UDINESE – NAPOLI (20.10.18) 0 A 3 ‘A VEDETTE ACCUSSÍ

UDINESE – NAPOLI (20.10.18) 0 A 3

‘A VEDETTE ACCUSSÍ

Sí guagliú ce vuleva,  ce vuleva proprio  chello ca succedette ajeressera quanno ‘o Ciuccio jenno ‘ncopp’ô campo chiammato Dacia Arena contro a cchilli quatto cammuriste ‘e ll’Udinese, doppo d’’a veffa  (sosta), vincesse, ce facesse divertí e sse mettesse ‘int’â sacca tre ppunte cauzante apprufittanno ca ‘a vecchia zoccola ‘na grama vota nun êsse vinciuto e fósse stata fermata ‘ncopp’ô russimmo (pareggio) dô Grifone russo e bblu, mentre – pe pparta soja –‘a Roma, a rRoma!, fósse stata addirittura mazziata pe ddoje a zzero dê quase scanusciute guagliune ‘e  Liunardo Semplici pe mmodo ca ‘o Ciuccio s’accustasse â vecchia zoccola e s’arrassasse dâ squatra d’’e pecurare ca dummeneca vintotto ce vene a ccunzulà ô san Paolo, subbeto doppo ca miercurí ca trase jammo a ttruvà ‘nCiampionsa ê guappe cumpagne ‘e Cavani e nunn’è ‘nu fatto tenneriello...  Ma nun voglio anticipà niente..., ‘na cosa â vota e pparlammo d’ajere dicenno  ca ‘o Napule nun sufferette cchiú ‘e tanto arreto,ma faticaje a ‘ngranà soprattutto pecché doppo manco quatto minute ‘o Jancone  êtte fà a mmeno ’e Verdi fermato da ‘nu ‘mpiccio musculare ca se prucuraje a ppe isso e avette ‘a mannà ‘ncampo súbbeto  Anema Longa scumpiglianno chello ch’êva pruggettato. Ll’arfasaddo (innesto) fatto  dô Jancone fove ‘a cchiú gghiusto e ‘o vvedettemo ggià ‘ncapo ‘e ‘na dicina ‘e minute [14’] quanno proprio ll’Anema longa facette n’ailla (prodezza) d’’e ssoje, sbluccanno ‘o sibbacco (match): se jette a ppiglià palla e ccu ‘nu tiro a cciammiello dâ mancina ‘a piazzaje ê spalle ‘e Scuffet(te)  ca ancòra sta chiammanno ‘o paraviso ‘nterra e nce aggi’’a mettere ‘o cerasiello ‘mpont’ô musso! ‘Ntribbuna divano ce credettemo ca ‘a facenna se fósse misa p’’a scesa: chi t’’o ddà?! Chilli zappielle cu ‘a magluia janca e nnera apprimma tentajeno ‘na riazziona ca nunn’apprudaje a nniente e ppo se mettetteno a mmazzià ê nuoste senza ca ll’arbitro[4 e ppo vedico] facesse ‘na chieja, mettenno ‘nsuggezziona a cquaccuno d’’e nuoste cusicché sulo a ll’82’ finalmente! ll’arbitro se passaje ‘a mana p’’a cuscienza ‘ncuzzuta ca tene e nce cuncedette ‘nu ricore ca Ciruzzo, ‘ncapo ‘e cinche minute ‘e traccamiento, mettette dinto spiazzanno a Scuffet(te) ca se menaje a dritta mentre ‘o pallone traseva da ll’auta parte e sse mettette ‘a siralàca (ceralacca) ‘ncopp’â facenna, piglianno ‘o ttavillo (largo) a ll’86’ cu ‘a Bbelva, ca appena trasuto mettette dinto ‘a terza palla, cosa ca ce permettete  ‘e vedé ‘a vecchia zoccola ‘nu poco cchiú vvicina i ‘e pecurare ‘nu poco cchiú lluntano e ttutto chesto fa cwertamente bbene a ll’ aracco  (morale) d’’o  Ciuccio primma d’’e francise ‘nCiampionsa.

Mo vedimmo ‘e ppaggelle:

KARNEZIS [‘O Creco] 6.5  Sempe attiento, pronto e ccuraggiuso ô nnicessario. Se facette apprezzà  soprattutto quanno  Lasagna, pe ddoje o tre vvote lle rumpette ‘o pasticciotto, ma isso rispunnette a ttuono.

MALCUIT[‘O Tignuto] 6.5  Accumminciaje chianulillo, ma po venette fora e a ll’arrancua (ripresa) dètte ‘o mmeglio tanto è overo ca da ‘na ‘ncurziona soja nascette ll’azziona  ca purtaje  ô ricore d’’o doje a zzero cuano.

ALBIOL[‘O Masto] 6 Appena ‘nu paro ‘e sfregazze (sbavature), ma senza cunsequenzie, ô primmo ajone (tempo), criscette a ll’arrancua facennose vedé pure annante cu zzuco e ccunnimma! 

