NAPOLI – BOLOGNA (209.12.18) 3 A 2 ‘A VEDETTE ACCUSSÍ

NAPOLI – BOLOGNA (209.12.18) 3 A 2

‘A VEDETTE ACCUSSÍ

‘Assa fà ô Cielo, guagliú ajeressera ô san Paolo  contr’â scuatra d’’e mmurtatelle d’Inzaghi scese a gghiucà ‘o sibbacco (match) d’’a vita cu ‘o sanco a ll’uocchie, ‘o Ciuccio vincette mantenenno ‘o passo d’’a vecchia zoccola [ca, mariola senza scuorno, facennose ajutà da ll’arbitro e dâ varra êva scunfitto ‘a Sampedoria pe ddoje a uno...] d’’a scuatra milanese ‘e Spalletti, ca vincette ancòra e ppe scagno p’uno a zzero e nun ce ‘ntussecajemo sciampagna, cutichino e mmennicule ‘e ll’urdemo ‘e ll’anno! Mettimmola accussí e ddicimmo ca vincenno, p’’o mumento avimmo prutetto ‘o siconno posto ‘ncrassifica ca, a ccumme vanno ‘e fatte ‘nnitaglia[senza sunnarce ati pescetielle fritte...] è ‘o cchiú ca putimmo fà. ‘Nzomma ajeressera  ‘o Ciuccio riuscette a  nchiurere  ‘o duimiladiciotto  cu ‘na nichemata  (vittoria) assaje  faticata contro â ‘na scuatra scamosa e ‘mpicciosa ca sfruttaje ô mmassimo ddoje accasione avute e ppe ddoje vote signaje apparanno ‘e ddoje addaffe (reti) fatte da sant’Arcadio [ô15’ iô 51’] e pperò nun tenette po cchiú ‘o tiempo pe rrussimà (pareggiare) chella ca a ll’88’ Ciruzzo piazzaje ê spalle ‘e Skorupski  e accussí ‘e nujate muidde (tifosi) putettemo fesiggià  ‘nu  Napule a 44 punte ‘ncrassifica.Meglio nun po’ gghí e ppacienza.

Passammo ê ppaggelle:

MERET[Lungagnone] 5,5: Mi dispiace, ma ll’aggi’’a mettere miezu zifo (voto) mancante pecché m’aspettavo ca ô san Paolo sse mantenuta ‘a porta acrata (inviolata), ‘mmece chi t’’o ddà?! ‘Mpignato ‘nu paro ‘e vote, ‘int’ê primme diece minute nunn êtte fà cape d’angelo pe rrisponnore prisente... però po ‘ncopp’a ll’addaffe (reti) ‘e   Santandèr(re) e dde Danilo rummanette fremmo cumme a ‘nu pupazzo ‘e stoppa senza tentà niente. E cche saciccio! Pe ffurtuna ca po ô niajio (finale) nun se facette fottere n’ata vota da Danilo.

MALCUIT[‘O Tignuto] 6,5 Appressuraje (spinse) paricchio e sse facette apprezzà pure areto nchiudenno ‘ncopp’a pPalacio lanzato a pporta; ‘nzomma ‘na mumazza atalossa (ottima prestazione) dimastranno ca ‘nfra chille d’’a trasera (difesa)  fove isso ‘o meglio pe mmeina e vvuduja (smalto e lucidità). Jusaida istinaja (assist fantastico) p’’o doje a uno ‘e sant’Arcadio!

ALBIOL[‘O Masto] 6: senza ‘o Ggialante sufferette assaje facennose ‘nu mazzo tanto pe ddà ‘na mana pure a cchillu ‘ntontaro d’’o cumpagno ‘e sezziona  cercanno ‘e mettere ‘na pezza ê ffessarie d’’o serbo; peccato ca nun ce riuscette   ‘nnacasione ‘e ll’addaffa ‘e Danilo!

MAKSIMOVIC[ ‘O‘Ntontaro] 5: Seh, seh, n’atu vullo e ppo se coce! Nunn’ è articulo suojo chillo ‘e metterse ô posto d’’o Ggialante. Facette troppi fessarie nun sulo cu pPalacio, ma cu cchi capitasse; sempe fora pusizziona, dimustraje ‘e stà a ccurto d’ammanna (sicurezza) e d’armucrarra (decisione); chi nun ce credesse jesse a gguardà cumme lassaje zumpà da fremmo a sSantarer(re) gacennolo signà   Pejo facette ‘nnaccasione d’’o doje a ddoje quanno ‘mpicciaje pure ô Masto ca cercava ‘e marcà a dDinilo: nunn’’o ffacette isso, nè ‘o ffacette fà ô cumpagno ‘e sezziona (reparto). Carté (disastroso)!

GHOULAM 6: À dda ancòra turnà isso! Ajere facette sí e nno ‘o nnicessario...  [dô 68’ MARIO RUI 6.5: Trasette bbuono i a cciammiello dànno sustanza a ll’epata (fase) difenziva (fase difensiva) i ‘o ddimustraje cu ddoje chiusure‘mpurtante.] 

