INTER – NAPOLI (28.7.20) 2 A 0 ‘A VEDETTE ACCUSSÍ

INTER – NAPOLI (28.7.20) 2 A 0

‘A VEDETTE ACCUSSÍ

E cche ne parlammo a ffà guagliú! ‘O Napule ajere a nnotta jette a Mmilano  contr’â Bbisciona e ffacette n’ata fijura marrò [e nsi’ a mmo ggià so’ ‘a bbellezza ‘e ‘na duzzina!]abbuscanno pe ddoje a zzero senza essere capace ‘e fà manco ‘o cellechío ê lucale ca, p’’a verità, nun facetteno cape d’angiulo, ma ô mmacare foveno capace ‘e sfruttà ‘nu paro d’accasione bbone: ‘a primma   cu Dd'Ambrosio ca a ll’unnicesimo apprufittaje ‘e ‘nu sfregazzo (sbavatura)’e Mario Rui ca s’’o perdette i ‘a siconna cu Llautaro Martinez(zo) ca ô sittantatriesimo, nun cuntrastato da nisciuno, futtette dô lemmeto  ô Lungagnone [ca pe pparta soja se menaje ‘nterra quase quanno ‘o pallone era ggià trasuto!] È overo ca ‘ncopp’a ‘stu campiunato ggià da paricchio ‘o Ciuccio nce à fatto ‘nu crucione, ma abbuscà cumme succedette ajere a nnotte  è ‘na cosa da metterse scuorno e ssi chella d’ajere s’à dda cunziderà n’ata prova ggenerale d’’o sibbacco (match) ca ô mese ca trase âmm’a jí a ffà contr’ô Bbarcellona ‘ncasa lloro, i’ dico ch’è mmeglio ca sparagnammo ‘e sorde d’’o viaggio. Passammo ê ppaggelle:

  MERET[‘OLungagnone] 5,5  Nun se mmereta ‘e cchiú; ‘ncopp’â primma addaffa (rete) rummanette a gguardà, fove bravo ‘ncopp’a ‘nu tiro mancino   a bbotta sicura ‘e Brozovic(cio), ma êsse pututo e  avuto ‘a fà assaje ‘e cchiú ‘ncopp’â cunchiusione ‘e Lautaro Martinez(zo) e nnun ‘o ffacette.

 HYSAJ[Mezacucchiara] 5,5  ‘O mese nunn’è ssempe ‘e trentuno e ajere ll’arbanese fove n’atu jucatore ‘e chillo visto  contr’ô Sassuolo. Pessino ‘nu si’ nisciuno cumme a  Bbiraghi lle prucuraje cchiú ‘e ‘nu prubblema. [da ll’84’ MALCUIT[‘O Tignuto] sv, ma benturnato!]

KOULIBALY[‘O Ggialante] 6  Cu ttutto ca Lukaku fove ‘nu bbestione pronto a mmuzzecà, ‘o nuosto lle mettette ‘a musarola!

MAKSIMOVIC 5,5  Meno  attiento d’’o compagno ‘e sezziona  (reparto).

Mario RUI 5,5  Cumme v’aggiu ditto sbagliaje assaje a ll’unnicesimo primma facennose sceppà palla da Brozovi(cio) e ppo perdennose a Dd’Ambrosio! [Dô 65’ GHOULAM 6 Che bbella nutizia!È tturnato in ‘o pere è ssempe justo.]

 DEMME 5,5  Ajere ‘ntribbuna-divano cumplessivamente  nun ce piacette e ‘nnaccasione d’’a siconna addaffa (rete) d’’e lucale perdette ‘o stibbacco   (duello) cu  con Lautaro Martinez(zo).

 ZIELINSKI 6,5  Tutto summato ‘e meglio d’’e nuoste: fove ll’unico a stibbaccà (duellare) cu   Handanovic(cio)’mpignannolo ddoje o tre vvote.[Dô 65’ ALLAN[‘O ‘Ncrifato] 5,5  ‘Na mez’ora senza farese nutà!]

 ELMAS[‘O Turco] 5,5  Facette quacche cusarella, ma êsse pututo fa ‘e cchiú!

 POLITANO 5,5 M’aspettavo ca lassasse ‘o singo suĵo, ma sulo ‘na vota ‘mpignaje a  Handanovic(cio)!  [dô 76' LOZANO sv

 MILIK[Sant’Arcadio] 5  Lassato sulo e ssenza cullabburazziona nun putette fa niente e aizaje porvera. [da ll’83’ CALLEJON[Peppe ‘a ‘nguenta] sv]

INSIGNE 5,5 Nun riuscette maje a ccunchiurere decentemente… e nnun fove cosa ‘e poco!

all.  GATTUSO 5  Quanno s’abbusca ‘o primmo respunzabbile è ssempe ‘o mutarribbo (allenatore)i ajere ‘a scuatra soja nun riuscette a ccuncretizzà ‘o juoco cumme si ‘a capa ‘e tutte quante stesse ggià a Bbarcellona. Nunn’è ccosa seria!

arb. VALERI 5 Si nun cunzideremmo ‘nu ricore ca nun ce dette e ca certamente c’êsse siscato contro si fósse capitato dint’â muntaca (area di rigore) nosta, ati fetenzie nun ce ne facette, ma siscaje a vvienetenne.

E ffermammoce cca. Mo si ‘o Cielo ‘o vvo’ ce sentimmo dummeneca ca vene pe ccuntareve che facimmo sapato a nnotte  ô san Paolo contr’â Lazzio pe ll’urdema ‘e campiunato speranno ca nunn’abbuscammo n’ata vota!  Staveti bbe’.

R.Bracale Brak