 ‘A VEDETTE ACCUSSÍ

PARIS SAINT-GERMAIN - NAPOLI ( ciampionsa 24.10.18) 2 A 2

‘A VEDETTE ACCUSSÍ

Che scajenza guagliú e cche saciccio me sto’ rusecanno dê vvintitré d’ajeressera: roseco e sputo, roseco e sputo pecché proprio nun ce ‘a faccio a de ll’agliottermelo chillu russimmo (pareggio) pe ddoje a ddoje doppo d’’a brica (lotta) cu cCavani e ccumpagne... Cumme tutt’è rrilativo e ccumme tutto cagna da cumm’uno se pone a vvederela ‘na cosa! Sotto a cchillu stesso   russimmo (pareggio) ca marterí vintitré nc’ êsse miso no uno, ma dduje scippe  (firme), mo cumme a mmo nun me va d’azzettarlo e mme risulta ancòra troppo amaro penzanno ca ‘e francise  cu cchillu canchero ‘e  Di Maria stutaje ‘e suonne nuoste  a ccientovinte siconne dô mustalà  (fine) quanno, e cchi ll’avesse ditto?, stevemo vincenno pe ddoje a uno e ssi sulo êssemo tenuto tanto ‘e cazzimma c’êssemo purtate â casa tre punte! Nun ce riuscettemo e nnun me riesce ‘e pariarlo penzanno ca  ‘e guagliune d’’o Jancone  , doppo ‘e  primme  diece minuti d’’o sibbacco (match) lassate a lloro, tanto p’’e ffà sfucà, ma senza maje correre seriu periculo, abbiajeno a ppiglià ‘mmano ‘e rrétene d’’o juoco e arrivate ô 29’ sbluccajeno ‘a facenna cu ‘nu miezu cucchiaro ‘e Lorenzigno ca partuto centralmente cumme ‘nu treno fove servuto a zzuco ‘e caramello cu ‘na granna palla ca Peppe ‘a ‘nguenta da luntano a ggiro lle mettette ‘nnante ê piere! Maslaia (vantaggio) cchiú ca mmeretato visto ca poco primma Ciruzzo êva centrata ll’afachia(traversa) servuto dâ curzia da  Mario Rui; tutto chesto mentre ‘e  pariggine aqttaccavano a vvienetenne aizanno porvera. E ‘ncopp’ a ll’uno a zzero p’’o Ciuccio ll’arbitro ‘e mmannaje a ppiglià ‘o ttè. Turnate ‘ncampo purtroppo  Lorenzigno  êtte ascirsene  doppo ‘na bbbrutta bbotta avuta dint’ô scianco, bbotta  ca  ‘o lassaje senza sciato. Cavani e ccumpagne turnajeno campo dicise a ffà coccosa e cchiú, ma riuscetteno a mmetterse ‘ncopp’a ll’uno a uno sulo ô 61’ cu ‘nu smarditto attasallulo (autorete) ‘e Mario Rui ca a ccap’’e cacchio tavvillaje (deviò) a sciuliamazzo ‘mporta nosta ‘na palla misa ‘mmiezo da Meunier(re). ‘O Ciuccio però nun s’abbattette e ssenza scumponerese cchiú ‘e tante repigliaje a mmacenà juoco nsi’ a ttruvà ô 77’ ‘o surpasso nuovo cu cCiruzzo lesto, da granne figlio ‘e zoccola,a pprufittà ‘e ‘na palla schizzata tra issa i ‘o centrale franzoso doppo ‘na bbotta ‘a fora d’Anema longa; Quanno però ‘o sapore d’’a nichemata (vittoria) ggià ce steva adducenno ‘a vocca ‘ntribbuna divano e ggià penzavemo ‘e puté fistiggià ‘o Ciuccí sanGennaren(ne)... ‘o bbi’ lloco ll’acqua; chilli cinche minute ‘e  è ad un passo i cinque minuti ‘e ‘ntaiscionno (di recupero) foveno ‘na jastemma menata e ppe mmancanza ‘e cazzimma ‘e Mario Rui ca nun tenette ‘o cuorio ‘e ascí dâ muntaca (area di rigore) nosta p’affruntà a dDi Maria e ppure arrunzarlo facennose menà fora..., ‘o facette tirà a ggiro casticanno a pPastacrisciuta ca nunn s’’o mmeratava! E accussí, guagliú chella ducezza ca stevemo assapuranno addivintaje ‘mpruvvisamente tantu ttuosseco amaro i ô mustalà ce avettemo accuntentà ‘e ‘nu punto, ‘mpurtante sí, ma certo fósseno state meglio ‘e tre ca   ‘mmece ce avessemo purtato e nniciuno êsse pututo dicere niente vist ca ‘o Napule aveva cummannato ‘o juoco p’’e bbona parta d’’o fullé (gara) ‘int’ô statio pariggino nun dànno maje ‘a ‘mpressiona de stà ‘mpericulo, anze dimustranno ‘int’a ‘nu javallo (girone) addó ncevstanno  Liverpul(lo) e pParísangermèn(ne), d’essere scuatra ‘e granne caimmo (grande valore.) Pacienza!

