ATALANTA – NAPOLI (02.07.20) 2 A 0 ‘A VEDETTE ACCUSSÍ

ATALANTA – NAPOLI (02.07.20) 2 A 0

‘A VEDETTE ACCUSSÍ

E cche nne parlammo a ffà guagliú!? Doppo cinche arnasse (vittorie) cunzecutive puteva succere ca ‘o Napule sbracasse e cchesto facette ajeressera ‘o Ciuccio ‘ncasa ‘e ll’Atalanta scuatra assineja (satellite) d’’a vecchia zoccola. Doppo ‘nu primmo ajone (primo tempo) bastantamente suddisfacente, pure si poco cuncreto, eccuce ca, turnate ‘ncampo pe ll’arrancua (ripresa), ‘o Ciuccio perdette ‘a scienza e nnun fove cchiú isso e cquase s’arrennette ê lucale smarrunanno cchiú ‘e ‘na vota e ffoveno proprio ddoje fessarie d’’e nuoste ca ce custajeno care e amare: ‘a primma ‘a facette Anemalonga ô 47’ quanno ascenno dâ muntaca (area di rigore) nosta se facette levà ‘a palla ca Pasalic(cio) mettette ê spalle d’’o Lungagnone ca nun ce putette fa niente; n’ata grossa fessaria ‘a facetteno ô 58’ ‘nchietta ll’udí (terzino) nuosto ‘e dritta i ‘a catena difenziva ‘e mancina [ca lassaje jabbrà (crossare) nun m’arricordo  a cchi  pe Ggosens(o) ca, lassato libbero e ssulo da Di Lorenzo, nun avette pietà d’’o Lungagnone ca nun tentaje niente e isso ‘o futtette! Troppi fessarie, troppe! ‘Ncopp’ô doje a zzero ‘ntribbuna-divano  ce fossemo aspettato ‘e vedé ‘nu Ciuccio furiuso tentà ll’impussibbile p’adderezzà ‘a varca… ‘mmece chi t’’o ddà? Sulo ô 68’ quanno finalmente Gattuso se decidette a ccagnà ‘nu paro ‘e pedine: Lorenzigno e Cciruzzo mannanno ‘ncampo a Llozano i a Ssant’Arcadio putettemo vedé coccosa, ma sempe troppo poco.

Mo ce avimm’’a rassignà sulamente: ‘o trascurzo Ciampionsa ‘mpratteca è nchiuso: è inutile sunnarce ‘o tramme elettrico, ce truvammo a cquinnece punte dô quarto posto i a nnove jurnate  dô mustalà (termine) d’’o campiunato nun putimmo parlà ‘e recúpeto (rimonta) Êssem’avut’’a fa coccosa ajere e nnunn’’o facettemo… Pacienza.

Passammo ê ppaggelle:

OSPINA[Pastacrisciuta] 6,5 Sfurtunato.Attiento quann’ascette e  bbravo ‘ncopp’a ‘nu tiro ‘a fora ‘e Gomez(zo), Po sfurtunato se scontraje cu  Mario Rui spintunato da Caldara senza ca Doveri pigliasse pruvvedimente,se sciaccaje e ffove custretto a ascí. Peccato! [Dô 30' MERET[Lungagnone] 5,5 Nun tenette grosse itimme (resposabilità) ‘ncopp’ê ddoje addaffe (reti), ma êsse avut’’a tentà coccosa ‘ncopp’â siconna e nnun ‘o ffacette!

DI LORENZO 5,5  Miezu zifo (voto) mancante pecché si durante ô primmo ajone(tempo) se facette rispettà da  Gosens(o) attaccannolo spisso, a ll’arrancua (ripresa)perdette ‘e mmesurre, ‘o lassaje libbero i ‘o terisco ce futtette casticannoce.

MAKSIMOVIC[‘O ‘Ntontero] 5,5 - Miezu zifo (voto) mancante pecché si durante ô primmo ajone(tempo) fove  sicuro e  ppusitivo, a ll’arrancua  (nel secondo)smarrunaje perdennose a Ppasalic(cio).

