CALAMARE JENCUTE

CALAMARE JENCUTE

chello ca serve pe seje perzone

6 calamare gruosse,

18 mazzancolle ‘scarpate,  lavate e ntretate,

3 grossi patane vecchie,

dduje  bicchiere   d’ uoglio ‘auliva dunciglio,

‘o zuco passato a cculaturo ‘e duje limune ‘e Surriento,

‘na cepolla ndurata ‘e Muntoro ammunnata e ntretata,

‘nu spiculo d’aglio ammunnato  e ntretato finu fino,

ddoje fronne ‘e lauro frisco ntretato,

‘na fraschetella ‘e peperna   spullecata,

‘nu cucchiarino ‘e pepe janco macenato a ffrisco,

‘na vrancata e ‘na presa o doje ‘e sale duppio,

sale fino q.n.s.

 

comme se fa

Àrvere  ‘e  patane dinto a abbunnante  acqua vullente salata (vrancata ‘e sale duppio) pe 25 minute,scularle, spellarle e passarle ô ‘spremmeturo.recugliennole dinto a ‘na zupperella;agnadí ‘e mazzancolle ‘scarpate  lavate e ntretate;  salà, pepà e cunní cu miezu bicchiere d’uoglio, ddoje fronne ‘e lauro frisco ntretato e ‘na fraschetella ‘e peperna   spullecata. Pulezzà ‘e calamare, lavarle e ntretarne a pezzulle  ‘e granfetelle.Cu ‘nu cucchiaro a pponta jenchere ‘e calamare cu ‘o cumposto appruntato e fermà cu ‘nu steccadente.Dinto a ‘na prupurziunata tiella ricà ‘nu bicchiere e mmiezo d’ uoglio e a ffuoco allero fà piglià culore â cepolla ntretata; agnadí ‘e calamare jencute e ‘e granfetelle ntretate,’nfonnere cu ‘o vino, cummiglià ‘a tiella e lassà cocere a ffuoco miccio pe 25 minute nfi’ a che ‘e calamare addiventano tiennere.Accuncià ‘e sale duppio e ppepe e fraditante cunní cu ll’uoglio, l’aglio ntretato sale fino e zuco ‘e limone  ‘a rucola lavata e asciuttata.Sistimarla dinto a ‘na sperlunga usannola pe llietto d’ ‘e calamare e d’ ‘e granfetelle. Serví súbbeto. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! raffaele bracale

.

.