NAPOLI - SALISBURGO (E.L.7.03.19) 3 A 0 ‘A VEDETTE ACCUSSÍ

NAPOLI - SALISBURGO (E.L.7.03.19) 3 A 0

‘A VEDETTE ACCUSSÍ

Tutto a pposto, guagliú!Ajeressera ô san Paolo ‘nnante a scarze trentamile masciadde (spettatori) scardaje ‘a zella ô Salisburgo  e sciaccannolo pe ttre a zzero affurzaje (vinse) ‘o sibbacco (match) d’addabba (andata) ‘e ll’uttave d’’a cuppetta  airupea... e se fósse pututo pure sbrasà si, ô ssolito, nun s’êsse sprecata cchiú n’accasiona!Peccato, peccato pure pecché chella d’ajere fove ‘na mubbara (partita) senza storia i ‘o  Napule nun faticaje cchiú ‘e tanto  p’avé raggiona d’’e nassauaje (austriaci) ca ce detteno poco ‘mpiccio e ssulo rtre o quatto vote rumpettono ‘o saciccio ô Lunganonne truvanno pane p’’e diente lloro. Cusicché cu ‘stu retunno tre a zzero ‘o Ciuccio mettette ‘na seria arranalacara (ipoteca) ‘ncopp’ô pasiglio (passaggio) ‘e turno pure si ‘nra ‘na semmana pe ll’ejudo  (ritorno) âmm’ ‘a jí â casa lloro facenno a mmeno d’’o Ggialante e d’’o ‘Ntontero  nutizziate (ammoniti) e ppirciò istibbadde (squalificati).Però ‘o Jancone à ditto ca chille ch’ànn’’a jucà ô posto lloro, ‘o Vampiro e Lluperto sanno ‘o fatto lloro e pputimmo stà senza penziere.... P’’o mumento gudimmoce ‘stu tre a zzero     ca sant’Arcadio ô 9’, Anema longa ô 17′ i ‘a daffimarma (autogol) d’Onguene ô 57’ce rijalajeno  e credimmo ê pparole d’’o Jancone! Passanno ê ppaggelle:

MERET[‘O Lungagnone] 8  E s’’o mmereta tutto pe ccumme fove attiento e priciso mantenenno ‘a porta acrata (inviolata) soprattutto cu ttre granni tacculle (interventi) e ll’urdemo ô niajo (finale) fove muzzalo (prodigioso).

HYSAJ[Meza Cucchiara] 6,5  Bbona atalossa (prestazione) ‘e ll’arbanese ca arreto fove ll’arma agghiundata d’’o Ciuccio e a ll’arrancua, scennenno, cu ‘nu tiro a ggiro addirittura  sfresaje (sfiorò) pure ll’addaffa (rete) accuntentanno ô Jancone.

MAKSIMOVIC[‘O ‘Ntontero] 6  Tutto summato addà (prova) cunvincente d’’o  centrale zarbío  (serbo) ca ‘a fora ‘e quacche sfregazzo (sbavatura) ‘int’ê primme minute nun ce détte prubbleme. Però se facete nutizzià (ammonire)e nnun ll’êsse avut’’a fà!

Koulibaly[‘O Ggialante] 6,5 ‘O solito cummò cu ‘o specchio ca nun facette passà a nnisciuno nchiudenno ògne chesema (varco) cu ‘e bbone o cu ‘e ttriste! Peccato pe cchillu cartellino jalizzo ca ce custaje caro ‘nvista ‘e ll’ejudo  (ritorno) ca è custretto a zzumpà!  

MARIO RUI 6 pur’isso scennette e difennette a mmestiere ajutanno ‘e duje centrale quanno fove ‘o caso.

RUIZ [Anema Longa] 7 S’’o mmeretaje nun sulo  p’’a pricisa addaffa (rete) ca ô 17’ ce dette ‘o doje a zzero, ma p’’e ttanti jucate ‘e qualità ca ce facetteno alliccà ‘e bbaffe.

