VERMICIELLE CU ‘E PUPARUNCIELLE ‘E SCIUMMO.

VERMICIELLE CU ‘E PUPARUNCIELLE ‘E SCIUMMO. Chello ca ce vo’ pe sseje perzone: 600 gramme ‘e vermicielle, 600 gramme (piso lisso) ‘e puparuncielle ‘e sciummo ammunnate dô streppone, lavate e asciuttate, 600 gramme(piso lisso)  ‘e pummarulelle d’ ‘o piennolo lavate, asciuttate e ttagliate p’ ‘o lluongo â mmità dduje spicule d’aglio ammunnate e ntretate finu fino, ‘nu bicchiere e mmiezo d’ uoglio ‘aulive dunciglio, ‘nu tuppeto ‘e vasenicola lavato, asciuttato e ntretato a mano senza curtiello, sale fino e ppepe janco mmacenato a ffrisco q.c.n.v. sale duppio ‘na vrancata

Comme se fa     Dinto a ‘na prupurziunata tiella ricà miezu bicchiere d’uoglio e ‘nu spiculo d’aglio ammunnato e ntretato finu fino e a ffuoco allero fà piglià culore a ll’aglio e appena è succieso agnadí  ‘e puparuncielle ‘e sciummo ammunnate dô streppone, lavate e asciuttate e farle cocere; comme songo suassate avascià ‘o ffuoco  e dint’â  tiella, agnadí ll’ato uoglio e ll’ato aglio ammunnato e ntretato finu fino, aspettà ca pigliano calore e agnadí‘e pummarulelle d’ ‘o piennolo lavate, asciuttate e e ttagliate p’ ‘o lluongo â mmità, lassà cocere pe diece minute, accuncià ‘e sale e ppepe e agnadí ‘o ttrigliato ‘e vasenicola e lassà cocere pe n’ati cinche minute. Fraditanto àrvere teniente teniente ‘e vermicielle dinto a ‘na caurara d’acqua vullente salata (vrancata ‘e sale duppio); scularle asciutte asciutte e revacarle dint’ â tiella cu ‘o zuco, , tuiglià pe dduje minute a ffuoco allero,  e ‘mpiattà servenno ancòra caude ‘e fucularo. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale

.

.