NAPOLI- GENOA (27.9.2020) 6 A 0 ‘A VEDETTE ACCUSSÍ

NAPOLI- GENOA (27.9.2020) 6 A 0

‘A VEDETTE ACCUSSÍ

Che sbrasata guagliú e cche ssuddisfazzione a vvedé ‘o Ciuccio, pure si sulo doppo ddoje jurnate, ‘ncimma â crassifica d’’o campiunato cu sseje punte, otto addaffe (reti) fatte e nnisciuna pigliata. E vvulesse ‘o Cielo e ddurasse pe pparicchio!  Ajere ô san Paolo  ‘nu  Napule urdinato e ccrucifero affuzzaje (vinse) pe sseje a zzero  dànno ‘na lezziona ô  Ggenoa ca, penzo,  nun s’’a scorda!  Gattuso fove  custretto a ffà a mmeno   apprima ‘e Lorenzigno   e ppo  ‘e Chitelassa  pe n’additto (infortunio) e pparette cchiú  serio chillo d’’o capitano ca sperammo se repiglia primma d’’o scontro ‘e dummeneca ca vene ‘ncasa d’’a vecchia zoccola! Cu ttutto chesto ‘o Napule nun ghiette maje ‘nsufferenzia e ddoppo vinto minute ‘e sturio, accumminciaje a mmacenà juoco; doppo ll’uno a zzero d’’o primmo ajone arrivate a ll’arrancua (nella riresa) se ne vedette bbene, sbrasaje mettennose dint’â sacca tre ppunte sustanziuse e ccunmmincente. BBuono accussí!

Passammo ê ppaggelle:

MERET[‘O Lungagnone] 6 Se guaraje ‘o sibbacco (match) senza manco spurcarse ‘e guante.

DI LORENZO 6,5   Meglio a ll’arrancua (nella ripresa) senza nisciuno sfregazzo (sbavatura), dint’ê primme quarantacinche minute sulo  quacche ‘ndicisiona,mentre ‘a scuatra sturiava ‘a facenna, ma po venette fora sfresanno (sfiorando) pure ll’addaffa (rete) cu ‘na cabbesera  (colpo di testa).

 

KOULIBALY[‘O Ggialante] 7 Pare ca rummane cu nnuje e sso’ ccuntento asasa (soprattutto) mo ch’è tturato a essere isso sicuro priciso e pputente!

MANOLAS[Chitelassa] 6,5 Bbona atalossa (prova) cu allimmeno ‘nu paro ‘e nchiusure dicisive primma d’ascí pe bbia ‘e ‘nu ‘mpiccio ê rine…[Dô 46’ MAKSIMOVIC[‘O ‘Ntontero] 6 Atalossa (prova)  urdinata e ssenza sfregazze (sbavature).]

 

HYSAJ[Mezacucchiara] 7 Sempe cchiú a ccommeto suĵo‘ncopp’â ferza mancina, mumazzo (ottimo p’’e cchiusure cunnite da quacche ghiucate ‘e classe cumme ‘nnaccasione ‘e ll’addaffa (rete) d’’o Turco [69’].

FABIAN[Anemalonga] 6  êsse pututo fa ‘e cchiú, ma, tutto summato, bbona atalossa (prova)!   

 

ZIELINSKI 7,5 Accumminciaje e ffenette ll’azzione d’’o doje a zzero [46’]e pp’o riesto bbelli ghiucate cumme a ssempe e ccumme a ssempe quacche sfregazzo (sbavatura) ‘mpruvvisa, ma senza cunsequenzie; pigliaje parte pure a ll’azziona d’’o tre a zzero! [Dô 72’ GHOULAM 6  ‘Nu scampulo ‘e sibbacco (match) cumme carigginno (esterno) auto attiento e  urdinato.]

LOZANO 7,5  Se facette apprezzà nun sulo p’’e ddoje addaffe (reti) segnate[10’ e 65’], ma pure pe cquacche bbuonu jabbro (cross) e ‘nu paro ‘e saille (dribbling); êsse pututo pure signà ancòra, ma nun sfruttaje a mmestiere ‘o matàlo (perfetto) missiddo (assist) ‘e Caromecuoste. Peccato!  [Dô 66’ POLITANO 6,5 Jucaje a mmestiere  sulo vinticinche minute e sse levaje ‘o sfizzio ‘e signà [72’]Applavuse!]

 

MERTENS[Ciruzzo] 7 Tutto summato, me parette ‘o meglio d’’a ‘nzerta; ‘a sola presenza soja mettette paura a ll’avverzarie e ô 57’ mettette ‘a firma sotto a ll’addaffa ca fove ‘a cientovintisettesima cu ‘a maglia luvarda (azzurra). Coppola ê ddenocchie! [Dô 66’ LOBOTKA 6 ‘e stima pecché jucaje troppo poco.]

 

INSIGNE[Lorenzigno] 6  Carimmo (generoso) e sfurtunato; se facette male a ppe isso currenno verz’âporta nosta pe ddà ‘na mana. Sperammo ch’è ccosa ‘e niente e ca pe ddummeneca contr’â vecchia zoccala ricupera!  [Dô 22’ ELMAS[‘O Turco] 6,5 Trasette ô posto d’’o capitano e gghiucaje ‘nu sibbacco (match) ‘e cegna (grinta) e d’azzaja (impegno) ‘nteressante; signaje pure [69’] ‘na bbella addaffa (rete).]

 

OSIMHEN [Caromecuoste] 7 Nun participaje â bbonafficiata d’’a sbrasata, ma s’’o ffósse mmeratate pecché ‘a presenzia soja se sentette e ccomme!Tiraje ‘mporta e ccunfezziunaje cchiú ‘e ‘mi missiddo (assist). È pproprio ll’ommo ca serveva lla ‘nnante; p’’o ssignà sperammo ca se ll’è astipato pe ddummeneca ca vene e ppe ‘ntussecà ‘a vecchia zoccola. I accussí ffósse!

 

all. GATTUSO 7,5  Mettette ‘ncampo ‘a scuatra justa e cquanno servette facette bbuono a mannà dinto ô Turco.  Andivinaje ‘e cagne i ‘a scuatra dètte ‘a ‘mpressiona  d’essere crisciuta ‘ncuncretezza!

arb. SACCHI 4  Ma chi ll’à miso ‘o sisco ‘mmocca a cchisto?Fetenzie nun ce ne facette si nun cunziderammo ll’avé nutizziato (ammonito) a Cchitelassa  cuntinuamente pruvucato dê crifune, ma dette ‘a ‘mpressione ‘e nun capí niente ‘e chello ca steva facenno.

E bbasta accussí. Ve saluto e ssi ‘o Cielo ‘o vvo’ ce sentimmo llunnerí ca vene pe pparlà d’’o scontro a Tturino contr’â vecchia zoccola. Facimmo corna. Staveti bbe’.

R. Bracale Brak