FROSINONE –NAPOLI (28.4.19) 0 A 2 ‘A VEDETTE ACCUSSÍ

FROSINONE –NAPOLI (28.4.19) 0 A 2

‘A VEDETTE ACCUSSÍ

Tutto a pposto guagliú, ‘assa fà ô Cielo! Tutto a pposto o quase: doppo d’’e ddoje scutuliate pigliate ‘ncasa   cu ll’ Arzenale e ll’ atalantise,ajere all’ora streveza ‘e ll’apritivo  ‘o Napule jette a Ffrusinone e ffove  chiammato a dd’arfuzzà  (vincere) e ‘o ffacette, ma sulo pe ddoje a zzero addó nce fóssemo aspettato ‘na nichemata (vittoria) cchiú llarga, ‘mmece ce jettemo sulo vicino signanno n’addaffa (rete) p’ajone (tempo): ‘a primma cu Ciruzzo ô 18’ cu ‘nu granne tiro ‘e timmurria Dô lemmeto i ‘a siconna ô 49’ cu ‘o Mmerecato ca cumme ‘na serpe s’ammuccaje dint’â muntaca (area di rigore) d’’e lucale, cupuliaje (dialogò) cu Ssant’Arcadio ca lle servette ‘na palla a zzuco ‘e caramella e isso ‘a mettette ê spalle ‘e Sportiello; ‘a terza addaffa (rete) nunn’arrivaje sulo p’’a jella nera ca ce secuta e ca ce facette vedé tre ppale cuovete dê nuoste[dduje addirittura dint’â stessa azziona] ddoje vote da Peppe ‘a ‘nguenta e ‘na vota cu Anema longa. Sinamparco (comunque) cu ‘e tre ppunte ca ce mettettemo dint’â sacca, putimmo dicere ca a cquatto sibbacche (match) Dô mustalà (termine) d’’o campiunato praticamente ‘o siconno posto ‘ncrassifica fove lasvellato (blindato) ubbiettivo minimo d’’a       caracuddamma (stagione), ca po è cchillo ca vo’ ‘o presirente.e nnun me songo muzzecato ‘a lengua! 

E mmo passammo ê ppaggelle:

OSPINA[Pastacrisciuta] 6,5 P’’a verità tenette poco o niente ‘a fà, ma chella grama vota ca fove  ‘mpignato dê nassie  (attaccanti) d’’o  Frusinone,rispennette prisente mantenenno ‘a porta acrata (inviolata) cu ‘na bbella parata centrale.

MALCUIT[‘O Tignuto] 6,5  Middibbaje (attaccò) cu ttubbatta (costanza) ‘ncopp’â ferza ‘e dritta addivintanno ‘mpratteca  ‘nu carigginno d’ajummo (esterno d’attacco).’Nzomma ‘nu veru muturino.[da ll’87′ ALBIOL[‘O Masto] sv: trasette justo pe ddarele ‘o bbenturnato!)

KOULIBALY[‘O Ggialante] 6,5 ô ssolito priciso  preciso,acrebbisso (puntuale) ‘a fora ‘e ‘na vota  quanne fove ‘nfilato  da Valzanía; po però sagliette ‘ntusiello e nnun facette passà cchiú a nnisciuno!

LUPERTO 6,5  Atalossa (prova) ‘e sustanza d’’o guaglione ca jucaje tutt’’a mubbara (partita) senza sfregazze (sbavature), Me piacette.

GHOULAM 6 Tanta corza e atalossa (prova) suddisfacente pure si nunn’è ancòra isso: ll’àmm’’aspettà.

ZIELINSKI 6  ‘O Jncone ‘o facette jucà a ‘nu pizzo ca nunn è ‘o suĵo e ttutto summato ‘o guaglione   pulacco riuscette a ffà chell’êva ‘a fà déttanno ‘e ggiumetrie d’’o juoco cuano (azzurro).

FABIAN RUIZ[Anema Longa] 6  Accummiciaje bbuono, ma po se ne scennette passanno ‘e minute e mmustranno signe ‘e stracquezza. Cumme v’aggiu ditto sfresaje (sfiorò) ‘e stuco ( gol) cuglienno ll’afachía (traversa). Facitelo bbenericere!

YOUNES[‘O Mmerecato] 7,5  ‘O meglio d’’e suoje ajere facette vedé ‘e che bbella stoffa è ffatto; nun sulo ll’addaffa (rete) ‘e ll’ammanna (sicurezza), ma pure tanti ghiucate spettaculare. [Dô73′ VERDI 6  Trasuto quanno ‘o Napule cercaje sulo ‘o pussesso, tuccaje pochi pallune.]

CALLEJON[Peppe ‘a ‘nguenta] 6,5  Assaje jellato ce pruvaje cchiú ‘e ‘na vota, ma ‘a palla nun vulette trasíe ccullezziunaje sulamente dduje pale! Facitelo bbenericere!

MERTENS[Ciruzzo] 7  Che maraviglia chella timmurria  (punizione) ca ce purtaje ‘ncopp’a ll’uno a zzero e lle cunzentette d’angappà a Mmaradona p’’o nummero ‘e stuche (gol) ‘nSeria A.

MILIK[Asant’Arcadio] 6  poco servuto e ppoco cercato nunn’avette ll’accasione pe ffà male, ma furnette ô Mmerecato ‘a palla d’’o doje a zzero.  [Dô77′ OUNAS pocu tiempo avette e ppoco facette]

all. ANCELOTTI [‘O Jancone] 6,5 ‘Na nichemata (vittoria) senza prubbleme,vuluta e ccercata i ‘o Napule  facette ‘o ssuĵo contro a n’avverzario ca nunn’o dètte penziere, però ‘o ffacette  cu cummenzione jucanno ggià dô primmo minuto. E nnunn’era scuntato.

arb. F. LA PENNA 4 ‘Stu rumaniso ‘e ll’uttantatré, durante ô primmo ajone (tempo) grossi fetenzie nun ce facette, ma  dimustraje d’essere spaisato e dde nun sapé che cacchio nce facesse ‘mmiez’ô campo e ssiscaje a vvienetenne, ê vvote mettennose ‘miez’ê piere d’’e nuoste. E sinamparco (comunque) ce ne facette una esaggerata a ll’arrancua (ripresa) quanno nun ce dètte ‘nu ricore sacrusanto quanno ‘o Ggialante fove accrastato dint’â muntaca (area di rigore) d’’e lucale da ‘nu chianchiere cu ‘a maglia jalizza (gialla)Aggio paura ca pure chisto sta ‘ncopp’ô stato paca d’Agnelli e ccumpagne!

E ffermammoce cca, dannoce appuntamento, si ‘o Cielo ‘o vvo’ pe llunnerí ca vene  doppo d’’o sibbacco (match) ‘e dummeneca a ssera  ô san Paolo contro ô Cagliare ca ‘o Ciuccio à dd’arfuzzà (vincere).  Accussí spero ‘e putereve cuntà.

Staveti bbe’. R.Bracale Brak