ALLAN [‘O ‘Ncrifato] 6,5 Ô ssolito nun se fermaje maje e ccurrette nsi’ ô 93 facenno ‘o cane ‘e presa  cu ccegna (grinta) e azzaja (impegno)!

CALLEJON [Peppe ‘a ‘nguenta] 6,5 Jenno e vvenenno ‘ncopp’â ferza ‘e dritta fove ll’arcattasso (stantuffo) d’ ‘a scuatra cuana (azzurra); peccato ca sfresaje   (sfiorò) sulamente  n’ addaffa (rete) a ll’arrancua ( nella ripresa) e ll’êsse avut’’a signà!

ZIELINSKI 6  ‘Nu poco stracquo, êsse avuto fà ‘e cchiú, ma ajeressera fove meno mascullo  (brillante) d’ati vvote. S’êss’ ‘arrepusà ‘nu poco.  [dô 65′ DIAWARA 5,5   Miezu zifo (voto) mancante pecché ddoje o tre vvote ce facette cacà sotto sbaglianno quacche pasiglio (passaggio) facile. ‘Nzomma trasenno nunn’ajutaje ê cumpagne, anze poco mancaje e nunn’’e sgarrupasse.] MERTENS [Ciruzzo] 6  L’Êsse miso ‘e cchiú pe cchillu jabbro (assist) a zzuco ‘e caramella ca ô 9’ mettette ‘ncundizziona a ssant’Arcadio ‘e signà ll’uno a zzero, ma purtroppo, quanno ‘o bbelliero (l’ariete) pulacco mettette a isso a ttu ppe ttu cu ‘o purtiere, isso sbagliaje e ttiraje fora ‘na palla da mettere dinto! E nnun sta bbene! [dô71′ INSIGNE[Lorenzigno] 6 Dette ‘na mana a ffà passà ll’urdime minute i ‘o ffacette gestiunanno (gestendo) ‘a palla senza sfregazze (sbavature). Meglio ‘e niente!]

MILIK[Sant’Arcadio] 7,5  Cu ‘a primma addaffa (rete) soja ‘e ‘sta tempurata (stagione) ‘nnAiuropa sbluccaje ‘a facenna. Po, primma ‘e ne sfresà (sfiorare) n’ata ‘e ‘nu niente,  jucaje p’’a scuatra cupulianno (dialogando) cu ‘e cumpagne e ffacennose vedé pure arrete a ddifennere ‘a porta ‘ncopp’ê tire ‘e squina (corner); ‘e cchiú mettette a Cciruzzo a ttu ppe ttu cu ‘o purtiere, ma ‘o bberga scipaje ll’accasione!  [da ll’81′ OUNAS 6 ‘e stima, pecché jucaje poco pe ffà coccosa]

all. ANCELOTTI [‘O Jancone]6 Tutte, o quase, rispunnetteno a cchello ch’isso vulette e ss’ affuzzaje (vinse)

cumme ce s’aspettava; peccato sulo ca nun se riuscette a sbrasà!

arb. KULBAKOV i ‘a chenca soja 4 Siscaje a bbienetenne e ’mmezziato da chi sa chi nutizziaje (ammoní) ‘e duje centrale nuoste pe dduje carí (falli) ‘e niente, justo pe nnun fa rele jucà ‘a mubbara (partita) d’ejudo (di ritorno).

E ffermammoce cca cuntente, tutto summato ‘e cumme jette ajeressera e tturnammo a ppenzà ô campiunato pe nun perdere cchiú ppunte e ddummeneca ca a ll’ora d’’e ppastarelle se va ô Mapei  a gghiucà contr’ô Sassuolo, n’ata scuatra assineja (satellite) d’’a vecchia zoccola..., vedimmo ‘e turnà cu ‘e tre ppunte dint’â sacca. Accussí sperammo e ssi ‘o Cielo ‘o  vvo’ ve ne parlo llunnerí ca vène.

Staveti bbe’. R.Bracale Brak