Passammo ê ppaggelle:

 OSPINA[Pastacrisciuta] 7,5  Ddoje vote cu ‘e piere e ddoje cu ‘e mmane ‘o guardiano nuosto se facette rispettà quanno fove chiammato ‘ncausa. Fove traduto e nun ce putette fà niente da ll’attasalullo (autorete) e Mario Rui e dô tiro a ggiro ‘e Di Maria lassato libbero sempe  da Mario Rui.Nun se mmeretava ‘e piglià ddoje addaffe (reti)!

MAKSIMOVIC 6,5  Dê pparte soje nun se passaje; sott’ô Jancone è addivintato n’atu jucatore!

KOULIBALY[‘O Ggialante] 7  ‘Na vota pigliate ‘e mmesure ‘e ll’avverzarie nun ‘a facette bbona a nnisciuno; appilaje tutt’’e ppertose e nun passaje ‘nu suscio ‘e viento; ‘na vera trancara (muraglia).

ALBIOL[‘O Masto] 7 Se vedette ‘o jucatore ‘e granna ‘sperienzia: ògne ttaccullo (intervento) suĵo fove priciso e dde sustanza.

MARIO RUI 5,5  Miezu zifo (voto) mancante pecché si pozzo perdunarle ll’attasallulo (autorete) dicenno ca fove sfurtunato, nun pozzo perdurnarlo ‘e nun tené cazzimma e dde nun capí ca a dduje minute dô mustalà (fine) quanno se vence pe ddoje a uno, se fà carí (fallo) ‘ncuollo a n’avverzario, ma nun se fa tirà ‘mporta: ‘nu jucatore ‘e Ciampionsa nun po’ essere tanto smocco, tantu sciamegno!

ALLAN[‘O ‘Ncrifato] 7  Nun se cuntajeno ‘e ppalle  ca schiuvaje dên piere ‘e ll’avverzarie azzannanno ‘e feliette ‘e chi capitaje pe ttutto ‘o campo ; penzo ca ‘e francise ancòra s’’o stanno sunnanno!

FABIAN RUIZ[Anema longa] 7  Guaglione e bbuono dimustraje ‘e tené granna perzunalità e ssapé che ffà e cquanne ‘o ffà cumme ô tiro ca addiventaje ‘a palla bbona pe cCiruzzo. Bravo.

HAMSIK[Marekiaro] 6,5  Se sentette ‘a presenzia soja lla ‘mmiezo: ‘o capitano cumannaje ‘a varca a mmestiere e ssenza appaurarse.

CALLEJON[Peppe ‘a ‘nguenta] 7  Se facette apprezzà ‘int’ê ddoje epate (fasi) chiammannose ll’applavuso  cu cchella palla longa a ggiro misa ‘nnant’ê piere ‘e Lorenzigno pe ffarelo signà.[Da ll’ 88’ ROG s.v]

MERTENS[Ciruzzo] 7   Sfurtunato cu ll’afachia (traversa) coveta poco primma ca Lorenzigno signasse, riuscette a mmmettere palla dinto ô 77’ dànnoce ‘na speranza spalummata p’’a fessaggine ‘e Mario Rui ô 93’.[Da ll’84’ MILIK s.v.]

INSIGNE [Lorenzigno] 7,5  Nun sulo me piacette‘o miezu cucchiaro ca futtette a Areolà, tiro ca fove ‘na   vera  perna, ma pure cumme se prupenette pe gghí a rrecogliere palla; chi sa ch’ato êsse pututo fà si nun fósse stato custretto a tturnà ‘mpanca pe cchella bbotta carogna ca ‘o lassaje senza sciato!? Peccato.[Dô 53’ ZIELINSKI 6  Accumminciaje tartaglianno, ma po se repigliaje abbianno a rrialarce bboni gghiucate.]

.all. ANCELOTTI[‘O Jancone] 7  Quanno ‘na scuatra cumme ‘a soja, ‘ncasa d’’o Parísangermen(ne) cumanna ‘o juoco ‘e sfresa  (sfiora) ‘a granne ‘mpresa nun se po’ ccunvení ca ‘o muntarribbo (allenatore) ce sape fà e anze è uno d’’e meglie ‘ncirculazziona e ccu isso ‘o Napule po’ gghí luntano.

arb. ZWAYER 5,5  Quase fósse ‘ngrese e nno terisco siscaje poco e sbagliaje poco; però smarrunaje nun ghiettanno fora inglese fischiando pochissimo, nel finale a dDraxler(re) p’’o malu carí  (fallaccio) ‘ncuollo a  mMario Rui.

E ffermammoce cca guagliú ancòra magliecanno e sputanno..., ma ce avimm’’a rassignà: êssemo pututo vencere e nnun ce riuscettemo pecché ffovemo fesse e mmo nce attocca ‘e truvarce a ccinche punte arreto ô Liverpul(lo) a sseje!

 Cunchiudimmo: cumme v’aggiu ditto me fósse piaciuto ‘e putereve raccuntà ‘e   ‘nu nattija (risultato)addallo (migliore), ma jette cumme jette e ppacienza. Sperammo però mo  ca  ‘o Napule allimmeno ‘ncampiunato,riesce a ffà chello ca po’ e à dda fà dànnoce  ‘nu juoco urganizzato e nno a vvienetenne, facennose rispettà e vvincenno     accumincianno ggià  da dummeneca ca vène  quanno a ttarda sera ô san Paolo arrivano ‘e pecurare rumanise!  Accussí sperammo e ssi dDi’ vo’ ve ne parlo llunnerí ca vène. Staveti bbe’. R.Bracale Brak