NAPOLI- GENOA (9.11.19) 0 A 0 ‘A VEDETTE ACCUSSÍ

NAPOLI- GENOA (9.11.19) 0 A 0

‘A VEDETTE ACCUSSÍ

Che scuorno e cche fetenzia guagliú! Manco ajeressera ô san Paolo contro a cchilli quatto profuche d’’e crifune genuvise, ‘o Napule riuscette a ffà ‘nu pireto viulento affuzzanno (vincendo), anze nun riuscette a ssignà manco ‘na zuzzimma d’addaffa (rete)cusicché, subbissato dê sische e ppernacchie d’’e muidde (tifosi) ca nunn’aveveno idrabbato(scioperato) justo pe spernacchiarle primma e ddoppo d’’a mubbara (partita) ca ‘ntribbuna-divano ce lassaje senza parole vedenno ca ‘e nuoste ggiravano a vvacante p’’o campo senza sapé che ffà, appaurate, ‘mpricise e ppigliate dê turche…, fove naturale ca fenesse cu ‘nu scunzulato zero a zzero ca ce lassaje ‘o ttuosseco ‘mmocca e ‘na cunsiderazziona: cca ‘o fatto è addivintato overo serio: ‘e nuoste nun sanno [o nun vonno?] cchiú affuzzà (vincere)  e ‘ncrassifica so’ sciuliate ô settimo posto, mettennoce ‘o scuorno ‘nfaccia. E pperò nun se riesce ancòra a ccapí si è ‘o Palazzo ca ce vo’ fa fora[e cce manna ucumme (arbitri) cumme a Ccalvarese [3]ca ajeressera nun ce dètte no uno, ma tre ricure nchiudenno uocchie, recchie e ati pertuse d’’e suoje…]  o se so’rrotte ‘e ggiarretelle i ‘e jucature, primma ‘e Natale, ne vonno caccià ô Jancone… Cumm’ ‘avuote e cumme ‘a ggire sempe sissantanove è i oramaje chiste ce stanno facenno vení ‘o schifo ‘e vederece ‘nu sibbacco(match). A ‘stu punto quaccuno [ma nun saccio chi…] à dda piglià ‘nu pruvvedimento e ttirà ‘stu capo ‘nterra pecché nujaute muidde (tifosi) nun ce mmeretammo ‘na scuatra cumme a cchella vista ajeressera ca nun fove capace ‘e signà n’addaffa (rete) a ccierti scarzune ca n’êveno pigliate quatto da ll’Udinese e anze stette a rriseco d’abbuscà e ffove salvata da Kalidú ca cu ‘nu granne taccullo (intervento) stuppaje ‘ncopp’â linia ‘e porta ‘na cunchiusiona  a bbotta sicura ‘e ‘nu crifone. Ora mo êsse ‘a fa ‘e ppaggelle, ma nun ne vale ‘a pena; mecco 4 a ttutte quante e ssalvo sulo ô Ggialante [6,5] p’’o fatto ca v’aggiu ditto.

E ffermammoce cca avvelute, ma sempe muidde (tifosi) d’’a maglia cuana (azzurra), ma no ‘e chilli quatto sbandate ca ‘a portano ‘ncuollo. Mo ‘o campiunato se ferma pe ffà spazzio â nazziunala e tturnammo a gghiucà sapato 23 jenno a Mmilano contr’ê diavule lucale. Ce sentimmo pirciò, si ‘o Cielo ‘o vvo’ pe dummeneca 24 e sperammo ca âmmo adderezzato ‘na varca ca, p’’o mumento, sta sbandanno malamente. Staveti bbe’. R.Bracale Brak