ROMA-NAPOLI (31.3.19) 1 a 4 ‘A VEDETTE ACCUSSÍ

ROMA-NAPOLI (31.3.19) 1 a 4

‘A VEDETTE ACCUSSÍ

Alleria, arrecrio, priezza e ssuddisazziona guagliú! Ajere a ll’ora d’’a tiella ‘o Ciuccio jette a ll’Ulimpico ‘e Roma e lla assuggettaje a cchilli quatto pecurare ‘e Raniere ‘ncasa lloro vattennole pe cquatto a uno e  mettennose tre ppunte sustanziuse dint’â sacca e ‘mprattica almaturranno (blindando) ‘o siconno posto ‘ncrassifica visto ca s’arrassaje ‘e cchiú da  chilli profuche ‘e ll’Interre ca foveno mazziate ‘ncasa d’’a scuatra d’’o pappavallo ‘e Lotito! Però i’ ‘o ssapevo e ssi scummettesse[cosa ca nun faccio maje]m’êsse jucato ‘na cifra dàtose ca cu ttutto ca Calvarese [4 e ppo ve dico] jucaje cu ‘e pecurare, ‘a scuatra ‘e Ranieri dimustraje d’essere overo poca cosa a ppietto d’ ‘o Ciuccio e nnun êsse maje signato si ‘o Lungagnone nuosto nunn’êsse fatta ‘na fessaria esaggerata, ascenno a ccapa ‘e saciccio e ccarriannose ‘nterra ‘nu pecuraro dduje minute e mmieze doppo d’’o prazzo (fine) d’’o primmo ajone, permettenno a Ccalvarese[ca chello jeva ascianno] ‘e siscarce ‘nu ricore cu ttutto ch’erano ggià passate abbunnantamente ‘e duje minute ‘e  ricupero assignato,pe gghionta ‘e ruotolo, senza mutivo! ‘E rumanise  se penzajeno ca russimanno (pareggiando) ô 47’ e mmiezo se fosseno mise ô ssicuro, ma se dètteno ‘nu punio ‘mpietto pecché, turnate ‘mcampo pe ll’arrancua (ripresa), ‘o Ciuccio se scurciaje ‘e mmaneche i ‘e tturnaje a scarucchià malamente signanno n’ati ttre addaffe (reti): ô 49′  cu Cciruzzo, ca se facette truvà ‘nnante ô palo’e mancina i apprufittanno ‘e ‘na meza papera d’’o guardaporta rumaniso mettette dinto ‘o jabbro (cross) a zzuco ‘e caramella ‘e Peppe ‘a ‘nguenta;ô 54′po  Verdi,appustiato a ccentro d’’a muntaca (area di rigore) rumanese fove lesto a recogliere ‘nu jabbro (cross) ‘e Anema Longa e cce ‘o mettette pur’isso a ppitoffio a cchillu puveriello  d’’o guardaporta rumaniso ca ajere êsse fatto meglio a ddarese malato;ma  nun cuntento a ll’  81′ ‘o Mmerecato se vulette spugnà pur’isso ‘a fresella e fravecaje dinto ‘o quatto a uno e bbuono facette Calvarese a llevà mano ô 90’ si no, p’’e sbannate ‘e Ranieri ce fósse stato periculo ‘e ‘ncassà quacch’ata addaffa (rete)...Ecco, guagliú chiste foveno ‘e fatte e mmo passammo ê ppaggelle:

 MERET[‘O Lungagnone] 6  Ll’êsse avut’’a mettere miezu zifo(voto)mancante pe bbia ca nun lle pozzo perdunà ‘a fessaria fatta durante ‘o ricupero, quanno,poco sicuro, carriaje ‘nterra ‘int’â muntaca  (in area di rigore) soja  ‘nu pecuraro rumaniso, però po fove  dicisivo quanno Cristante tiraje quase a bbotta sicura e isso ce mettette ‘e punie e ffove mazzuso quanno ‘ncopp’â raffadda (respinta)  chella capa ‘e provola ‘e  Nzonzi ce mettette ‘a capa ma truvaje ll’afachía (traversa) e cchesto jette pe cchello! 

HYSAJ[Meza Cucchiara] 6,5  Atalossa (prestazione) cu ssette parme ‘e ll’arbanese sempe sicuro i attiento ‘ncuollo a Pperotti, cassato dô campo. [ Dô 68′ MALCUIT [‘O Tignuto]6  ‘o  francese nun facette ato ca difennere a ccose ggià fatte].

MAKSIMOVIC[‘O ‘Ntontero] 6,5  Ajere me surpennette visto ca fove uno d’’e meglie: ‘e capa ‘e ppigliaje tutte, smarrunaje sí e nno meza vota e Dzeko cumplessivamente facette palicco; però ‘a vermutta  d’’e ttimidde(ripartenze) dâ trasera (difesa) ‘a vulette sempe dô Ggialante.