CALLEJON [Peppe ‘a ‘nguenta] 5.5: Mi dispiace, ma ll’aggi’’a mettere pure a isso miezu zifo (voto) mancante pecché ajere nun piacete nè a mmeno nè ô Jancone scuntente ‘e vedé cumme tenette prubbleme a ccercà ‘a porta; tenite a mmente ca ô 50’, sulo a dduje passe dâ porta,   mettette ‘a palla ‘mmano  a Skorupski, ‘mmece ‘e fravecarla ‘int’â rezza. Naturale ca ‘o Jancone, scubnfurtato s’’o chiammasse ‘mpanca a ll’84’.Troppo tarde! [da ll’84’ OUNAS sv Nunn’avette ‘o tiempo ‘e fà coccosa!]

ZIELINSKI 5: Ll’aggi’’a mettere  a fforza  ‘nu zifo (voto) mancante pecché ajere nun ce piacette proprio: nun facette nè ‘a riggia,nè ‘o cane ‘e presa, nè riuscette maje a ‘nzertarse  (inserirase)zappettanno a bbienetenne p’’o campo senza cunchiurere manco ‘o saciccio... Peccato.

ALLAN[‘o ‘Ncrifato] 6.5: solita atalossa (prestazione) carimma (generosa) fatta ‘e cegna (grinta) corza e azzaje (impegno) pure pe ffà chello ca nun facette Zielinski.

VERDI 5.5: Mi dispiace, ma ll’aggi’’a mettere pure a isso miezu zifo (voto) mancante  pecché m’aspettavo ‘e cchiú ‘e chello ca facette ajutanno  sí a gGhoulam,ma nun riuscenno maje a ffarese vedé a ccercà ‘a porta e vvenenno meno assaje a ll’arrancua (ruipresa) tanto ca ‘o Jancone se ll’êtt’’a chiammà ‘mpanca! [dô 58’ st FABIAN RUIZ[Anema Longa] 6: Mettette cchiú arizzanno (  equilibrio) dànno ‘na mana a Zielinski e truvanno quacche bbona galliffa (sgroppata)periculosa.]

MERTENS[Ciruzzo] 7,5: Fove isso a mmettere ‘ncundizzione sant’Arcadio ‘e darece ‘o vantaggio; se spustaje ‘ncopp’a ttutt’’a limia d’acco mo da cca, mo da lla  cercanno pure a porta e poco primma d’’a mez’ora sulo ‘nu grane taccullo (intervento) ‘e Skorupski nun lle permettette ‘nu tuco (gol) assaje bbello;êttemo dicere grazzie a isso si fistiggiajemo datose ca fove isso cu ‘na cresommola da fora ca fove ‘na perna mettette ‘a palla ‘mporta facenno ‘nchiana terra ‘a bbarba ô palo ‘e dritta, dànno ô Napule i a nnujaute ‘a suddisfazziona ‘e vencere! 

MILIK[Sant’Arcadio] 8: Dimustraje a cchi ancòra tene ‘o cuorio d’’o criticà d’essere jucatore overo e mmarcazzo (centravanti) ‘e sustanza: nun sulo jucaje p’’a scuatra, ma facette ddoje addaffe (reti) una meglio ‘e ll’ata [15’ e 51’] purtannoce pe ddoje vote ‘nvataggio! Ma ch’ato êsse ‘a fà? Coppola ddenocchie!

all. ANCELOTTI [‘O Jancone ] 6: Ciruzzo e ssant’Arcadio lle levajeno ‘e vverole d’’o ffuoco e lle permettetteno che lle metrtesse ‘o seje, ma nun me piacette chillu fatto d’avé tenuto troppo ‘ncampo ‘nu Zielinski ca nun cunchiudeva niente, nè d’avé miso ‘O‘Ntontaro ô oosto d’’o Ggialante e ppo ‘o Ciuccio me dètte ‘a sensazziona ‘e nun sfruttà a mmestiere ‘o putenziale uffenzivo.

arb. CALVARESE 4 - [i ‘a chenca soja, cumpreso chille d’’a varra ‘e chillo masculo sbagliato d’’a zia monaca soja!]  Scadente assaje isso  i ‘e suoje, ‘stu ternano nun sulo siscaje (ad capocchiam), ma ce facette ‘a fetenzia ‘e nun darece ‘nu ricore sacrusanto quanno uno d’’e nuoste fove scambettato ‘int’â muntaca (area di rigore) d’’e mmurtatelle, ma s’êtte ‘a fà cchiú ddinto ‘e dinto ô prozo pecché nuje vincettemo ô stesso â faccia soja, d’ Inzaghi, ‘e chella cestunia ‘e Spalletti, d’’a vecchia zoccola, ‘e chi ce vo’ male e dde tutte ‘e cestarielle ca nunn’’a fernesceneno ‘e manarce ‘a seccia!

E ffermammoce cca. Cumme jette e ccumme venette guagliú, se vincette e gghiammo annante! Ve faccio tante avucurie a ttutte quante ‘e bbona mustalà (fine) e mmegliu bbadajo (principio) e ssi dDi’ vo’ ce sentimmo ll’anno ca vène, mo cumme a mmo nun saccio comme, nè quanno. Staveti bbe’! R.Bracale Brak