KOULIBALY[‘O Ggialante] 6.5 ‘o solitu lione d’’a trasera (difesa) nun’’a facette bbona a nnisciuno e sse chiammaje ll’applavuso cu ‘nu sciuliamazzo mutàvvio (strepitoso) pe ffermà a Llasagna.

HYSAJ[Meza Cucchiara] 6.5  Facette sí cca e lla  quacche pprano  (errore), ma  see dètte da fà  cu ccegna (grinta) e azzaja (impegno) accussí cumme nicessetaje.

ALLAN[‘O ‘Ncrifato] 7.5 Sette purmune nun se fermaje maje dimustranno d’essere ‘o masto ‘e festa assuluto ‘e ll’armidanno (centrocampo)! Nun se ne po’ ffà a mmeno.

ZIELINSKI 6 Appannato, sotto porta sbagliaje cchiú ‘e ‘na vota pure pecché   ll'Udinese ne facette n’ usservato spiciale dànnole pocu spazzio. (Da ll’85’ ROG[‘A Bbelva] 7  Trasette e ‘ncapèo ‘e ‘nu minutp signaje: ma ch’ato se po’pretennere?

CALLEJON [Peppe ‘a ‘nguenta] 7 Cuntinuamente se ‘nsertaje cumme a ‘na spina dint’ô scianco d’’e janche e nnire e ppure si sbagliaje ‘na vota sotto â porta, se facette perdunà abbuscannose ‘o ricore funnamentale d’’o doje a zzero!

MERTENS[Ciruzzo ] 6,5 Miezu zifo (voto) ‘e cchiú pecché pure si pe  n'ora quase nun se vedette , trasfurmaje cu freddezza e ppricisione ‘o ricore d’’o doje a zzero e ccupuliaje (dialogò a mmestiere cu ‘a Bbelva ‘nnaccasione d’’o terzo stuco(gol)!

VERDI 6 ‘E stima, pecché cchiú ca jellato, doppo appena quatto minute se nn’êtt’ ‘ascí pe ‘nu ‘mpiccio musculare. Ma quanti cestarielle lle rompono ‘o saciccio?[Dô 4’FABIAN RUIZ [Anema Longa]  7  Nun sulo, quase appena trasuto, signaje ‘nu stuco cchiú ca ‘mpurtante e nnicessario, ma facette sentí ‘a qualità soja pure pe ttutta  ll’arrancua (ripresa) e nsi’ a ll’urdemo!]

MILIK[Sant’Arcadio] 6.5  Pure ajere dimustraje d’essere uno ca risulta nicessario ê muvimente d’’a scuatra e lla ‘nnante nun se ne po’ ffà a mmenoLl’avessen’’a prucurà quacche bbona palla auta dint’â muntaca (area di rigore) avverzaria... e nnunn’’o ffanno. Peccato! [Dô 74 HAMSIK (Marekiaro) 6 Trasette cu ‘a panza e ccu ‘o penziero e sse vedette: ‘o Napule se nne ggiuvaje sbrasanno. Bbuono arcabbanno (viatico) p’’a Ciampionsa!

all. ANCELOTTI [‘O Jancone ] 7  Certo nun fove ‘o megliu Napule nsi’ a mmo visto, ma  cuntaje assaje  vencere ‘ncopp’a  ‘nu campo cumme  ‘a Dacia Arena e ffacennolo pe ttre a zzero. Pure ajere azzeccaje tutt’’e cagne.  

Arb. MARIANI 4  Scadente cchiú ca no se facette sgamà quase subbeto ‘e stà ‘ncopp’ ô stato ‘e paca d’agnelli & ccumpagne siscanno e nutizzianno (ammonendo), pe ppartito pigliato, contro ê cuane prive ‘e fa ‘nu sternuto mentre ll’avverzarie, cumme a cchillu Samir(re), veru e proprio samente, putevano fà cose ‘e curtellate e isso nzerrava uocchie recchie e bbuco d’’o prozo. P’’o riesto se ‘nnammuraje d’’a Var(ra) ca lle cunzola ê sora moneca chiammannola ògne mminuto siconno e ppe ffurtuna ca  allimmeno ‘na vota lle  permettette   ‘e nun sbaglià ‘na siconna vota, ‘nnaccasione d’’o ricore signato  da Ciruzzo.

E chiudimmola cca  cuntente ‘e cumme jette pure si ‘a mubbara  (partita)fove jucata ‘nu poco cu ‘a martellina tirata, ma avastaje ca ‘e cuane (azzurri) appena riuscetteno a ttassarià (accelerare)  mettetteno ararabba (paura) ê janche e nniro e riuscetteno a ffà fèra chiena cu ‘na natiggia (risultato) sustanziuso!

Ve saluto e ssi ‘o Cielo ‘o vvo’ ce sentimmo ggioverí doppo d’’o sibbacco (match) cumpricato ‘e Ciampionsa  d’’o vintiquatto contro a cCavani e ccumpagne! Staveti bbe’!

Raffaele Bracale Brak