NAPOLI – ARSENAL(E.L.18.4.19) 0 A 1 ‘A VEDETTE ACCUSSÍ

NAPOLI – ARSENAL(E.L.18.4.19) 0 A 1

‘A VEDETTE ACCUSSÍ

Mannaggia a  cchello  ca nun se po’ ddicere guagliú! Niente ‘a fà: ‘ncopp’a ‘sta caracuddamma(stagione) d’’o Napule nce ò cacato ‘o cane niro i è risultata arafrassa (fallimentare): ‘ncampiunato tenimmo diciassette punte mancante a ppietto ‘e chella passata,fora dâ coppa itaglia e ajeressera ô san Paolo jettate  fora pure dâ cuppetta airupea dàtose ca ll’Arzenale [ch’êva ggia arfuzzato â casa soja pe ddoje a zzero...], venuto cca ‘mmece ‘e tiffiddà (perdere) pe ttre a zzero, arfurzzaje pe uno a zzero e ce ‘o mettette a ppitoffio! Mannaggia a  cchello  ca nun se po’ ddicere, ma pe fforza, pe fforza guagliú quann’uno fallesce cchiú ‘e ‘na bbona accasione ‘e signà, cumme succedette ê nuoste... è nnaturale ca ll’avverzario aiza ‘a capa e appena ave ‘o pere a llèpera te fotte. E cchesto capitaje ajeressera a nnuje ô 36’ quanno Lacazette [doppo ca ‘e nuoste êveno sbagliata cchiú ‘e n’addaffa (rete) quase fatta] apprufittaje ca chillu sacchetto ‘e ll’ummeto’e ll’ arbitro Ovidiu Hategan[3 e ppo v dico] êva assignato a ll’Arzenale ‘na timmurria (punizione) dô lemmeto d’’a muntaca (area di rigore) cuana (azzurra) ca nun ce steva e – ppe ghionta ‘e ruotolo – ‘o Lujngagnone êva piazzato ‘na chiaveca  ll’araggizza  (barriera) lassanno scupierto ‘o lato d’’o palo ‘e mancina  e lla ppiazzaje ‘o pallone mentre ‘o purtiere nuosto fremmo a ccentro ‘e porta rummanette a gguardà cumme ‘o pallone traseva dinto. E ffove ‘o llutto giacché ‘o Napule se truvaje ‘n sotto, ‘mpratteca, ‘e tre addaffe(reti) e ppe ppassà ‘o turno n’êsse avuto fà quatto! È ‘na parola... chi t’’o ddà? Lla nun foveno crestiane nemmanco ‘e russimà (pareggiare) tanto pe nnun farese jettà fora cu n’ a  zzimma (sconfitta) casalinca. Cosa ca però succedette lassannoce a nnujate ‘ntribbuna-divano [ca ce fóssemo aspettato ‘o miraculo d’’o tre a zzero pe nnuje] tanto ‘e chellu ttuosseco ‘mocca ca  chi sa’ quanno putimmo fení ‘e  sputà.

Emmo passammo ê ppaggelle e ggià ve dico ca ‘e seje so’ ppoche:

MERET[‘O Lungagnone] 5

 Ggià v’aggiu ditto ca ô 36’ facette ‘na grossa fessaria ‘ncopp’â timmurria (punizione) ‘e Lacazette ca signaje. Tentaje ‘e farese perdunà a ll’arrancua (ripresa) fermanno cu ‘nu bbuonu taccullo (intervento) ‘nterra ‘na cunchiusiona   d’Aubameyang(he), ma oramaje ‘a frittata i ‘o guajo  ggià ll’êva fatte e a cchillu punto, n’azzimma (sconfitta) p’uno o ddoje a zzero fósse stata ‘a stessa cosa.

MAKSIMOVIC[‘O ‘Ntontero] 5 Miso a ffà ‘o terzino, ajere nun ce piacette; sí pe ‘na parte cercaje ‘e stà cuncentrato a ddifennere, ma quanto a appressurà (spingere) a dritta nun se ne parlaje proprio e ppe gghionta ‘e ruotolo, a ll’arrancua sufferette a Llacazette. Ascette  pe ddà aradà (spazia) a uno ‘e cchiú annante.

[ Dô 45′ MERTENS [Ciruzzo] 5 Pur’isso tanto se mmeretaje visto ca trasette,  ma nun riuscette a ccagnà niente i a ll’assurbente  fove zaillo (evanescente)senza maje dà prubbleme ô purtiere   Cech(he).]

CHIRICHES[‘O Vampiro] 6 Se facette truvà pronto  facenno spisso arremmarrà  (ripartire) ll’azziona da dereto e riuscette   sempe a lleggere ‘a juocata d’’e nassie (attaccanti) avverzarie; peccato ca sott’â porta ‘e ll’Arzenale nun riuscette a sfruttà bbuono ‘e capa ‘na palla auta.

KOULIBALY[‘O Ggialante] 6,5 Fove ll’urdemo a rrastasiammare (arrendersi) e spisso pruvaje a ffarese vedé annante, ma senza furtuna. Peccato.

