PATANE E PPANCETTA

PATANE E PPANCETTA

Chello ca serve pe 6 perzone

‘nu kilò ‘e patane a ppasta jalizza  (gialla) ,

150 gramme ‘e    pancetta affummecata  tagliata a fellocce fine, 

 ‘na cepolla ndurata ‘e Muntoro  ammunnata e ntretata,

‘nu túppeto ‘e prutusino lavato, asciuttato ‘e ntretato finu fino,
‘nu bicchiere d’ uoglio ‘auliva dunciglio  (e.v.p.s.a f.)

     Sale fino e ppepe niro macenato a ffrisco q.n. s. 

Comme se fa:

Ammunnà  ‘e patane,  tagliarle a ffarinule e sciacquarle.

Taglià a vvarriglie  ‘a pancetta e metterla dinto a ‘na prupurziunata marmitta cu cquatto  cucchiare d’uoglio  e farla suassà a ffuoco allero. Agnadí ‘o riesto ‘e ll’uoglio e ffarlo callentà; auní ‘o ttrigliato ‘e cepolla e,  quanno à pigliato culore,  agnadí ‘e ppatane a ffarinule; ‘nfonnerle cu ‘nu bicchiere d’acqua vullente, avascià ‘o ffuoco  e lassarle cocere  pe scarza mez’ora ammiscanno spisso. Accuncià e sale e ppepe e – stutato ‘o ffuoco – derrammà cu ‘o ttrigliato ‘e prutusino. Ammiscà  dellicatamente   e serví  comme trasetura cauda  o comme cuntorno ‘e  carna o latticine frische e/o staggiunate.

Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza pe magnà.

Mangia Napoli, bbona salute! Scialàteve e aggarbbatéve ‘o vernecale!

Raffaele Bracale