KOULIBALY[‘O Ggialante] 7  Pure ajere fove ô ssolito  n’aculla (muraglia) ‘e giumento armato ca nun ‘a facette bbona a nnisciuno e ccummannaje a mmestiere ‘a trasera..

MARIO RUI 6  Tutto summato ‘na bbona atalossa d’’o purtuchese ca pure si nun ghiette maje ‘int’ê chiavette cu Schick ‘ncopp’â ferza mancina, facette bboni ccose, ma pure quacche fessaria cca e lla.

ALLAN[‘O ‘Ncrifato] 6,5  Jette azzannanno feliette addó capitaje pe ttutto ‘o campo ricuperanno tanta pallune e facette caputià ll’azziona.

FABIAN RUIZ [Anema Longa] 7  Pur’isso se mettette ‘nzeggetta e scurdata ‘a brutta ‘nfruenza d’’a semmana passata rialaje jucate ‘e spessore dànno ajello (ordine) â camma (zona) centrale d’’o campo, senza scurdarce d’’a bbella palla misa ‘mmiezo ô 54’ pe Vverdi ca signaje.

CALLEJON [Peppe ‘a ‘nguenta] 6,5  Ô ssolito facete a ddritta ‘o campo ‘nnante e arreto e mettette dinto ‘o jabbro (cross) a zzuco ‘e caramella ca Ciruzzo sfruttaje a mmestiere.

VERDI 6,5  È overo ca sbagliaje n’addaffa (rete) da mettere dinto durante ô primmo ajone (tempo), ma s’era ggià fatto  perdunà  cu cchella bbella palla data a Sant’Arcadio doppo sulo duje minute e ccumpletaje ll’opera  ô 54’ quanno   truvaje ‘o stuco  (gol) ‘e ll’uno a ttre![Dô 74′ YOUNES[‘O Mmerecato]  6,5  Tanta qualità e zzurea (velocità) p’’o terisco ca trasuto da pochi minute participaje a ll’artraffa (festino) signanno a ll’81’ ll’urdema addaffa (rete) nosta.]

MERTENS[Ciruzzo] 6,5  Che piacere vedé ll’arillo berga nun sulo  turnà a ssignà, ma pure darese che ffà mettenno paura ê rumanise. [Dô 58′ OUNAS 6  Trasette pe ffà risciatà a Cciruzzo e ppruvaje cu ‘a zureja (velocità) soja a spaventà ‘a trasera rumanesa..., ma nun pugnette.]

MILIK[Sant’Arcadio]  7 Nunn’erano passate dduje minute ca ggià ‘o marcazzo (centravanti) nuosto êva miso ‘e ccose ‘nchiaro i ‘o ffacette cumme sul’isso po’ ffà i ancòra nunn’âmmo capito cumme facette a ccuntrullà ‘e dritto ‘a palla cu ‘a sola d’’a scarpa misa a fracassa e ccu ‘na cagliosa ‘e mancina a mmetterlo a ppitoffio a Olsen(ne) ch’êtte subbeto correre a mmetterse ‘o ppoco ‘e ‘nguenta pe  ffarle passà ll’ardore ca ll’appicciava ‘o fetillo.

all. ANCELOTTI[‘O Jancone] 6 ‘Ncarraje tutto cumpreso ll’abbrazzo a Rranieri pe ccunzularlo d’’a scutuliata pigliata.

arb. CALVARESE 4 E mme spieco: mannato pe rromperce ‘o saciccio cercaje d’’o ffà ggià annullanno ‘a siconna addaffa (rete) ‘e Sant’Arcadio pe bbia ‘e n’attasallulo (fuori gioco) ‘e ll’ógne d’’o pere ‘e dritta d’’o marcazzo (centravanti) nuosto e ccumpletaje ll’opera assignanno ‘nu justo ricore ê rumanise quanno però ggià erano passate ‘e duje minute ‘e ricupero ch’isso aveva diciso, ma  ca nun ce steva; sinamparco (comunque) s’êtte ‘a fà a cchillu sevizzio, pecché ‘o Napule a ll’arrancua (nella ripresa) vincette ô stesso quase sbrasanno.

E fermammoce cca cuntente  ca  ‘o  Napule araffaje (sbancò) Roma signanno quatto addaffe (reti) e dduminanno dô primmo a ll’urdemu minuto senza ca  ‘a Roma fósse maje crestiana d’arraddà (reagire)

Mo se torna a gghiucà, p’’o campiunato miercurí ca vène

quanno a ll’ora d’’e ppastarelle jammo a Empoli  e si ‘o Cielo ‘o vvo’ ve ne parlo gioverí e spero ‘e putereve cuntà ca ‘o Ciuccio à fatto cose bbone.

Staveti bbe’ Raffaele Bracale Brak