LIVERPOOL -NAPOLI( ciampionsa 11.12.18) 1 A 0 ‘A VEDETTE ACCUSSÍ

 LIVERPOOL -NAPOLI( ciampionsa 11.12.18) 1 A 0

‘A VEDETTE ACCUSSÍ

Che peccato guagliú, che peccato e cche ccollera ajeressera cu ‘o Napule jette ‘ncasa d’’o Liverpul(lo) cu dduje natigge (risultate )a ddispuzizziona e ‘mmece ‘ncappaje dint’ô terzo e pperdette, fove jettato fora dâ Ciampionsa  e mmo s’à dd’accuntentà  ‘e scennere a gghiucà ‘o turneo ‘e scarto aiurupeo. Ma pe ffoza, pe fforza! Cumme si nun fosseno avaste tutte ‘e cestarielle ca turmentano ‘o Ciuccio, ll’autriére ce se mettette pure Aurelione cundicenno ca si nun fossemo passate nun era ‘mpurtante… E cce menaje ‘a favetta! Cierti ccose nun se diceno e nnun se penzano! Naturale ca fenesse cumme fenette cu ‘o Liverpul(lo) ca ô 34’ signaje ll’addaffa (rete) ca ce cundannaje i ‘a signaje cu chella carogna ‘e Salàh ca apprufittaje ‘mprimmose ca chillu cecagnuolo ‘e ll’arbitro sluvacco nun cecaje a vvedé ca pe se ggirà e ttrasí dint’â muntaca (area di rigore) ‘o profuco cu ‘e ricce se libberaje ‘e Mario Rui, ca lle steva ‘ncuollo, facennolo fà ‘nu pirulé, e ppo lle venette bbona ca ‘o riesto d’’a trasera (difesa) nosta   quase s’addurmette e soprattutto ca Pastacrisciuta  lle se menaje ‘ncontro cu ‘e ccosce aperte! E cche saciccio! P’’o riesto è overo ca ce  mancaje ‘o ppoco ‘e bbona sciorta, ma è overo pure ca pe rrussimà (pareggiare)avettemo a ll’arrancua (nella ripresa) quacche bbona accasione, ma ‘e sciupajemo ‘mprimmose cu Ppeppe ‘a ‘nguenta ca mannaje ‘o pallone ‘ncurva ‘mmece ‘e fravecarlo ‘mporta e ppo, quase ô niajo (alla fine) cu ssant’Arcadio ca apprimma facette ‘nu granne cuntrollo ‘e palla, ma po ‘a tiraje ‘ncopp’â coscia d’’o purtiere accuvato a ccentro porta. Che peccato!  Dicimmo ca jucavemo ‘ncasa d’’e campiune d’Aiuropa e fforze perdere ce fósse pututo stà, ma farelo p’uno a zzero e ccu cu dduje natigge (risultate )a ddispuzizziona, è ‘na cosa ca te fà magnà ‘e mmane e aumentà ‘o ttuosseco ca c’êttem’ ‘agliottere e nn’arrivo a pparià nè ssaccio si succede e cquanno!

Bbasta accussí e ppassammo ê ppaggelle: OSPINA[Pastacrisciuta] 5 Me dispiace, ma tanto ce aggi’’a mettere pecché si è overo  ca a ll’arrancua (ripresa) facette bbelli ccose cchiú ‘e ‘na vota, nun lle pozzo perdunà chella fessaria ca nce custaje ‘a scunfitta e cce menaje fora; ma cumme se po’ fa? ‘Nu purtiere ‘e ‘sperienzia, nun po’ ffà chello ca facette isso ascenno ‘ncontro  a sSalah cu ‘e ccosce aperte cumme a ‘na vecchia puntunera i ‘a palla pe ddo’  lle passaje? ‘Mmiez’ê ccosce facile facile! Nun ce pozzo credere!!

MAKSIMOVIC 5.5  Miezu zifo (voto) mancante pecché sufferette troppo ‘a zzurea (velocità) ‘ Mané i ‘e ‘nzertamiente  (inserimenti) dâ bbanna soja ‘e Milner(ro), nè se facette vedé ‘nnante a ccercà ‘a porta cu ll’ardezza ca tene.

ALBIOL[‘o Masto] 6 Facette quase tutto ‘o duvere suĵo pure si fove miso ‘ntribbukle e ttempesta da Firmino e ccumpagnia ca scenneveno ‘mparanza.

KOULIBALY[‘O Ggialante] 6  ‘Sta vota, me dispiace nun pozzo metterle ‘e cchiú; fove isso sí ca se dannaje e ccuntrastà a sSalah senza troppi ricame, ma ‘nnaccasiona ‘e ll’addaffa (rete) ‘e ll’eggizziano fove ‘nu pesce ‘e cannuccia allargannose troppo senza tentà ‘o cuntrasto ‘na vota ca Mario Rui êva mullato ‘a presa! Che peccato!

