TORINO – NAPOLI (6.10.19) 0 A 0 ‘A VEDETTE ACCUSSÍ

TORINO – NAPOLI (6.10.19) 0 A 0

‘A VEDETTE ACCUSSÍ

Ah guagliú ‘o fatto se sta facenne serio: ‘o Napule nun sape cchiú affuzzà (vincere) e nnun sape signà cchiú. Doppo  d’’a mazziata casalinca cu ‘o Cagliari e cchillu scartellato russimmo (pareggio) cu ‘o Genche ajere mettettemo ll’uoglio ‘a copp’ ô peretto e ppure a ll’Arena ‘e Turino contr’ê profuche ‘e Mazzarri nchiudettemo ‘o sibbacco (match) cu ‘nu zzero a zzero scunzulato, purtannoce â casa ‘nu gramo punticiello, acqua ca nun leva séte tanto è overo ca mo ‘ncrassifica simmo sciuliate ô quarto posto surpassate pure dall’Atalanta scuatra assineja (satellite) d’’a vecchia zoccola ca trotta ‘ncimm’â crassifica doppo d’avé affuzzato (vinto)’ncasa d’’a Bbisciona. Cca ddoje songo ‘e ccose: o ce ànnu menato ‘o nniro ‘e seccia e cce ànnu cuovete o dint’ ê curfatte (spogliatoi) se so’ rrotte ‘e ggiarretelle e ànnu diciso ca ‘o Jancone nun s’à dda magnà capitone, ‘nzalata ‘e rinforzo, struffole,mustacciuole e ppasta riala. E ssí, ssí sulo accussí se po’ spiecà pecché  ‘a mubbara (partita) d’’o Napule  ajere fove senza zuco e ccunnimma e ttutto summato fove peja d’’o sibbacco (match) jucato ‘mBergio;è overo ca ll’ucummo (arbitro) Doveri  ce aiutaje p’’a scesa e nun ce dètte ‘nu ricore gruosso cumme a dduje palazze ‘e case quanno a ll’80’ Ghoulam(me) dint’â muntaca (area di rigore) cranata fove pigliato p’’o cuollo e ccarriato ‘nterra, ma i’ ‘a veco scura assaje  e nnun pozzo credere a cchi dice ca  ‘o fatto nunn’è ancòra arcarcanto (preoccupante) pecché stammo sulo a uttombre, ma si mo stammo ggià seje punte arreto ‘ncrassifica… che vo’ succerere a mmaggio? Si ce salvammo àmm’appiccià ‘e ccannele a ssan Gennaro?! Nun ce facimmo ‘o sanco amaro primma d’’o tiempo, lassammo stà e ppassammo ê ppaggelle:

 MERET[‘O Lungagnone] 6,5 ‘Na  sola, vera parata ma dicisiva quanno a ll’85’ se stennette ‘nterra pe ffermà ‘na sciamarrata d’Ansaldi.Cumplimente.

DI LORENZO 7  Che bbella atalossa (prestazione) d’’o ggiuvinotto ‘e dritta ca currette e sse facertte apprezzà nun sulo arreto, ma pure annante addó se racabbaje (sovrappose) cu ‘e tiempe juste e ‘nteliggenza mettenno ô niajo (nel finale) ‘na palla taminna (preziosa) ‘ncapo ô Spetaccuso i ‘o mammuoccelo, ‘mmece ‘e fravecarla ‘mporta ‘a specaje malamente menannola ‘ncopp’a ll’afachía (traversa) E mnnisciuno ‘o pigliaje a ccarocchie!  

 MANOLAS[Chitelassa] 6,5  Se facette apprezzà pe ccomme cummannaje ‘a trasera (difesa) cu ammanna (sicurezza) e perzunalità.

 LUPERTO 6,5  Surprennente, mettette ‘a musarola a Bbelotti  ca nunn’è n’accunto (cliente) semprice, spennennose ‘nu cartellino jalizzo (giallo) chell’unica vota ca fove nicessario.

HYSAJ[]Meza Cucchiara 6 Pe mez’ora facette ‘o ssuĵo, po fove custretto a llassà ‘o campo  pe ‘nu bbrutto additto  (infortunio).[dô 34' GHOULAM 5,5  Miezu zifo (voto mancante pecchè me fósse aspettato ‘e cchiú, ‘mmece se cuntentaje ‘e jí annante i arreto ‘ncopp’â curzia mancina; peccato ca a ll’uttantesimo trasette ‘int’â muntaca (area di rigore) cranata e ‘o menajeno ‘nterra pigliannolo p’’o cuollo e ll’ucummo (arbitro) facette vedé ca ‘o fatto nunn’era ‘o suojo.

ALLAN[‘O ‘Ncrifato] 5,5 Pure a isso miezu zifo (voto) mancante pecchè è overo ca ricuperaje ‘na cifra ‘e pallune  ‘mmiez’ô campo e ddètte cuatratura â scuatra, mantenenno ‘e mmesure juste, ma nun se facette vedé ô lemmeto  d’’a muntaca (area di rigore) cranata pe ttirà ‘mporta. Peccato.