KOULIBALY[‘O Ggialante] 5,5  Me dispiace ma ll’attocca  miezu zifo (voto) mancante pecché si durante ô primmo ajone(tempo) se facette rispettà da tutte, a ll’arrancua scennenno annante lle capitajeno ‘e capa ddoje bboni ppalle e nnun ne sfruttaje nisciuna

MARIO RUI 5,5 Miezu zifo (voto) mancante pure a isso  pecché  durante ô primmo ajone(tempo)a mmancina êsse avut’’a scennere ‘e cchiú, a ll’arrancua  se facette vattere e ccartià cchiú ‘e ‘na vota da Castagne e ccurnuto e mmazziato fove pure nutizziato (ammonito) da Doveri.

RUIZ[Anemalonga] 5 ‘Nu zifo (voto) mancante pecché si durante ô primmo ajone(tempo) palliggiaje bbuono cu con Ddemme, venette meno a ll’arrancua (ripresa) quanno nun sulo, cumme v’aggiu ditto sbagliaje ascenno dâ muntaca (area di rigore)nosta,cuncedenno ll'azziona d’’o primmo stuco  (gol) â Dea, ma po sprecaje n’accasione ‘mpurtante a vvinte minute dô mustalà (termine). Peccato!

Diego DEMME 6  Facette ‘o ssuĵo currenno e ccusenno. [Dô 73' LOBOTKA 6  Se dette da fà ma nun fove ajutato.]

ZIELINSKI 6  Uno d’’e cchiú ppusitive; se facette vedé prupunennose, ‘mmentanno coccosa, tiranno, ma nun truvaje ‘a porta.   

 POLITANO 5 ‘Nu zifo (voto) mancante pecché jucaje senza correre troppo, sparagnannose! [Dô 73' CALLEJON [Peppe ‘a ‘nguenta]5,5 Miezu zifo (voto) mancante pecché ce fóssemo aspettato ‘e cchiú; nun se facette nutà, nun venette fora!]

 MERTENS[Ciruzzo] Me dispiace ma ll’attocca miezu zifo (voto) mancante pecché si è overo ca cercaje spisso ‘e cupulià (dialogare) cu ‘e carigginne (gli esterni)  nun truvaje ‘a jucata bbona e nnun fove maje periculuso[Dô 68' MILIK[Sant’Arcadio] 6  Cchiú ppusitivo ‘e Ciruzzo se facette vedé cchiú d’isso dint’â muntaca (area di rigore) bercamasca, signanno pure,ma purtroppo ‘nnattasallulo. Tadiddo (determinato).]

INSIGNE 5,5 Miezu zifo (voto) mancante pure a isso ca facette coccosa sulo ô primmo ajone (primo tempo)currenno e ccercanno pure ‘a porta, ma cu ttre telefonate. Sparette a ll’arrancua (ripresa) quanno nunn’ ajutaje cchiú a  Mmario Rui.[Dô 68' LOZANO 6 Currette a ccapa sotto pruvannoce, ma nunn’avette nisciuna bbona accasione!]

all. GATTUSO 5,5 Tutto summato ‘nu bbuonu primmo ajone (tempo) d’’a scuatra soja,ma turnate ‘ncampo êsse avuto súbbeto cagnà pusizziona a Anemalonga spustanno Zielinski  cchiú centrale e êsse avut’’a truvà ‘o sistema ‘e risolvere ‘e prubbleme d’’a scuatra e nnun ce riuscette. Peccato.  

arb. DOVERI 5,5  Ajere spisso nchiudette ll’uocchie pe nun vedé caputianno ‘e carí (falli).

E bbasta accussí. Mo si ‘o Cielo ‘o vvo’ ce sentimmo lunnerí ca vene pe ccuntareve chello ca succede dummeneca nnotte ô san Paolo contr’ê pecurare rumanise.

Staveti bbe’. R.Bracale Brak