NAPOLI-BENEVENTO (AM.13.7.19) 1 A 2 ‘A VEDETTE ACCUSSÍ

NAPOLI-BENEVENTO (AM.13.7.19) 1 A 2

‘A VEDETTE ACCUSSÍ

Azze guagliú, âmm’accumminciato su ssette parme ‘e saciccio! Ajere ‘ncopp’ô campo ‘e Carciato primma asciuta d’’o Napule 2019-2020 e pprimma fijura ‘e seje sorde: ‘o Napule perdette pe ddoje a uno contr’ô Bbenevento addó ‘ntribbuna-divano ce fossem’aspettate ‘e vederlo fà unu muorzo d’’a scuatra ‘e Pippo Inzaghi. Chi t’’o ddà?! Si ‘o bbonggiorno se vede dâ matina pure pe ‘sta tempurata (stagione) ce attocca ‘e agliottere pinnule amare. Sí, d’accordo: è overo ca ajere mancajeno tre quatto jucature ‘mpurtante e soprattutto ‘e duje madaffie (difensori) centrale, ma cierti ccose assurde ca ce facetteno vedé ‘e duje ca ne pigliajeno ‘o posto ce dicetteno ca stammo ‘nguajate  e nun tenimmo a cchi fà jucà si mancano ll’aizze (i titolari). E vv’assicuro ca accussí nun tenimmo niente ‘a sperà e nnun ghiammo a nnisciunu pizzo... manco a Muntevergine o â Maronna ‘e ll’Arco!Sinamparco (comunque) cu ‘o Bbeneviento ‘e ‘na manera o ‘e n’ata  nun s’à dd’ ‘a pigliarle dint’ô prozo...,  s’à dd’ârfuzzà (vincere), si no è mmeglio nunn’accummicià proprio ‘a tempurata (stagione)nova!

Ve conto ‘e fatte cumme jettono ajere: ‘O Napule apprimma lassaje sfucà pe ‘na ventina ‘e minute  ‘a scuatra d’Inzaghi ca però  nun fove periculosa...po pigliaje ‘o pallino d’’o juoco ‘mmano e ccu ttutto ca mancavano paricchi aizze (titolari) e gghiuvano troppi guagliune d’’a primmavera coccosa facetteno pure si se vedette chiaramente ca chilli ca jucavano stéveno a ccurto d’ addadda (preparazione) e dde sciato. Però ‘e riffe o ‘e raffe ô 19’, doppo ca Verdi êva   sciupato ‘nu paro ‘e bboni accasione, Tutino n’atu paro, finalmente Peppe ‘a ‘nguenta [ajere cu ‘e capille sale e ppepe...] riuscette a ccentrà ‘a porta mettennoce ‘ncopp’a ll’uno a zzero; però fove fuoco ‘e paglia i ‘e nuoste, mmece ‘e darece dinto s’assettajeno senza cunchiurere cchiú ‘nu saciccio  e nnaturale ca ‘o Bbeneviento pigliasse curaggioe ttentasse ‘e farese vedé sott’â porta nosta....chello ca nun êsse avuto ‘a essere  naturale fove ca ô 34’ ‘o Ntontero (Maksimovic) ca s’era piazzato a poche passe dô Creco (Karnezis) pisciasse ‘a palla ‘ncopp’a ‘nu jabbro (cross) pe nniente periculuso e ddesse vi libbera a Ccoda ca ‘o mettette a ppitoffio ô purtiere nuosto russimanno (pareggiando). ‘Ntribbuna-divano nce scennette ‘a lengua ‘ncanna i ancòra nunn’êvemo visto ca pure pe ttutta ll’arrancua (ripresa) ‘o Napule nun riuscesse a ffà male ô Bbeneviento e soprattutto  nunn’êvemo visto ancòra ‘a puttanata ca a ll’89’ avesse fatto Luperto ca facette arrivà quase ‘mporta a Vvokic(cio) senza deciderse a ccuntrastarlo anze permettennolo ‘e  tirà  facennose passà ‘o pallone ‘mmiz’ê ccosce e ccunzentennole ‘e fottere a Ccontini purtanno ‘e scuatra d’Inzaghi addirittura ‘ncopp’ô doje a uno.Me perdunate si ve cunfesso ca aLluperto lle chiammaje ‘e muorte, penzanno a ccumme stammo cuncertate?  I’ mo nun voglio farela cchiú nnera ‘e chella ca è... però ve dico ca nun m’aspetto niente ‘e bbuono da ‘sta scuatra e ssi Dela nun se decide a mmettere mano â sacca senza stà a ttracchià i a ffà ‘o capuzziello cumme se cumpete nun sulo cu ‘a vecchia zoccola, ma pure cu ‘a scuatra d’’o Bbiscione e ccu n’atu paro? Sperammo ca me sbaglio però v’assicuro ca ‘sta  tempurata (stagione) p’appedecà (seguire) ‘o Ciuccio, ll’appedèco sí, ma senza fareme nisciunu suonno (illusione) suvierchio. Mo êsse fà ‘e ppaggelle, ma nun ne vale ‘a pena: mecco quatto ‘mparanza a ttutte quante, ma ô Ntontero i a Lluperto p’’e strunzate fatte ‘e mmecco tre e ll’aggiu trattate!

E bbasta accussí, ve saluto e cce sentimmo, si ‘o Cielo ‘o vvo’, nun saccio quanno e ppecché.

Staveti bbe’. R.Bracale Brak