BOLOGNA-NAPOLI (15.7.20) 1 A 1 ‘A VEDETTE ACCUSSÍ

BOLOGNA-NAPOLI (15.7.20) 1 A 1

‘A VEDETTE ACCUSSÍ

 No, guagli accussì nun va, mannaggia ê cane ‘e canciello! Ajere ‘mmerz’ ê ssette e mmeza ‘o Ciuccio jette a Bbulogna contr’ê murtadelle lucale e s’êsse avuto levà ‘e pacchere ‘a faccia datose ca a ll’addabba (andata) ô san Paolo ‘e mmurtadelle d’’o zincaro se pigliajeno ‘e tre ppunte i ‘e pacchere avute ancòra ce abbrusciavano. Ca pirciò ajere êssemo avut’ ‘affuzzà (vincere) e mmece jette a ffen ca ce spartettemo ‘e scioccele e ss e nno riuscettemo a ppurtarece â casa ‘nu gramo punticciullo, acqua ca nun leva sete e ttutto chesto pecché doppo  ‘nu sibbacco  (match) spassuso e e cumbattuto ‘o Ciuccio nun fove capace ‘e mantenere nsi’ a ll’urdemo  ‘o ventajo (vantaggio) cunquistato cu Cchitelassa ggià ô 7’ d’’o primmo ajone (tempo)e se facette arrivà a ll’81’ quanno Bbarrow(e) facette ‘o guappo jucannose ‘a trasera (difesa) nosta e casticanno ‘o Lunganone ca manco tentaje ‘e fernà ‘a cagliosa d’’o nirone lucale. E cce dicette pure bbuono pecché poco doppo Danilo cu ‘nu tiro quase ‘a fremmo cugliette ‘o palo ca dètte ‘na nana ô Lungagnone. ‘Nzomma doppo ‘nu primmo ajone cu ‘nu Napule ca gestiunaje ‘o pallino d’’o juoco senza però maje tentà ‘e  mutajffà (raddoppiare)’ei padrune ‘e casa rispunnetteno cu n’arrancua murriffa (ripresa sontuosa),sfresanno (sfirando) cchi ‘e ‘a vota ll’addaffa (rete) ca c’êsse fatto chiagnere. Ma pure chillu russimmo (pareggio) finale ce rummanette ll’amaro ‘mmocca giacché ‘o Napule visto ajere fove luntano parente ‘e chillo visto ati vvote. Peccato pecché ajere  ‘o Napule fallette ‘o surpasso ô quinto posto, venenno mìsemo (addirittura) angappato dô Milan(ne). Votta a ffenì ‘stu campiunato!

Passammo ê ppaggelle:

 MERET[’O Lungagnone] 5,5  Miezu zifo (voto) mancante pecché allimmeno êsse avuto tentà coccosa ‘ncopp’â cagliosa ‘eBarrow(ve) e nnunn’’o ffacette. P’o riesto urdinaria amministrazziona!

 DI LORENZO 6 Facette ‘o duvere suojo,scenneno ‘e posa sulo a ll’arrancua (ripresa).

 MAKSIMOVIC [‘O ‘Ntontero] 5.5 Miezu zifo (voto) mancante pecché facette ‘o duvere suojo nsi’ a ll’uttantunesimo quanno se facette cartià da Bbarrow(ve)  

MANOLAS[Chitelassa] 6 Se fosse mmeretate pure ‘e cchiù  p’’a granna addaffa (rete) ca facette, ma a ll’81’ êsse avuto pur’isso fà coccosa pe ffermà a Bbarrow(ve). Peccato.

HYSAJ[Mezacucchiara] 5,5 Miezu zifo (voto) mancante pecché, ajere capitano, miso a mmancina facette pesà ca nunn’è  Mario Rui!

DEMME 6 Aculla (diga) sustanziosa d’’o Napule facette quase tutto ‘o duvere suojo. [dô 69’  RUIZ[Anemalonga] 6  Pruvaje a ggestiunà ‘o pussesso, però nun facette ato.]

 ELMAS[‘O Turco] 6,5 Atalossa(prestazione) sustanziosa e ccapagliona d’’o guaglione ca sfruttaje ll’accasiona ca Gattuso lle dètte.

ZIELINSKI 5,5 Miezu zifo (voto) mancante pecché me fósse aspettato ‘e cchiù dô pulacco ca ‘mmece nun cercaje quase maje ‘a porta e spisso ‘mmece ‘e correre, jette cuoncio cuoncio.[da ll’83’ ALLAN[‘O ‘Ncrifato] sv].

POLITANO 5 Che delusione! ‘Nuzifo (voto) mancante pecché tuccaje sì duimila pallune, ma nun cunchiudette ‘nu saciccio asasa (soprattutto) quanno êtt’’a tirà ‘mporta. [dô61’ CALLEJON [Peppe ‘a ‘nguenta] 5,5 Miezu zifo (voto) mancante pecché ajere jucaje senza pesà cchiù ‘e tanto!]

 MILIK[Sant’Arcadio] 5,5 Me chiagne ‘o core, ma pure a isso ll’attocca miezu zifo (voto) mancante pecché ajere se facette nutà poco dint’â muntaca (area di rigore) d’’e lucale; è overo ca ‘na vota ca ce trasette palla ô pere Danilo ‘o menaje ‘nterra cu ‘na manata arreto ê spalle e ll’ucummo nun vulette vederla, ma ‘e bbuono me ricordo sulo ‘o muvimento fatto, ô mumento ‘e ll’addaffa (rete) nosta, pe ppurtare appriesso uno d’’e centrale arapenno ‘nu pertuso addó se ‘mpezzaje Chitelassa. Po nient’ato: troppo poco!  [dô 70’ MERTENS[Ciruzzo] 5,5  Pure a isso miezu zifo (voto) mancante visto ca sotto porta nun fove isso e mmancaje ‘e burrudda (freddezza)!]

LOZANO 5,5  Me dispiace ma ll’attocca pure a isso miezu zifo (voto) mancante pecché sfresaje (sfiorò) sulamente ll’addaffa (rete) senza maje essere priciso [dô 61’ INSIGNE 5,5  Pure a isso miezu zifo (voto)mancante pecché trasette senza farese apprezzà.]

all. GATTUSO 5.5  ‘A scuatra soja ajere ‘ntribbuna-divano nun piacette a nnisciuno: troppo scurzona nun riuscette a mmantenere ‘o ventajo (vantaggio) e ffacenno ‘e cunte sott’ô lampione ‘e mmurtadelle êssene mmeretate coccosa ‘e cchiú…

arb. PICCININI 5  Scadente Nun sulo nun vulette vedé ‘o carí (fallo) ‘e Danilo ‘ncuoll’a Ssant’Arcadio e nnun ce dette ‘nu ricore sacrusanto e ppo smurrunaje tropp’ati vvote e c’êtte ‘a penzà ‘a Varra.

E bbasta accussí. Mo si ‘O Cielo ‘o vvo’ ce sentimmo llunnerí ca vene pe ccuntareve che facimmo dummeneca ô san Paolo contr’a ll’Udinese. Sperammo ca ve conto bboni ccose. Staveti bbe’.

R.Bracale Brak