MARIO RUI 5 ‘Nu zifo (voto) mancante i ‘o sto’ trattanno: spisso  Salah ‘o superaje ‘e forza o ‘e cazzimma e nnun fove capace ô 34’ ‘e nun farese trattà da strummolo. Ascette troppo tarde e ssulo pe prubbleme pimmece (fisici); i’ ll’êsse levato primma! [ Dô70′ GHOULAM 6  Tentaje ‘e fà coccosa scennenno mmancina, ma ‘o ffacette cu pocu zuco.]

ALLAN[‘O ‘Ncrifato] 6.5  ô ssolito fove uno d’’e meglie pe ccumme luttaje cu ccegna (grinta) i azzaja (rabbia)

HAMSIK[Marekiaro] 5,5 Miezu zifo (voto) mancante pure ô capitano ca facette coccosa sulo a ll’arrancua (ripresa) doppo ‘nu primmo ajone (tempo) troppo loscio  (opaco).

RUIZ 6  Se po’ ddicere ca fove uno d’’e poche a ttentà ‘e ‘mbastí azzione ‘mpurtante pe ttentà ‘e mettere ‘ndifficultà ‘a trasera (retroguardia) rossa, ma nisciuno lle dette ‘na mana.   [Dô 62′ ZIELINSKI 6  Facette ‘o duvere suĵo purtanno sale il â munavara (manovra) uffenziva d’’e cuane (azzurri), ma maje cercaje ‘a porta.]

CALLEJON [Peppe ‘a ‘nguenta] 4,5 Me dispiace, ma nun ce simmo;êsse avuo fà ‘e cchiú, ‘mmece se dimustraje troppo appannato e soprattutto,   sprecaje chella granna accasione ch’ avette e vv’aggiu ditto!.

INSIGNE[Lorenzigno] 4.5  Me dispiace, ma tanto se mmereta pur’isso:Lorenzigno zampettaje a vvacante cu  ttroppi vacheffe   (stop) e  ttanti pasiglie (passaggi) dicisivi sbagliate, senza cuntà ‘e tire ‘mporta a bbienetenne!

MERTENS[Ciruzzo] 5.5  Me dispiace ma pure a Cciruzzo ll’aggi’’a mettere miezu zifo (voto) mancante, pecché si è overo ca doppo pochi minute fove cuoveto ‘int’ a n’arcalla da ‘nu chianchiere ‘ngrese e stette lla lla p’ascí, nun se dimustraje a ll’ardezza d’’a situazziona e nnun se ‘mmentaje o tentaje coccosa pe ttutt’’o tiempo ca rummanette ‘ncampo; fóse stato meglio ch’asceva primma! [68′ MILIK [sant’Arcadio] 6  Cchiú ppusitivo ‘e Ciruzzo certamente; lle capitaje ll’accasione ‘e russimà (pareggiare), ma cumme v’aggiu ggià  cuntato, Alisson(ne) lle fermaje ‘o tiro centrale. Che ppeccato!] 

All. ANCELOTTI[‘O Jancone ]  5  Tanto ll’aggi’’a mettere, tanto!Quanno se perde ll’intimma (colpa) ‘mprimmose è d’’o mutarribbo (allenatore):  ajere nun sulo tardaje a ffà trasí Ghoulam(e) e ssant’Arcadio, ma nun se ‘mmentaje niente pe mmigliurà ‘a situazziona visto ca ‘a scuatra mancava ‘e safeneja (lucidità) e ca tenevemo nicessità ‘e signà! Da isso nun me ll’aspettavo!

arb. SKOPINA 5 ‘Ngenerale nun me piacette e  ssoprattutto ‘nnaccasiona ‘e ll’addaffa (rete) quanno, cumme v’aggiu cuntato nun cecaje a vvedé ca Salah se libberaje ‘e Mario Rui, ca lle steva ‘ncuollo, facennolo fà ‘nu pirulé e ttrasette dint’â muntaca (area di rigre) nosta.

E mmo fermammoce cca cu ‘o ttuosseco ca saglie e scenne p’’o cannarone. Ajeressera ce jette malamente  e ddammoce ‘nu pizzeco ‘ncopp’â panza e rrassignammoce: se vede ca accussí steva scritto ‘int’ô libbro d’’o destino. Turnammo a pparlà d’’o campiunato: dummeneca ca vène, ‘mmerz’ê sseje, se va a cCagliare. Voglio sperà ca se va lla e cce facimmo rispettà vincenno. Po, si ‘o Cielo ‘o vvo’ ve ne parlo llunnerí ca vène. Staveti bbe’ R.Bracale Brak