GHOULAM 5 Manco isso ce piacette: se vedette poco i ‘o ppoco ca facette fove senza zuco. Nunn’è ancòra chilo ‘e primma; forse ‘o Jancone nun ll’êsse avut’’a mettere...

[ Dô 71′ MARIO RUI 6 Trasette cu ccegna (grinta) e ggenio ‘e fà e rriuscette a mmettere cchiú ‘nu bbuonu jabbro (cross) ‘mmiezo senza ca però nisciuno lla ‘nnante ‘o mettesse a frutto.]

CALLEJON[Peppe ‘a ‘nguenta] 5 Certo pe ccorrere currette sacrificannose p’’e cumpagne, ma fove troppo ‘mpriciso e nnun sulo sbagliaje spisso ‘a mesura d’’e jabbre(cross) mettenno ‘mmiezo palle a bbienetenne, ma po  se magnaje n’addaffa (rete) fatta sciupanno ô 16’ ‘na  granna palla d’’o Ggialante. Nun ce ‘o ppozzo perdunà.

ALLAN [‘O ‘Ncrifato] 5,5 sí, ô ssolito ricuperaje ‘na cifra ‘e pallune, ma facette troppi fessarie a ll’epata ‘e daimmo (in fase di appoggio).

ZIELINSKI 5 Pur’isso ajere facette assaje poco a ppietto ‘e chello ca sape fà: pruvato cumme matutejo (mediano) a ffà ‘o riggista nun riuscette a ffà ‘nu saciccio!

FABIAN RUIZ 6 Tutto summato, pure si partette cu ‘o freno tirato criscette cuoncio cuoncio aumentanno ‘a presenzia   ‘nfra ‘a trecquarte i ‘a curzia ‘e fora, ma fove poco cuncreto. Peccato.

INSIGNE[Lorenzigno ] 5 Fove ‘na delusiona!’Mprattica nun ne ‘ncarraje meza sbaglianno quacche bbona accasiona e aizanno porvera pe bbona parte d’’o sibbacco (match). Nurmale ca ‘o subbissasseno ‘e sische quanno ’o Jancone se decidette a  cchiammarselo  ‘mpanca e un capettemo pecché  se ‘ncacchiaje! [Dô 61′ AMIN YOUNES[‘O Mmerecato] 6 Tentaje súbbeto ‘e furzà ‘a trasera (difesa) ‘ngrese, ma fove  troppo sulo e nnun tenette ‘o tiempo ‘e farese valé. Ah, si fósse trasuto primma]

MILIK[Sant’Arcadio] 5 I ‘e chisto overamente me dispiace ‘e dicere ca nun fove ‘nserata, ma  sbagliaje spisso mo ‘a cunchiusiona, mo ‘e daimme (appoggi), peccato. P’’a verità isso ‘na cosa ll’êva fatta signanno n’addaffa (rete) reculare ca però ll’arbitro [ca ll’ànn’accirere,senza pavarla... ] ll’annullaje pecché, apprufittanno ca p’’a cuppetta airupea nun è previta ‘a Varra...,  decidette ca ‘o marcazzo (centravanti) nuosto  tenette ‘na  ponta d’’o guveto ‘nnattasallulo (fuorigioco)! Quanno se dice ‘o destino!  

all. ANCELOTTI [‘O Jancone] 4,5 Tanto se mmereta e ll’aggiu trattato. Mannaje ‘ncampo ‘na scuatra senza ficre (idee) senza pricisione e ssenza  cundizziona, nun adatta a ll’appuntamento e nun fove capace ‘e truvà ‘o capo d’’a matassa!

arb. OVIDIU HATEGAN 3 ‘Stu sciacquetto rumeno ce ne facette cchi ‘e Carlo ‘nFranza. Venuto cu ‘a lezziona fatta ‘e romperce ‘o saciccio ‘o ffacette cu ttutt’’e sentimiente nun sulo annullanno ll’addaffa reculare ‘e Sant’Arcadio, ma assignanno a ll’Arzenale ‘a timmuria (punizione) ca nun ce steva e cce cundannaje; ‘e cchiú nun ce détte ‘nu ricore a ffavore, ca nun vulette vedé,  nè ‘na timmuria (punizione) dô lemmeto. I allora dicitelo súbbeto ch’è ggià tutto diciso e cce vulite jettà fora!

E mmo bbasta accussí: nun ce facimmo atu sanco amaro  e nnun ce penzammo cchiú: è gghiuta cumm’è gghiuta e ppacienza; se vede ca accussí steva scritto! Turnammo a ppenzà ô campiunato e vedimmo e nun fà ati ffijure marrò   e dde cunchiudere allimmeno cu ddignità ‘sta caracuddamma(stagione)  arafrassa (fallimentare); mo si ‘o Cielo ‘o vvo’ ce sentimmo p’’o marterí doppo Pasca e spero ‘e cuntareve ca cu ll’Atalanta ô san Paolo ‘o Napule s’è ffatto perdunà. Santa, serena Pasca.

 E staveti bbe’. R.Bracale Brak