RUIZ[Anema Longa] 6  Tutto summato s’’o mmereta pure si doppo ‘nu primmo ajone (tempo) pusitivo, se ne scennette ‘e posa a ll’arracua (ripresa).

ZIELINSKI 5  Me dispiace, ma ll’attocca ‘nu zifo (voto) mancante pecché ajere fove ‘na vera iachibba: nun cubimaje ‘nu saciccio nè ‘mmiezo ô campo, nè annante smarrunanno assaje; ll’aggi’’a mettere arret’â lavagna cu’o ggranone sott’ê bddenocchie!    

LOZANO [‘O Scugnizzo] 4,5  Angappa a cchist’ato! Ll’aggi’’a caccià fora! Jucaje ‘a peja mubbara da che sta a Nnapule; giraje paricchio a vvacante senza truvà pusizzione o spazzio e cquanno ll’avette [primmo ajone(primo tempo)]nunn’’o sfruttaje a dduvere. E cche saciccio!

[d4 61'  CALLEJON[Peppe ‘a ‘nguenta] 5,5 Pure a isso miezu zifo (voto) mancante pecchè avette cchiú ‘e mez’ora pe ffà male ô Toro, ma nunn’ ‘o ffacette. Mannaggia a cchi nunn’’o secuta.

MERTENS [Ciruzzo] 5,5  Me dispiace ma  ll’attocca miezu zifo (voto) mancante pecchè  chillu pallunetto remugliato (morbido) ô primmo ajone (nel primo tempo) asciuto ‘e ‘nu niente fove  ll'unica jucata da arricurdà ‘e Ciruzzo ca cumplessivamente nun fove ‘nserata.

INSIGNE[Lorenzigno] 5,5 Me ll’aspettavo ca pure a isso  le fósse attuccato ‘nu miezu zifo (voto) mancante pecchè cunfermaje ‘e jucà senza ggenio, senza forza e ssenza ficre (idee); nurmale ca, forze  pe ddispietto, ‘o Jancone ‘o facette jucà sulo pe n’ora. ‘E bbuono sulo ‘na palla  culante (filtrante) ca Anema Longa nun pigliaje pe ‘nu sciuscio.  

[dô 67' LLORENTE[‘O Spetaccuso] 4  Che peccato murtale chella palla avuta ‘ncapo ‘a Di Lorenzo e mmannata ‘ncopp’a ll’afachia (traversa) ‘mmece ‘e fravecarla ‘mporta; p’’o riesto facette ‘e fuosse dint’â muntaca (area di rigore) cranata aizanno porvera.]

All.:  ANCELOTTI [‘O Jancone] 5  Capa tosta, se ‘nfessette  a gghiucà cu n’ attacco liggiero e nnun ne cacciaje niente, facette trasí ô mammuoccelo ‘mmece ‘e sant’Arcadio e ffove pizzo e ppejo. ‘a scuatra soja a ll’arrancua jette ‘int’ê chiavette e isso nun sapette che ffà!

Arb. DOVERI  i ‘a chenca soja 4  Chisto s’è sfasteriato ‘e ce purtà bbuono, e  scemo  cumm’è ‘o ddimustraje cchiú ‘e ‘na vota ajeressera cu ddicisione a ccapa ‘e saciccio, siscanno a bbienetenne, ‘nchiudenno ll’uocchie ‘ncopp’ê carí (falli) d’’e cranate  e asasa(soprattutto) nun  siscannoce ‘nu ricore a ffavore quanno  a ll’81 Ghoulam(me) dint’â muntaca (area di rigore) cranata fove pigliato p’’o cuollo e ccarriato ‘nterra,  senza ca  chille d’’a VARra ca lle cunzola ‘a zia moneca ll’alluccase ‘int’ê rrecchie: “Ma tu che ccacchio staje facenno? Viene vide ca staje smarrunanno....assaje, chist’è ricore!”

E fermammoce cca cu ll’amaro ‘mmocca p’’o zzero a zzero d’ajere, però allimmeno   suddisfatte ‘e nunn’avé asseccato mazzate; scurciammoce ‘e mmaneche e vvedimmo si se po’ adderezzà ‘a varca accummincianno ggià da sapato ca vene quanno ô san Paolo ‘mmerz’ê sseje veneno a ffarece ziarea (visita)  ‘e pariente ‘e chella zoccola ‘e Giulietta  e i  spero ca, si ‘o Cielo ‘o vvo’ dummeneca  ve    conto  ca    ‘o Napule è tturnato a ssignà  e  à arfuzzato (vinto)  sempe cu ‘abbona ‘razzia  d’‘a chenca ‘e ll’arbitre! Staveti bbe’.

R.Bracale Brak