AVEMMARIE CASO E OVA

AVEMMARIE CASO E OVA

 

Chello ca serve pe sseje perzone

600 gramme ‘e  avemmarie  (tubbettielle ricate),
3  ova
100 gramme ‘e ‘nzogna,

‘na farinula (dado) pe bbroro veggetale,

150 gramme ‘e  pecurino rattato finu fino,
‘nu tupputo ‘e prutusino lavato, asciuttato e ntretato finu fino
sale duppio ‘na vrancata,

sale fino, dduje pizzeche,
pepe janco macenato a ffrisco quanto ne piace.

Priparazzione

Appruntà ‘nu broro vullente cu quatto litre d’acqua e ‘na farinula pe bbroro veggetale e àrverve(lessarvi) ‘a pasta; fraditanto   (nel frattempo) arapí ll’ova dint’ a ‘na ciotola  e sbatterle a ffunno  cu ‘na furchetta, ‘nzieme ô ppepe e ô  ssale fino;fà sciogliere a ffuoco doce dint’ a ‘na tiella ‘e fierro niro ‘a ‘nzogna, aunirve ll’avemmarie arvate verde verde (al dente) e ammiscà pe ‘nu paro ‘e minute sempe a ffuoco doce;súbbeto doppo auní ll’ova sbattute e ‘o pecurino rattato finu fino e continuà a ammiscà    fino a che ll’ova nun risultano addenzate; ‘mpiattà , e serví sott’ô colpo  a ttavula derramanno (cospargendo) ògne purzione ‘e prutusino ntretato finu fino.

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja.

Mangia Napoli, bbona salute! Scialàteve e aggarbbatéve ‘o vernecale!!

Raffaele Bracale