VERMECIELLE COZZECHE E SSAFRONE

VERMECIELLE COZZECHE E SSAFRONE chello ca ce vo’ pe sseje perzone   600 gramme ‘e vermecielle, dduje chilò ‘e cozzeche ‘e Taranto dduje spicule d’aglio ammunnate e ntretate finu fino, dduje cerasielle  pircante (piccanti)lavate, asciuttate e grabbate (incisi) p’ ‘o lluongo, ‘nu bicchiere d’uoglio ‘auliva dunciglio (olio evo), ddoje bustine ‘e safrone(zafferano), sale duppio ‘na  vrancata, sale fino e ppepe janco mmacenato a ffrisco q.n.s. ‘nu tuppeto(ciuffo) ‘e prutusino lavato, asciuttato e  ntretato.

Pulezzà e llavà a mmestiere ‘e cozzeche e metterle dinto a ‘na prupurziunata tiella a ffuoco miccio cu ll’uoglio, ll’aglie ammunnate e ntretate finu fino e ‘e dduje cerasielle  pircante (piccanti)lavate, asciuttate e grabbate (incisi) p’ ‘o lluongo; ‘ncupirchià e aspettà ca ‘e cozzeche s’arapono; appena aperte, levà ‘a tiella dô ffuoco,scarpà ‘e cozzeche e cunzervà ‘e frutte dinto a ‘na ciotola cupierte  cu ‘o zuco passato a cculaturo stritto; mettere n’ata vota tutto cosa dint’â tiella ‘nzieme ‘o ssafrone dellajato cu ‘nu bicchiere d’acqua vullente; fraditanto àrvere teniente teniente ‘e vermecielle dinto a otto litre d’ acqua vullente salata (vrancata ‘e sale duppio), scularle e revacarle  dint’ â tiella cu ‘o zuco caudo. Tenerle a ffuoco allero pe ‘nu paro ‘e minute e a ll’urdemo,  fora dô ffuoco, derrammàrle cu ‘nu tuppeto ‘e prutusino lavato, asciuttato e  ntretato. Ammiscà, agghiustanno  ‘e sale fino e  de ppepe janco mmacenato a ffrisco; ‘mpiattà e serví caude ‘e fuculare ‘sti sabruse (gustosi) vermecielle. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale

.