NAPOLI- UDINESE (17.03.19) 4 A 2 ‘A VEDETTE ACCUSSÍ

NAPOLI- UDINESE (17.03.19) 4 A 2

‘A VEDETTE ACCUSSÍ

Tutto a pposto, guagliú? E ddicimmo ca sí pecché ajere a ll’ora d’’e pasterelle, quanno ô san Paolo ‘o Ciuccio se ll’êtte ‘a vedé cu ll’Udinese p’ affurzzà (vincere)[nun tanto p’accustarese â vecchia zoccola, ca si nun è ajutatata po pperdere pur’essa, cumme era succieso ajere cu ‘o Crifone..., ma p’arrassarse allimmeno dô Milanno, mazziato dâ sora cucina...], p’ affurzzà (vincere) sí s’affurzzaje addirittura largo, ma piglianno ddoje addaffe(reti) cosa ca ‘ntribbuna-divano nun ce piacette; certo  affurzzà (vincere) pe quatto a ddoje è mmeglio ‘e ‘nu caucio ‘int’ê rine e4 nnun’êssem’’a stà a gguardà ‘o pilo ‘int’a lluovo, ma a nnujaute nce piacesse ‘e mantenere sempe ‘a porta acrata (inviolata) e nun  chiammatece niamme (incontentabili) pecché ‘e muidde (tifosi) accussí ànn’’a essere! Però ajere, turnanno, mazziate dâ nacchella (trasferta)  a Ssalisburgo cuntava d’affurzzà (vincere) e cchello se facette e pirciò lassammo stà ‘o riesto... Passammo ê ppaggelle:

OSPINA[Pastacrisciuta] 5,5 Miezu zifo (voto) mancante, ma no p’itimma (colpa) soja, benzí d’’o Jancone ca nunn’ ‘o levaje súbbeto  ô 6’ [quanno ‘o purtiere nuosto avette ‘na bbotta ‘nfronte  da Pussetto ca carogna cumm’è nun ‘o zumpaje e cuntinuaje a correre dannole ‘na scarpata ‘nfronte quanno ‘o purtiere nuosto lle se menaje ‘mmiez’ê piede e lle levaje ‘a palla],i ‘o facette rummané ‘ncampo, stupetiato e sturduto cumme steva e ffove naturale ca pigliasse ddoje addaffe (reti)una cchiú ffessa ‘e n’ata, ca ‘ncundizzione nurmale maje avesse pigliato; e ca nun ce steva cchiú cu ‘a capa se vedette quanno Pastacrisciuta ô 43’ â ‘ntrasatta perdette ‘e senze e nnun dànno cchiú ssigne ‘e vita, custringette  miedece e ‘nfermiere  a ccorrere cu ‘e cazune ‘mmano pe ppurtarlo ô spitale!    [dô 43′ MERET[‘O Lungagnone] 6 Cchiú ‘e stima ca dd’auto pecché ll’Udinese nunn’ ‘o dètte maje ‘mpiccio e nnunn’êtt’’a fà nisciunu taccullo (intervento).]

MALCUIT[‘O Tignuto ] 6  Se facette apprezzà soprattutto a ll’arrancua (rtipresa), attiento arreto e appressuranno (spingendo) quanno servette.[da ll’85’ HYSAJ[Meza Cucchiara] 5 ‘nu zifo (voto) mancante pecché sí  jucaje poco, appena diece minute, ma ll’avastajeno pe sbaglià a ddà palla ô Ggialante.E cche saciccio!]

 MAKSIMOVIC[‘O ‘Ntontero] 5,5 Miezu zifo (voto) mancante pecché ajere fove poco mascullo  (brillante) a ppietto ‘e ll’urdemi vvote e ssufferette’a zzurea   (velocità) ‘e Lasagna e ccumpagne dimustrannose troppo ggirmucaddo (Incerto) ô 30’ ‘nnaccasione  d’’o stuco (gol)signato dô marcazzo (centravanti) janco e nniro. 

KOULIBALY [‘O Ggialante] 6,5  Pure ajere fove isso ca êtt’’a lacrassà (guidare) ‘a trasera (fifesa) cuana i’o ffacette cu unu sfregazzo (sbavatura) ô 36’ quanno nun riuscette a stuppà a Ffofanà lassato libbero dê matusteje (mediani) nuoste. Se facette apprezzà pure quanno ascette e scanciannose annante.

GHOULAM 6– ‘Nu zico mancante dô seje pecché sí spisso sfunnaje ‘ncopp’â ferza mancina , ma nun truvaje maje ‘o pasiglio (passaggio) dicisivo. Se vedette ‘nzomma ca nunn’è ancòra isso! Peccato.

ALLAN[‘O ‘Ncrifato] 5,5  Me dispiace, ma ll’attocca miezu zifo (voto) mancante pecchè nun ce piacette e gghiucaje ‘na mubbara (partita) sbaglianno troppi pasiglie (passaggi)facile ca cunzentettene cchiú ‘e ‘na timidda (ripartenza) periculosa d’’e janche e nnire!

ZIELINSKI 6 ‘A chiena i ‘a vacante, anze apprimma ‘a vacante e ppo ‘a chiena a ll’arrancua quanno a ccampo apierto dimustraje e cqualità soje..., ma durante ô primma ajone (tempo)sbagliaje cchiú ‘e ‘na vota quann’êtt’’a tajennà (impostare).Peccato! Nutizziato (ammonito) apposta da Vareri [4 e ppo ve dico] e iaticco (diffidato) mo n’âmm’’a fà mmeno a Rroma contr’ê pecurare lucale.

CALLEJON[Peppe ‘a ‘Nguenta] 7 e ss’’o mmeretaje tutto:‘o spagnuolo turnaje a essere prutacunista  cu n’addaffa (rete) pure si pe scagno e cquase nun vulenno  ô 26’ e ppo cu ‘nu granne missiddo (assist) miso a ffrutto  a ll’arrancua. (ripresa).

YOUNES[‘O Mmerecato] 6,5  ‘A surpresa d’’a serata i ‘a mossa azzeccata d’’o Jancone ca ‘o mannaje ‘ncampo dô primmo minuto i ‘o  terisco rispunnette pusitivamente cu bbelli gghiucate i addirittura sbluccanno ‘a facenna ô 18’ cu ‘nu tiro a ggiro [tipo Lorenzigno], ma truvanno subbeto ‘a porta! Se vedette ca sta ritruvanno ‘a cundizziona! [dô56′ VERDI 6  I è ppure assaje dàtose ca p’’o ppoco ca se facette vedé nun fove maje veramente zincatejo(incisivo)  qualche iniziativa personale senza essere incisivo.]

MERTENS[Ciruzzo] 7 Finalmente ‘na bbella serata pe ll’arillo berga: dduje missidde  (assist) i ‘o primmo stuco  (gol) d’’o  2019. Ll’aspettàvemo!

MILIK[Sant’Arcadio] 8  E nno pecché è ‘a curona d’’a capa mia! Cumminfatte fove isso ô 57’ a llevarce ‘e vvérole dô ffuoco mettenno dinto ll’addaffa (rete) d’’o tre a ddoje e pp’’o riesto se dimustraje ‘nu marcazzo (centravanti) muderno, capace ‘e jucà pp’’a scuatra jenno pure a ddifennere quanno servette,e  d’essere po murtifero  (micidiale) ‘int’â muntaca (area di rigore) avverzaria.

All. ANCELOTTI[‘O Jancone] 6  Se mmeretasse ‘nu zico mancante dô seje pecché p’affurzzà (vincere) sì, s’affurzzaje (vinse) ma se purtaje ‘ncopp’ â  cuscienzia ‘e ddoje addaffe (reti) pigliate da Pastacrisciuta  da Ospina ca isso êsse avut’’a chiammarese ‘mpanca ggià ô 6’ quanno ‘o purtiere nuosto avette chella bbotta ‘nfronte ca ‘o lassaje stupetiato e ‘nzallanuto ô punto da nun sapé cchiú che ppisce piglià! Però ‘ncarraje ‘a mossa ‘e fà jucà ‘o Mmerecato dô primmo minutob e cchesto va pe cchello. P’’o riesto ‘a scuatra soja doppo d’’o doje a ddoje ce dètte ‘a ‘mpressione ‘e nun stà bbona ‘ncampo, ma po isso se ‘mmentaje ‘e cagnà coccosa a ll’arrancua (ripresa) chiammanno arreto ô Tignuto i a Gghoulam e spustanno Ciruzzo a ddritta

 Arb. VALERI 4 ‘Stu pecuraro d’’a capitala, mannato pe romperce ‘o pasticciotto, ‘o ffacette nutizzianno (ammonendo) a Zzielinski ggià iaticco (diffidato)  ca mo n’âmm’’a fà mmeno a Rroma contr’ê pecurare lucale.  P’’o riesto, arsciadiddo e arastedadío (severo e autoritario) cumme se fósse stato isso ‘o signore d’’o munno facette ‘o rre cummanna-scoppole siscanno a capa ‘e saciccio e vvulenno vedé sulo chello ca vuleva vedé facette‘ncacchià a ccane e ppuorce e subbetosoprattutto a nnujate ‘ntribbuna-divano pecché nun pigliaje pruvvidimente cu cchillu cesso ‘e Pussetto ca ce struppiaje a Ospina, cosa ca ce custaje ddoje addaffe(reti).

E ffermammoce cca! ‘Na nichemata (vittoria) ‘mpurtante pe ttené luntane ‘e mmilanese e ddifennere ‘o siconno posto ‘ncopp’a ddoje nunn’è ppoca cosa, ma ‘o juoco à dda migliurà, i ‘a trasera (difesa) à dda riggistrà coccosa.

Mo dummeneca ‘o campiunato se ferma e  ppircò si ‘o Cielo ‘o vvo’ ce sentimmo ‘nfra quinnece juorne   doppo d’’a nacchèlla (trasferta) a Rroma contr’ê pecurare lucale e spero e cuntareve bboni ccose.

Staveti bbe’ R.Bracale Brak